தாராபுரம் தொகுதிக்கு ரூ.1,439 கோடியில் கூட்டுக் குடிநீர்த் திட்டம்! – முதல்வர் விஜய் அறிவிப்பு

திருப்பூர் மாவட்டம், தாராபுரம் சட்டமன்றத் தொகுதியின் வளர்ச்சி மற்றும் மேம்பாட்டிற்காக ரூ.1,439 கோடி மதிப்பிலான கூட்டுக் குடிநீர்த் திட்டம் உள்ளிட்ட பல்வேறு புதிய திட்டங்களை முதல்வர் விஜய் அறிவித்துள்ளார்.

இதுதொடர்பாக அரசு வெளியிட்டுள்ள அறிக்கையில் தெரிவிக்கப்பட்டுள்ளதாவது:

ரூ.1,439 கோடியில் கூட்டுக் குடிநீர்த் திட்டம்

திருப்பூர் மாவட்டத்தில் மொத்தமுள்ள 2,455 ஊரகக் குடியிருப்புகளில், 1,223 குடியிருப்புகளுக்கு ஏற்கனவே காவிரி கூட்டுக் குடிநீர் வழங்கப்பட்டு வருகிறது. மீதமுள்ள 1,232 ஊரகக் குடியிருப்புகளுக்குக் காவிரி ஆற்றை நீர் ஆதாரமாகக் கொண்டு ரூ.1,439 கோடி மதிப்பீட்டில் புதிய கூட்டுக் குடிநீர்த் திட்டம் செயல்படுத்தப்படும்.

இந்தத் திட்டம் தாராபுரம், காங்கேயம், குண்டடம், பொங்கலூர், வெள்ளக்கோவில் ஊராட்சி ஒன்றியங்கள் மற்றும் மூலனூர், பல்லடம் பகுதிகளைச் சேர்ந்த ஊராட்சிகளுக்குப் பயனளிக்கும்.

2,700 பேருக்கு இலவச வீட்டுமனைப் பட்டா

தாராபுரம் சட்டமன்றத் தொகுதியில் வீடற்றவர்களுக்கு 2,700 இலவச வீட்டுமனைப் பட்டாக்கள் வழங்கப்படும் என அறிவிக்கப்பட்டுள்ளது.

மேலும், தாராபுரம் வட்டம், சின்னபுத்தூர் கிராமம், மஜரா குருவப்ப நாயக்கன் பாளையத்தில் கடந்த 20 ஆண்டுகளாக வீடுகள் கட்டி வசித்து வரும் சுமார் 87 குடும்பங்களுக்கு வீட்டுமனைப் பட்டா வழங்குவதற்கான நடவடிக்கைகள் மேற்கொள்ளப்படும்.

271 கி.மீ. நீளத்திற்குப் பாசனக் கால்வாய்கள் தூர்வாரப்படும்

திருப்பூர் மாவட்டத்தில் பாசனக் கால்வாய்களில் உள்ள மண்திட்டுகளை அகற்றித் தூர்வாரும் 159 பணிகள் சுமார் ரூ.10 கோடி மதிப்பீட்டில் மேற்கொள்ளப்படும்.

குறிப்பாக, தாராபுரம் சட்டமன்றத் தொகுதியில் சுமார் 271 கிலோமீட்டர் நீளத்திலான பாசன வாய்க்கால்கள் மற்றும் கால்வாய்களில் உள்ள மண்திட்டுகள், புதர்கள், முட்செடிகள் ஆகியவற்றை அகற்றித் தூர்வாரும் பணிகள் விரைவில் தொடங்கப்படும்.

13,000 குடிநீர் இணைப்புகள் வழங்க நடவடிக்கை

தாராபுரம், மூலனூர் மற்றும் குண்டடம் பகுதிகளில் புதிய மேல்நிலை நீர்த்தேக்கத் தொட்டிகள் அமைத்து, சுமார் 13,000 குடிநீர் இணைப்புகள் வழங்கப்படும்.

மேலும், தாராபுரம் வட்டம், மூலனூரில் புதிய தீயணைப்பு மற்றும் மீட்புப் பணிகள் நிலையம் அமைக்கப்படும் என்றும் அறிவிக்கப்பட்டுள்ளது.

தாராபுரம் நகராட்சிக்கு பல்வேறு மேம்பாட்டுத் திட்டங்கள்

தாராபுரம் நகராட்சியில் குடிநீர் வசதிகளை மேம்படுத்துவதற்காக சுமார் ரூ.6 கோடி மதிப்பீட்டில் மேல்நிலை நீர்த்தேக்கத் தொட்டி அமைத்தல் உள்ளிட்ட பணிகள் மேற்கொள்ளப்படும்.

இதுதவிர, சுமார் ரூ.40 லட்சம் செலவில் தெருவிளக்குகள் அமைக்கவும், சுமார் ரூ.6 கோடி மதிப்பீட்டில் திடக்கழிவு மேலாண்மைப் பணிகளை மேற்கொள்ளவும் திட்டமிடப்பட்டுள்ளது. மழைநீர் வடிகால் வசதிகளை மேம்படுத்தும் பணிகளும் முன்னெடுக்கப்படும்.

தாராபுரம் சட்டமன்றத் தொகுதியில் அறிவிக்கப்பட்டுள்ள இத்திட்டங்களை விரைந்து செயல்படுத்துவதற்குச் சம்பந்தப்பட்ட துறைகளுக்கு அறிவுறுத்தப்பட்டுள்ளதாக அரசின் அறிக்கையில் தெரிவிக்கப்பட்டுள்ளது.