தென்னாப்பிரிக்காவில் இடம்பெற்ற துப்பாக்கிச்சூடு: பலி எண்ணிக்கை 28 ஆக உயர்வு

தென்னாப்பிரிக்காவில் கடந்த வார இறுதியில் இடம்பெற்ற இரு வேறு துப்பாக்கிச்சூட்டுச் சம்பவங்களில் படுகாயமடைந்திருந்த மேலும் ஒருவர் மருத்துவமனையில் சிகிச்சைப் பலனின்றி உயிரிழந்ததை அடுத்து, உயிரிழந்தோரின் மொத்த எண்ணிக்கை 28 ஆக அதிகரித்துள்ளதாக அந்நாட்டு அதிகாரிகள் திங்கட்கிழமை அறிவித்துள்ளனர்.

தென்னாப்பிரிக்கா நீண்டகாலமாகவே வன்முறைக் குற்றச் செயல்களால் பாதிக்கப்பட்டு வரும் ஒரு நாடாகும். இருப்பினும், உலகிலேயே அதிக கொலை விகிதங்களைக் கொண்ட நாடுகளில் ஒன்றாகக் கருதப்படும் தென்னாப்பிரிக்காவையே சனிக்கிழமை இரவு இடம்பெற்ற இந்தத் துப்பாக்கிச்சூட்டுச் சம்பவங்கள் பெரும் அதிர்ச்சிக்குள்ளாக்கியுள்ளன.

ஜொஹானஸ்பேர்க் நகருக்கு அருகில் உள்ள வெடேலா குடியிருப்புப் பகுதியில் இடம்பெற்ற முதல் தாக்குதலில் படுகாயமடைந்து மருத்துவமனையில் அனுமதிக்கப்பட்டிருந்த ஒருவரே தற்போது உயிரிழந்துள்ளார். இதன் மூலம் அப்பகுதியில் இடம்பெற்ற தாக்குதலில் உயிரிழந்தோரின் எண்ணிக்கை 18 ஆக உயர்ந்துள்ளதாக காவல்துறை விடுத்துள்ள அறிக்கையில் தெரிவிக்கப்பட்டுள்ளது.

சனிக்கிழமை இரவு ஏகே-47 (AK-47) ரக துப்பாக்கிகளுடன் வந்த ஆயுததாரிகள், மதுபானச்சாலை ஒன்றிற்குள் அத்துமீறி நுழைந்து இந்தத் தாக்குதலை நடத்தியுள்ளனர். முதலில் மதுபானச்சாலையின் வெளியில் இருந்தவர்கள் மீது சரமாரியாகத் துப்பாக்கிச்சூடு நடத்திய துப்பாக்கிதாரிகள், பின்னர் உட்பகுதிக்குச் சென்று அங்கிருந்தவர்கள் மீதும் தாக்குதலைத் தொடர்ந்துள்ளனர்.

தாக்குதலின் போது, அங்கிருந்த சிலரின் கைப்பேசிகளையும் பறிமுதல் செய்த துப்பாக்கிதாரிகள், இரு வாகனங்களில் தப்பிச் சென்றுள்ளனர். மேலும், தாக்குதல் இடம்பெற்ற போது மதுபானச்சாலையின் வெளியில் நிறுத்தப்பட்டிருந்த இரு வாகனங்களுக்கும் தீ வைக்கப்பட்டுள்ளது.

இரண்டாவது தாக்குதல்

இச்சம்பவம் இடம்பெற்று சுமார் நான்கு மணித்தியாலங்களின் பின்னர், தென்னாப்பிரிக்காவின் இரண்டாவது பெரிய நகரமான கேப் டவுன் நகருக்கு அருகில் உள்ள எல்வாண்ட்லே குடியிருப்புப் பகுதியில் உள்ள கடை ஒன்றில் மற்றொரு துப்பாக்கிச்சூடு இடம்பெற்றது. பொழுதுபோக்கு மையம் ஒன்றுடன் தொடர்புடைய அப்பகுதியில் நடத்தப்பட்ட தாக்குதலில் 10 பேர் உயிரிழந்ததுடன் 11 பேர் காயமடைந்தனர். இத்தாக்குதலுடன் தொடர்புடைய சந்தேக நபர்களைக் காவல்துறை தேடி வருகின்ற போதிலும், அவர்களின் துல்லியமான எண்ணிக்கை இதுவரை வெளியிடப்படவில்லை.

வெடேலா தாக்குதலில் உயிரிழந்தவர்களில் இருவர் தென்னாப்பிரிக்காவைச் சேர்ந்தவர்கள் என்றும், இருவர் லெசோத்தோ நாட்டைச் சேர்ந்தவர்கள் என்றும் அடையாளம் காணப்பட்டுள்ளனர். இதுவரை உயிரிழந்தவர்களில் இந்த நால்வரின் அடையாளங்கள் மட்டுமே உத்தியோகபூர்வமாக உறுதிப்படுத்தப்பட்டுள்ளன.

மருத்துவமனையில் தீவிர சிகிச்சைப் பிரிவில் அனுமதிக்கப்பட்டுள்ள காயமடைந்தவர்கள் அனைவரும் அடையாளம் காணப்பட்டுள்ளதாகத் தெரிவித்துள்ள காவல்துறையினர், அவர்களில் ஐவர் மேல் உடலில் துப்பாக்கிச்சூட்டுக் காயங்களுக்கு உள்ளாகி கவலைக்கிடமான நிலையில் உள்ளதாகவும், ஏனையோரின் நிலைமை சீராக உள்ளதாகவும் குறிப்பிட்டுள்ளனர்.

தற்போது காவல்துறை புலனாய்வாளர்கள் மற்றும் தென்னாப்பிரிக்க பாதுகாப்புப் படையினர் இணைந்த குழுவினர் இது தொடர்பில் தீவிர விசாரணைகளை மேற்கொண்டு வருகின்றனர். எனினும், இதுவரை எவரும் கைது செய்யப்படவில்லை என்பது குறிப்பிடத்தக்கது.