நிர்வாகிகள் கைது: தவெக அரசைக் கண்டித்து அக். 24-ல் நாதக மாநிலம் தழுவிய போராட்டம்!
தாராபுரம் தொகுதி வேட்பாளர் மு. கார்த்திகா உள்ளிட்ட நாம் தமிழர் கட்சி நிர்வாகிகள் கைது செய்யப்பட்டதைக் கண்டித்து, வரும் சனிக்கிழமை (அக். 24) அனைத்து மாவட்டத் தலைநகரங்களிலும் மாநிலம் தழுவிய கண்டன ஆர்ப்பாட்டம் நடத்தப்படும் என நாம் தமிழர் கட்சி அறிவித்துள்ளது.
இது தொடர்பாக அக்கட்சி வெளியிட்டுள்ள அறிக்கையில், தாராபுரம் இடைத்தேர்தலில் நாம் தமிழர் கட்சி சார்பில் போட்டியிட்டவரும், கட்சியின் மகளிர் பாசறை மாநில ஒருங்கிணைப்பாளருமான மு. கார்த்திகா, அவரது கணவரும் தகவல் தொழில்நுட்பப் பாசறையின் மாநில ஒருங்கிணைப்பாளருமான முருக. சந்திரகுமார், மாநில ஒருங்கிணைப்பாளர் இசை. மதிவாணன் உள்ளிட்ட கட்சி நிர்வாகிகள் கைது செய்யப்பட்டுள்ளதாகத் தெரிவிக்கப்பட்டுள்ளது.
அரசியல் பழிவாங்கும் நோக்கில் பொய் வழக்குப் பதிவு செய்து, தங்கள் கட்சி நிர்வாகிகளைத் தமிழக வெற்றிக் கழக (தவெக) அரசு கைது செய்து சிறையில் அடைத்துள்ளதாக நாம் தமிழர் கட்சி குற்றஞ்சாட்டியுள்ளது.
இந்தக் கைதுகளையும், அரசின் அடக்குமுறை நடவடிக்கைகளையும் கண்டித்து, கட்சியின் தலைமை ஒருங்கிணைப்பாளர் சீமானின் அறிவுறுத்தலின்படி, வரும் 24ஆம் தேதி சனிக்கிழமை காலை 10 மணியளவில் மாநிலம் முழுவதும் கண்டன ஆர்ப்பாட்டங்கள் நடைபெறவுள்ளதாக அறிக்கையில் குறிப்பிடப்பட்டுள்ளது.
மாநில ஒருங்கிணைப்பாளர்கள் முன்னிலையில் அனைத்து மாவட்டத் தலைநகரங்களிலும் நடைபெறவுள்ள இந்தப் போராட்டங்களில், அந்தந்த மாவட்டங்களுக்கு உட்பட்ட அனைத்து சட்டமன்றத் தொகுதிகளின் மாநில, மண்டல, மாவட்ட மற்றும் கிளை நிர்வாகிகள், அனைத்துப் பாசறைகளின் பொறுப்பாளர்கள் மற்றும் கட்சியினர் பெருந்திரளாகப் பங்கேற்க வேண்டும் என்றும் நாம் தமிழர் கட்சி அழைப்பு விடுத்துள்ளது.
