இந்தியாவில் உலகின் மிகப்பெரிய பசுமை அமோனியா உற்பத்தி நிலையங்களில் ஒன்றாக உருவாகும் புதிய திட்டம்!

இந்தியாவில் இயற்கை எரிவாயுவைப் பயன்படுத்தி இயங்கும் அமோனியா மற்றும் யூரியா உற்பத்தி நிலையமொன்று, புதுப்பிக்கத்தக்க எரிசக்தியைப் பயன்படுத்தும் பசுமை அமோனியா உற்பத்தி நிலையமாக மாற்றப்படவுள்ளது.

இந்தத் திட்டத்தின் மூலம் ஆண்டுக்கு சுமார் 11 இலட்சம் தொன் பசுமை அமோனியாவை உற்பத்தி செய்ய முடியும் என எதிர்பார்க்கப்படுகிறது.

AM Green Ammonia (India) Private Limited நிறுவனத்தினால் முன்னெடுக்கப்படும் இந்தத் திட்டத்துக்கு, ஆசிய அபிவிருத்தி வங்கி (ADB) மற்றும் ஜப்பான் ஆகியன நிதியுதவி வழங்குகின்றன.

இந்த நிலையம் செயற்பாட்டுக்கு வரும்போது, புதுப்பிக்கத்தக்க எரிசக்தியைப் பயன்படுத்தி அமோனியா உற்பத்தி செய்யும் உலகின் மிகப்பெரிய நிலையங்களில் ஒன்றாகத் திகழும் என ஆசிய அபிவிருத்தி வங்கி தெரிவித்துள்ளது. இந்தியாவின் தொழில்துறை உற்பத்தியைச் சுற்றுச்சூழலுக்கு உகந்ததாக மாற்றுவதில் இது முக்கிய முன்னேற்றமாக அமையும் என்றும் எதிர்பார்க்கப்படுகிறது.

இந்த நிதியுதவித் திட்டத்தின் ஒரு பகுதியாக, ஜப்பான் சர்வதேச ஒத்துழைப்பு முகமையின் நிதியுதவியுடன் செயல்படும் Leading Asia’s Private Infrastructure Fund 2 ஊடாக 100 மில்லியன் அமெரிக்க டொலர் கடனுதவி வழங்கப்படவுள்ளது.

அமோனியா உற்பத்தியில் புதைபடிவ எரிபொருட்களுக்குப் பதிலாகப் புதுப்பிக்கத்தக்க எரிசக்தியைப் பயன்படுத்துவது, பசுமை இல்ல வாயு வெளியேற்றத்தைக் கணிசமாகக் குறைப்பதுடன், இத்தொழில்துறையில் மாற்றத்தை ஏற்படுத்தும் என ஆசிய அபிவிருத்தி வங்கியின் தலைவர் மசாடோ கந்தா தெரிவித்துள்ளார்.

புதைபடிவ எரிபொருட்களுக்குப் பதிலாகப் புதுப்பிக்கத்தக்க எரிசக்தியைப் பயன்படுத்துவதன் மூலம், மிகக் குறைந்த அளவிலான மாசு வெளியேற்றத்துடன் அமோனியாவை அதிகளவில் உற்பத்தி செய்ய முடியும் என்றும் அவர் குறிப்பிட்டுள்ளார்.

மேலும், 2026 மே மாதத்தில் ஆசிய அபிவிருத்தி வங்கியும் ஜப்பானும் இணைந்து ஆரம்பித்த Action for Creating Energy Security for Long-term Resilience (ACCEL) திட்டத்தின் கீழ் மேற்கொள்ளப்படும் முதலாவது முதலீடாகவும் இது அமைகிறது.

ஆசிய - பசிபிக் பிராந்திய நாடுகளும் வர்த்தக நிறுவனங்களும் அதிகரித்து வரும் எரிசக்திச் செலவுகளைச் சமாளிப்பதுடன், பல்வகைப்பட்டதும் நிலையானதுமான எரிசக்தி கட்டமைப்புகளை உருவாக்குவதற்கும் இந்த முயற்சி ஆதரவளிப்பதை நோக்கமாகக் கொண்டுள்ளது.

புதுப்பிக்கத்தக்க எரிசக்தியைப் பயன்படுத்தி உற்பத்தி செய்யப்படும் பசுமை அமோனியா, பாரம்பரிய அமோனியாவைவிடக் குறைந்த அளவிலான மாசு வெளியேற்றத்தைக் கொண்ட மாற்றீடாகக் கருதப்படுகிறது. உர உற்பத்தி உள்ளிட்ட பல்வேறு தொழில்துறைகளில் அமோனியா முக்கிய மூலப்பொருளாகப் பயன்படுத்தப்படுகிறது.

இந்தத் திட்டம், புதைபடிவ எரிபொருட்களில் இந்தியா கொண்டுள்ள சார்பைக் குறைப்பதற்கும், தூய்மையான எரிசக்தி சார்ந்த தொழில்துறையை விரிவுபடுத்துவதற்கும் பங்களிக்கும் என எதிர்பார்க்கப்படுகிறது.