ரூ. 79 இலட்சம் ஊழல் குற்றச்சாட்டு: முன்னாள் அமைச்சின் செயலாளர் கைது!

கூட்டுறவு மற்றும் உள்நாட்டு வர்த்தக அமைச்சின் முன்னாள் செயலாளர் காமினி கித்சிறி டயஸ் அமரவத்ன, கொள்வனவு நடவடிக்கையில் இடம்பெற்றதாகக் கூறப்படும் ஊழல் மோசடி தொடர்பில் இலஞ்சம் அல்லது ஊழல் பற்றிய விசாரணை ஆணைக்குழுவினால் கைது செய்யப்பட்டுள்ளார்.

பொல்கொல்ல மஹிந்த ராஜபக்ஷ வைத்தியசாலைக்கான கதிரைகளை கொள்வனவு செய்ததில் இடம்பெற்றதாகக் கூறப்படும் முறைகேடுகள் தொடர்பிலேயே அவர் கைது செய்யப்பட்டுள்ளார்.

இன்று (02) காலை சுமார் 9.45 மணியளவில் இலஞ்ச ஊழல் விசாரணை ஆணைக்குழுவின் விசாரணை அதிகாரிகளால் அவர் கைது செய்யப்பட்டதாக ஆணைக்குழு தெரிவித்துள்ளது.

குறித்த கதிரைகளைக் கொள்வனவு செய்வதற்கான விலைமனுக் கோரலில், தேவையான தரநிலைகளைப் பூர்த்தி செய்ததுடன் குறைந்த விலையை முன்வைத்த மற்றுமொரு நிறுவனம் இருந்தபோதிலும், குறிப்பிட்ட தனியார் நிறுவனமொன்றிடமிருந்து கதிரைகளைக் கொள்வனவு செய்வதற்கு முன்னாள் அமைச்சின் செயலாளர் ஏற்பாடு செய்ததாகக் குற்றஞ்சாட்டப்பட்டுள்ளது.

இந்தக் கொள்வனவு முறைகேட்டின் காரணமாக அரசாங்கத்திற்கு 7,973,114.50 ரூபா நிதி இழப்பு ஏற்பட்டுள்ளதாகவும், இதன் மூலம் வெளித்தரப்பொன்றுக்கு முறையற்ற அனுகூலம் வழங்கப்பட்டுள்ளதாகவும் இலஞ்ச ஊழல் விசாரணை ஆணைக்குழு தெரிவித்துள்ளது.

இந்தக் கொள்வனவு நடவடிக்கையுடன் தொடர்புடைய ஊழல் குற்றச்சாட்டின் அடிப்படையிலேயே முன்னாள் அமைச்சின் செயலாளர் கைது செய்யப்பட்டுள்ளார்.

கைது செய்யப்பட்ட சந்தேகநபர் கொழும்பு பிரதான நீதவான் நீதிமன்றத்தில் முன்னிலைப்படுத்தப்படவுள்ளார்.