ரத்கம பகுதியில் வெள்ளப் பாதிப்பைக் கட்டுப்படுத்த ரூ.3.38 பில்லியன் திட்டத்திற்கு அமைச்சரவை அனுமதி
ரத்கம நகரில் அடிக்கடி ஏற்படும் வெள்ளப் பாதிப்புகளைக் கட்டுப்படுத்தும் நோக்கில், காணி அபிவிருத்தி மற்றும் வடிகால் கட்டமைப்பை மேம்படுத்துவதற்காக 3,380.22 மில்லியன் ரூபா (ரூ.3.38 பில்லியன்) செலவிலான திட்டத்திற்கு அமைச்சரவை அனுமதி வழங்கியுள்ளது.
2027ஆம் ஆண்டு முதல் 2029ஆம் ஆண்டு வரையான காலப்பகுதியில் நடைமுறைப்படுத்தப்படவுள்ள இத்திட்டத்தை இலங்கை காணி அபிவிருத்திக் கூட்டுத்தாபனம் முன்னெடுக்கவுள்ளது.
தென் மாகாணத்தில் காலி மற்றும் ஹிக்கடுவை நகரங்களுக்கு இடையில் அமைந்துள்ள ரத்கம நகரில் முறையான வடிகால் கட்டமைப்பு இல்லாத காரணத்தினால் அடிக்கடி வெள்ளப் பாதிப்புகள் ஏற்பட்டு வருகின்றன. இதற்குத் தீர்வுகாணும் வகையில் இத்திட்டம் முன்மொழியப்பட்டுள்ளது.
போக்குவரத்து, நெடுஞ்சாலைகள் மற்றும் நகர அபிவிருத்தி அமைச்சரின் முன்மொழிவுக்கு அமைய இந்த அனுமதி வழங்கப்பட்டுள்ளது.
இதன்படி, ரத்கம - தொடந்துவ வீதி மற்றும் விஜேரத்ன வீதி ஆகியவற்றுக்கு இடையில் அமைந்துள்ள கைவிடப்பட்ட 24.5 ஏக்கர் நெல்வயல் காணியில் சுமார் 13 ஏக்கர் நிலப்பரப்பில் நீர்த்தேக்கம் மற்றும் மழைநீரைத் தற்காலிகமாகச் சேமிக்கும் பகுதிகள் உருவாக்கப்படவுள்ளன.
அத்துடன், நீர்நிலைகளின் கரைகளை அபிவிருத்தி செய்தல், பராமரிப்புப் பணிகளுக்கான அணுகல் வீதிகளை அமைத்தல் மற்றும் கீழ்நிலைப் பகுதியில் அமைந்துள்ள சுமார் 1.5 ஏக்கர் காணியில் வடிகால் கட்டமைப்பை மேம்படுத்துதல் உள்ளிட்ட பணிகளும் முன்னெடுக்கப்படவுள்ளன.
இதன் மூலம் மேலதிக மழைநீரை ரத்கம களப்புக்குத் திருப்பி விடுவதற்கான வசதிகள் ஏற்படுத்தப்படுவதுடன், ரத்கம நகரில் தொடர்ச்சியாக ஏற்படும் வெள்ளப் பாதிப்புகளைக் குறைக்கவும் எதிர்பார்க்கப்படுகிறது.
