கைது செய்யப்பட்ட சிரந்தி ராஜபக்ஷ நீதிமன்றில் முன்னிலை
முன்னாள் முதல் பெண்மணியான சிரந்தி ராஜபக்ஷ, லஞ்ச அல்லது ஊழல் பற்றிய குற்றச்சாட்டுகளைப் புலனாய்வு செய்வதற்கான ஆணைக்குழுவின் (CIABOC) அதிகாரிகளால் இன்று (07) காலை கைது செய்யப்பட்டதை அடுத்து, கொழும்பு பிரதம நீதவான் நீதிமன்றில் முன்னிலைப்படுத்தப்பட்டுள்ளார்.
'சிறிலிய சவிய' அமைப்பினூடாக முன்னெடுக்கப்பட்டதாகக் கூறப்படும் நிதிமுறைகேடு தொடர்பில் மேற்கொள்ளப்பட்டு வரும் விசாரணைகளுக்கு அமைவாகவே இந்நடவடிக்கை எடுக்கப்பட்டுள்ளது.
கொழும்பு லேடி ரிட்ஜ்வே சிறார்கள் வைத்தியசாலைக்கு (Ridgeway Arya Children’s Hospital) சி.டி. ஸ்கேனர் (CT Scanner) சாதனமொன்றைக் கொள்வனவு செய்து வழங்குவதற்காக, தேசிய சேமிப்பு வங்கியிடமிருந்து (NSB) 'சிறிலிய சவிய' அமைப்பின் மூலம் 10 மில்லியன் ரூபா பெறப்பட்டதாகக் குற்றஞ்சாட்டப்பட்டுள்ளது.
இருப்பினும், குறித்த நோக்கத்திற்காக நிதி பெறப்பட்ட போதிலும், அந்த சி.டி. ஸ்கேனர் (CT Scanner) வைத்தியசாலைக்கு வழங்கப்படாது, அரசாங்கத்திற்குச் சொந்தமான அந்நிதி முறைகேடாகப் பயன்படுத்தப்பட்டுள்ளதாகப் புலனாய்வாளர்கள் சுட்டிக்காட்டியுள்ளனர்.
முன்னாள் ஜனாதிபதி மஹிந்த ராஜபக்ஷவின் மனைவியான சிரந்தி ராஜபக்ஷ மீது, பொதுச் சொத்துச் சட்டத்தின் கீழ் குற்றவியல் துஷ்பிரயோகம் மற்றும் ஊழல் குற்றச்சாட்டுகள் சுமத்தப்பட்டுள்ளன.
இன்று காலை லஞ்ச ஊழல் புலனாய்வு ஆணைக்குழுவின் அதிகாரிகளால் கைது செய்யப்பட்ட அவர், வாக்குமூலம் பெறப்பட்டதைத் தொடர்ந்து நீதிமன்றத்தில் ஆஜர்படுத்தப்பட்டுள்ளார்.
