பயங்கரவாத எதிர்ப்புச் சட்டம் மற்றும் ஒழுங்கமைக்கப்பட்ட குற்றத் தடுப்புச் சட்டங்களுக்கு எதிராக பொல்துவ சந்தியில் போராட்டம்

அரசாங்கத்தினால் முன்மொழியப்பட்டுள்ள பயங்கரவாதத்திலிருந்து அரசைப் பாதுகாக்கும் சட்டமூலம் (PSTA) மற்றும் ஒழுங்கமைக்கப்பட்ட குற்றங்களைத் தடுக்கும் சட்டமூலம் ஆகியவற்றுக்கு எதிராக, மக்கள் போராட்ட இயக்கத்தின் ஏற்பாட்டில் இன்று (04) பொல்துவ சந்தியில் போராட்டமொன்று முன்னெடுக்கப்பட்டது.

குறித்த சட்டமூலங்களை அரசாங்கம் உடனடியாகத் திரும்பப் பெற வேண்டும் என வலியுறுத்தி இந்தப் போராட்டம் ஏற்பாடு செய்யப்பட்டுள்ளது.

முன்மொழியப்பட்டுள்ள புதிய சட்டங்கள் ஜனநாயக உரிமைகளுக்கும் பொதுமக்களின் சுதந்திரத்திற்கும் பாதிப்பை ஏற்படுத்தக்கூடும் எனப் போராட்டத்தில் ஈடுபட்டவர்கள் கவலை வெளியிட்டுள்ளனர்.

இதன்போது, PSTA சட்டமூலம் மற்றும் ஒழுங்கமைக்கப்பட்ட குற்றங்களைத் தடுக்கும் சட்டமூலம் ஆகியவற்றை எதிர்த்து வாசகங்கள் எழுதப்பட்ட பதாகைகளையும் சுலோக அட்டைகளையும் போராட்டக்காரர்கள் ஏந்தியிருந்தனர்.

அத்துடன், தற்போது நடைமுறையில் உள்ள பயங்கரவாதத் தடுப்புச் சட்டத்தையும் (PTA) நீக்க வேண்டும் என வலியுறுத்தும் பதாகைகளும் போராட்டத்தில் காட்சிப்படுத்தப்பட்டன.

இதேவேளை, போராட்டத்தை முன்னிட்டு பொல்துவ சந்தி பகுதியில் பொலிஸாரின் பாதுகாப்பு பலப்படுத்தப்பட்டுள்ளதாகத் தெரிவிக்கப்படுகிறது.