நடிகர் டைகர் ஷெராப் கார் மீது துப்பாக்கிச் சூடு – நேபாளத்துக்குத் தப்பிச் செல்ல முயன்ற மூவர் கைது!

பாலிவுட் நடிகர் டைகர் ஷெராபின் கார் மீது துப்பாக்கிச் சூடு நடத்தியதாகக் குற்றம் சாட்டப்பட்ட மூன்று பேர், நேபாளத்துக்குத் தப்பிச் செல்ல முயன்றபோது ராஜஸ்தான் மாநிலத்தின் கோட்டா நகரில் காவல்துறையினரால் கைது செய்யப்பட்டுள்ளனர்.

குறித்த மூவரையும் வெறும் 15 நிமிடங்களுக்குள் கைது செய்ததாகக் கோட்டா மாவட்டக் காவல் கண்காணிப்பாளர் தேஜஸ்வினி கவுதம் தெரிவித்துள்ளார்.

பாலிவுட் நடிகர் டைகர் ஷெராபின் கார் மீது நேற்று திடீரென துப்பாக்கிச் சூடு நடத்தப்பட்டது. தாக்குதலை நடத்தியவர்கள் சம்பவ இடத்திலிருந்து தப்பிச் சென்ற நிலையில், இதுதொடர்பாக வழக்குப் பதிவு செய்த மும்பை காவல்துறையினர் விசாரணைகளை முன்னெடுத்து வந்தனர்.

இந்நிலையில், சந்தேகநபர்கள் ராஜஸ்தான் மாநிலத்தின் கோட்டா வழியாகத் தப்பிச் செல்ல முயற்சிப்பதாக மும்பை காவல்துறைக்குத் தகவல் கிடைத்தது. இதையடுத்து, கோட்டா காவல்துறையினருக்கு உடனடியாகத் தகவல் வழங்கப்பட்டது.

இதன்படி, புனே – ஜெய்ப்பூர் விரைவு ரயிலில் பயணித்த சந்தேகநபர்களைக் கைது செய்வதற்காக, இன்று காலை 10 மணியளவில் கோட்டா ரயில் நிலையத்தில் காவல்துறையினர் விசேட சோதனை நடவடிக்கையை மேற்கொண்டனர். ரயிலின் பொதுப் பெட்டியில் பயணித்த மூவரையும் சுமார் 15 நிமிடங்களுக்குள் காவல்துறையினர் கைது செய்தனர்.

நேபாளத்துக்குத் தப்பிச் செல்லத் திட்டம்

கைது செய்யப்பட்ட மூவரும் முதலில் ஜெய்ப்பூருக்கும், அங்கிருந்து டெல்லிக்கும் சென்று, பின்னர் நேபாளத்துக்குத் தப்பிச் செல்லத் திட்டமிட்டிருந்ததாகக் காவல்துறையினர் தெரிவித்துள்ளனர். எனினும், அவர்களின் திட்டம் நிறைவேறுவதற்கு முன்னரே அவர்கள் கைது செய்யப்பட்டனர்.

கைது செய்யப்பட்ட சந்தேகநபர்கள் மும்பை காவல்துறையினரிடம் ஒப்படைக்கப்படுவார்கள் எனக் கோட்டா மாவட்டக் காவல் கண்காணிப்பாளர் தேஜஸ்வினி கவுதம் தெரிவித்துள்ளார்.

லாரன்ஸ் பிஷ்னோய் கும்பலுடன் தொடர்பு?

இந்தத் தாக்குதலில் கைது செய்யப்பட்ட மூவரும், சர்வதேச அளவில் தேடப்படும் குற்றவாளியான லாரன்ஸ் பிஷ்னோய் தலைமையிலான கும்பலுடன் தொடர்புடைய அனில் பண்டிட் என்பவரால் பணியமர்த்தப்பட்டதாகத் தகவல்கள் வெளியாகியுள்ளன.

கைது செய்யப்பட்டவர்களில் ஹரியானா மாநிலத்தைச் சேர்ந்த ரேஹான் என்ற சுக்கா மற்றும் பிஹார் மாநிலத்தைச் சேர்ந்த ஹிருத்திக் குர்மி ஆகியோர் அடங்குவதாகத் தெரிவிக்கப்பட்டுள்ளது. மூன்றாவது நபர் சிறுவர் எனக் கூறப்படுகிறது. ஹிருத்திக் குர்மி நீண்டகாலமாக மும்பையில் வசித்து வந்தவர் என்றும் தகவல்கள் தெரிவிக்கின்றன.

இவர்களில் இருவர் டைகர் ஷெராபின் கார் மீது துப்பாக்கிச் சூடு நடத்தியதாகச் சந்தேகிக்கப்படுகின்றனர். நடிகர் மீது தாக்குதல் நடத்துவதற்கான ஒப்பந்தத்தை அனில் பண்டிட், ரேஹானுக்கு வழங்கியதாகவும், அதன் பின்னர் ரேஹான் ஏனைய இருவரையும் இந்தத் தாக்குதலுக்காகப் பணியமர்த்தியதாகவும் விசாரணைத் தகவல்கள் தெரிவிக்கின்றன.

மும்பைக்கு அழைத்துச் செல்ல நடவடிக்கை

கைது செய்யப்பட்ட மூவரையும் மும்பை குற்றப்பிரிவு காவல்துறையினர் தமது பொறுப்பில் எடுத்துள்ளனர். கோட்டா நீதிமன்றத்தில் ஆஜர்ப்படுத்தப்பட்ட பின்னர், அவர்களை மும்பைக்கு அழைத்துச் சென்று மேலதிக விசாரணைகளை முன்னெடுக்கத் திட்டமிடப்பட்டுள்ளதாகத் தெரிவிக்கப்படுகிறது.

இந்தத் தாக்குதலின் பின்னணி, அதற்கான உத்தரவை வழங்கியதாகக் கூறப்படும் நபரின் தொடர்புகள் மற்றும் சம்பவத்தில் வேறு யாருக்காவது தொடர்புள்ளதா என்பது குறித்து மும்பை காவல்துறையினர் தொடர்ந்து விசாரணை நடத்தி வருகின்றனர்.