மின்சாரக் கட்டணம் அதிகரிக்குமா? 4ஆம் காலாண்டுக்கான புதிய திருத்தப்பட்ட விபரங்களை வெளியிட்டது பொதுப் பயன்பாடுகள் ஆணைக்குழு!

2026ஆம் ஆண்டின் நான்காவது காலாண்டில் மின்சாரக் கட்டணத்தை 2.88 சதவீதத்தால் அதிகரிப்பதற்கு முன்மொழியப்பட்டிருந்த நிலையில், அந்த அதிகரிப்பை 1.46 சதவீதமாகக் குறைத்து இலங்கை பொதுப் பயன்பாடுகள் ஆணைக்குழு (PUCSL) புதிய மதிப்பீட்டு விபரங்களை வெளியிட்டுள்ளது.

மின்சாரத் துறையுடன் தொடர்புடைய நிறுவனங்கள் சமர்ப்பித்த செலவின அறிக்கைகளை ஆரம்பகட்டமாக மீளாய்வு செய்த பின்னரே இந்தத் திருத்தம் மேற்கொள்ளப்பட்டுள்ளது.

இதற்கமைய, 2026ஆம் ஆண்டு ஒக்டோபர் முதல் டிசம்பர் வரையான காலப்பகுதியில் மின்சார விநியோகத்திற்கான மொத்தச் செலவு 157.3 பில்லியன் ரூபாவாக மதிப்பிடப்பட்டுள்ளது. அதேவேளை, இக்காலப்பகுதியில் கிடைக்கும் என எதிர்பார்க்கப்படும் வருமானம் 154 பில்லியன் ரூபாவாகும்.

இதன் காரணமாக ஆரம்பத்தில் 4.4 பில்லியன் ரூபா வருமானப் பற்றாக்குறை ஏற்படும் என மதிப்பிடப்பட்டிருந்தது.

எனினும், செலவின அறிக்கைகளை ஆய்வு செய்த பொதுப் பயன்பாடுகள் ஆணைக்குழு, சில செலவினங்களில் திருத்தங்களை மேற்கொள்ள வேண்டியுள்ளதாகத் தெரிவித்துள்ளது.

இதன்படி, மின்சார விநியோகத்தை மேம்படுத்தும் திட்டத்திற்கான கடன் மீள்செலுத்தல் தொடர்பில் Electricity Distribution Lanka (Pvt) Ltd. நிறுவனம் முன்வைத்த 1.1 பில்லியன் ரூபா மேலதிகச் செலவு உள்ளிட்ட சில செலவினங்கள் ஆரம்பகட்ட மதிப்பீட்டிலிருந்து நீக்கப்பட்டுள்ளன.

அத்துடன், மின் உற்பத்தித் திறன் தொடர்பான செலவு அதிகரிப்பும் நீக்கப்பட்டுள்ளதுடன், 2026ஆம் ஆண்டின் இரண்டாவது காலாண்டில் தரமற்ற நிலக்கரியைப் பயன்படுத்தியதால் ஏற்பட்டதாகக் குறிப்பிடப்பட்ட மேலதிகச் செலவும் மீளாய்வு செய்யப்பட்டு திருத்தப்பட்டுள்ளது.

இந்த மாற்றங்களைத் தொடர்ந்து, மின்சாரக் கட்டண அதிகரிப்புக்கான மதிப்பீடு 2.88 சதவீதத்திலிருந்து 1.46 சதவீதமாகக் குறைக்கப்பட்டுள்ளது.

இதேவேளை, முந்தைய காலாண்டுடன் ஒப்பிடுகையில் நிலக்கரியின் விலை கணிசமாக அதிகரித்துள்ளதாகவும் ஆணைக்குழுவின் ஆவணத்தில் சுட்டிக்காட்டப்பட்டுள்ளது.

மேலும், நீர்மின் உற்பத்தி மற்றும் புதுப்பிக்கத்தக்க எரிசக்தி உற்பத்தி குறைவடைவதால், ஒக்டோபர் மற்றும் நவம்பர் மாதங்களுடன் ஒப்பிடுகையில் டிசம்பர் மாதத்திற்கான மின்சார உற்பத்திச் செலவு சுமார் 34 சதவீதத்தால் அதிகரிக்கும் என எதிர்பார்க்கப்படுவதாகவும் தெரிவிக்கப்பட்டுள்ளது.

மின்சாரக் கட்டணத் திருத்தம் தொடர்பான பொதுமக்கள் மற்றும் சம்பந்தப்பட்ட தரப்பினரின் கருத்துக்களைப் பெற்றுக்கொள்வதற்கான பொதுமக்கள் ஆலோசனைக் கூட்டம் எதிர்வரும் நவம்பர் 5ஆம் திகதி கொழும்பு பண்டாரநாயக்க சர்வதேச மாநாட்டு மண்டபத்தில் (BMICH) நடைபெறவுள்ளது.

இந்தக் கருத்துக்களைக் கவனத்தில் கொண்ட பின்னரே மின்சாரக் கட்டணத் திருத்தம் தொடர்பான இறுதி முடிவை பொதுப் பயன்பாடுகள் ஆணைக்குழு அறிவிக்கவுள்ளது.

எனவே, தற்போது முன்மொழியப்பட்டுள்ள 1.46 சதவீத மின்சாரக் கட்டண அதிகரிப்புக்கு இதுவரை இறுதி அனுமதி வழங்கப்படவில்லை என்பது குறிப்பிடத்தக்கது.