மகா பருவத்துக்குத் தேவையான உரம் போதியளவில் கையிருப்பில் – தேசிய உரச் செயலகம் அறிவிப்பு

எதிர்வரும் மகா பருவ நெற்செய்கைக்குத் தேவையான உரங்கள் போதியளவில் நாட்டில் கையிருப்பில் உள்ளதாகவும், அவற்றை விவசாயிகளுக்கு விநியோகிக்கும் நடவடிக்கைகள் ஏற்கனவே ஆரம்பிக்கப்பட்டுள்ளதாகவும் தேசிய உரச் செயலகத்தின் பணிப்பாளர் சந்தன லொகுஹேவகே தெரிவித்துள்ளார்.

மகா பருவத்துக்கு 180,000 மெற்றிக் தொன் யூரியா உரம் தேவைப்படுவதாகக் குறிப்பிட்ட அவர், இதுவரை 33,000 மெற்றிக் தொன் உரம் பிராந்திய மட்டத்தில் விநியோகிக்கப்பட்டுள்ளதாகவும், மேலும் 42,000 மெற்றிக் தொன் உரம் தனியார் நிறுவனங்களின் கையிருப்பில் உள்ளதாகவும் தெரிவித்தார்.

அத்துடன், கடந்த மாத இறுதியில் மூன்று கப்பல்கள் மூலம் உரம் நாட்டை வந்தடைந்துள்ளதுடன், அவற்றிலிருந்து 98,700 மெற்றிக் தொன் யூரியா உரம் தற்போது இறக்கப்பட்டு வருவதாகவும் அவர் குறிப்பிட்டார்.

மேலும், நவம்பர் மற்றும் டிசம்பர் மாதங்களில் 44,000 மெற்றிக் தொன் யூரியா உரம் நாட்டை வந்தடையவுள்ள நிலையில், மொத்தமாக 218,000 மெற்றிக் தொன் யூரியா உரம் நாட்டில் கிடைக்கப்பெறவுள்ளதாகவும் அவர் தெரிவித்தார்.

இதேவேளை, சேற்று உரங்களான இறக்குமதி செய்யப்படும் TSP மற்றும் உள்நாட்டில் உற்பத்தி செய்யப்படும் SSP உரங்களும் போதியளவில் கையிருப்பில் உள்ளன.

இதுவரை 4,396 மெற்றிக் தொன் TSP உரமும், 511 மெற்றிக் தொன் SSP உரமும் விநியோகிக்கப்பட்டுள்ளன. மேலும், நிறுவனங்களிடம் 16,700 மெற்றிக் தொன் TSP உரமும், 5,000 மெற்றிக் தொன் SSP உரமும் கையிருப்பில் உள்ளன.

இதற்கு மேலதிகமாக, 21,000 மெற்றிக் தொன் TSP உரம் மற்றும் 5,000 மெற்றிக் தொன் SSP உரத்தை உற்பத்தி செய்வதற்கான நடவடிக்கைகளும் ஆரம்பிக்கப்பட்டுள்ளன. அத்துடன், நிறுவனங்களிடம் மேலதிகமாக 10,000 மெற்றிக் தொன் SSP உரமும் கையிருப்பில் உள்ளதாகத் தெரிவிக்கப்பட்டுள்ளது.

பொட்டாசியம் குளோரைட் (MOP) உரத்தைப் பொறுத்தவரையில், மகா பருவத்துக்கு 57,000 மெற்றிக் தொன் தேவைப்படும் நிலையில், தற்போது 57,500 மெற்றிக் தொன் நாட்டில் கையிருப்பில் உள்ளது.

இதில் சுமார் 5,000 மெற்றிக் தொன் உரம் ஏற்கனவே விநியோகிக்கப்பட்டுள்ளதுடன், 50,500 மெற்றிக் தொன் உரம் நிறுவனங்களின் கையிருப்பில் உள்ளது. மேலும், 2,000 மெற்றிக் தொன் MOP உரத்தை இறக்குமதி செய்யவும் திட்டமிடப்பட்டுள்ளது.

மகா பருவத்துக்குத் தேவையான அனைத்து வகையான உரங்களையும் விவசாயிகள் விவசாய சேவை நிலையங்கள் மற்றும் வர்த்தக நிலையங்கள் ஊடாகப் பெற்றுக்கொள்ள முடியும் என தேசிய உரச் செயலகத்தின் பணிப்பாளர் தெரிவித்துள்ளார்.