தாய் நோயிலிருந்து குணமடைந்ததால் நேர்த்திக்கடன்: 12 ஜோதிர்லிங்கத் தலங்களுக்கும் ஓடிச் செல்லும் பிஹார் இளைஞர்!

பிஹார் மாநிலத்தைச் சேர்ந்த 19 வயது இளைஞர் ஒருவர், தனது தாய் கடுமையான நோயிலிருந்து குணமடைந்ததைத் தொடர்ந்து, இந்தியா முழுவதும் உள்ள 12 ஜோதிர்லிங்கத் தலங்களுக்கும் ஓடிச் சென்று தரிசனம் செய்யும் ஆன்மிகப் பயணத்தை மேற்கொண்டு வருகிறார்.

பிஹார் மாநிலம், அராரியா மாவட்டத்தைச் சேர்ந்த மோனு மேதுர்பாலா என்ற இளைஞரே இவ்வாறு தனது நேர்த்திக்கடனை நிறைவேற்றி வருகிறார்.

தனது தாய் கடுமையான நோயால் பாதிக்கப்பட்டிருந்தபோது, அவர் குணமடைந்தால் இந்தியாவில் உள்ள 12 ஜோதிர்லிங்கத் தலங்களுக்கும் ஓடிச் சென்று தரிசனம் செய்வதாக மோனு வேண்டிக்கொண்டுள்ளார். அவரது தாய் நோயிலிருந்து குணமடைந்ததைத் தொடர்ந்து, தனது வேண்டுதலை நிறைவேற்றும் நோக்கில் இந்தப் பயணத்தைத் தொடங்கியுள்ளார்.

கடந்த மார்ச் 15ஆம் திகதி தனது ஆன்மிகப் பயணத்தை ஆரம்பித்த மோனு, நாளொன்றுக்கு சுமார் 50 கிலோமீற்றர் தூரம் ஓடிச் செல்வதாகத் தெரிவிக்கப்படுகிறது. இதுவரை சுமார் 8,000 கிலோமீற்றர் தூரத்தைக் கடந்துள்ள அவர், தனது இலக்கை நோக்கித் தொடர்ந்து பயணித்து வருகிறார்.

மோனுவின் இந்த வித்தியாசமான ஆன்மிகப் பயணம் தொடர்பான காணொளிகள் சமூக வலைத்தளங்களில் அதிக கவனத்தைப் பெற்றுள்ளன. அவற்றில் வெளியாகியுள்ள ஒரு காணொளியில், அவரது பயணத்தைக் கவனித்த பொலிஸார் அவரை இடைநிறுத்தி, பயணத்தின் நோக்கம் குறித்து ஆர்வத்துடன் விசாரிக்கும் காட்சிகளும் இடம்பெற்றுள்ளன.

நாட்டின் பல்வேறு பகுதிகள் வழியாக அவர் பயணிக்கும் போது, பலர் அவரைச் சந்தித்து வாழ்த்துத் தெரிவித்து வருகின்றனர். சிலர் அவரது கால்களைத் தொட்டு வணங்குவதுடன், பலரும் அவரது முயற்சியைப் பாராட்டி ஊக்கமளித்து வருகின்றனர்.

தாயின் மீதான அன்பையும், தனது வேண்டுதலை நிறைவேற்றுவதில் அவர் காட்டும் அர்ப்பணிப்பையும் பலரும் பாராட்டி வருகின்றனர். குறிப்பாக, ராமாயணத்தில் பெற்றோர் மீதான பக்திக்காகப் போற்றப்படும் ஸ்ரவண குமாருடன் மோனுவை ஒப்பிட்டு, சமூக வலைத்தளங்களில் பலர் பாராட்டுகளைத் தெரிவித்து வருகின்றனர்.

தாயின் நலனுக்காக மேற்கொண்ட வேண்டுதலை நிறைவேற்ற ஆயிரக்கணக்கான கிலோமீற்றர் தூரம் ஓடிச் செல்லும் இந்த இளைஞரின் பயணம், தற்போது சமூக வலைத்தளங்களில் பேசுபொருளாகியுள்ளது.