காலா ஓயா நீர்மட்டம் உயர்வு: நான்கு பிரதேசங்களுக்கு வெள்ள அபாய எச்சரிக்கை!

காலா ஓயா ஆற்றுப் படுகையில் நீர்மட்டம் வெள்ள அபாய மட்டத்தை அண்மித்துள்ள நிலையில், நான்கு பிரதேசங்களுக்கு நீர்ப்பாசனத் திணைக்களம் அம்பர் நிற வெள்ள அபாய எச்சரிக்கையை விடுத்துள்ளது.

இந்த எச்சரிக்கை நாளை (23) காலை 11.00 மணி வரை அமுலில் இருக்கும் எனத் தெரிவிக்கப்பட்டுள்ளது.

காலா ஓயா ஆற்றின் மேல் மற்றும் மத்திய நீரேந்துப் பகுதிகளில் பெய்த கடும் மழை காரணமாக, ஆற்றின் நீர்மட்டம் அதிகரித்துள்ளதுடன், தாழ்நிலப் பகுதிகளில் வெள்ளப்பெருக்கு ஏற்படும் அபாயமும் அதிகரித்துள்ளது.

இதற்கிடையில், ராஜாங்கனை நீர்த்தேக்கத்தின் வான் கதவுகள் திறக்கப்பட்டுள்ளதுடன், விநாடிக்கு 13,200 கன அடிக்கும் அதிகமான நீர் காலா ஓயா ஆற்றில் திறந்துவிடப்பட்டு வருகிறது.

நீர்த்தேக்கத்துக்கு வரும் நீரின் அளவைப் பொறுத்து, எதிர்வரும் மணித்தியாலங்களில் வெளியேற்றப்படும் நீரின் அளவு மேலும் அதிகரிக்கக்கூடும் என நீர்ப்பாசனத் திணைக்களம் எச்சரித்துள்ளது.

இதன் காரணமாக, ராஜாங்கனை, நோச்சியாகம, வனாத்தவில்லுவ மற்றும் கருவலகஸ்வெவ ஆகிய பிரதேச செயலாளர் பிரிவுகளுக்கு உட்பட்ட காலா ஓயா ஆற்றுப் பள்ளத்தாக்கு மற்றும் அதனைச் சூழவுள்ள தாழ்நிலப் பகுதிகளுக்கு வெள்ள அபாய எச்சரிக்கை விடுக்கப்பட்டுள்ளது.

குறித்த பகுதிகளில் வசிக்கும் பொதுமக்கள், அப்பகுதிகள் ஊடாகப் பயணிக்கும் வாகன சாரதிகள் மற்றும் பயணிகள் மிகுந்த அவதானத்துடன் செயற்படுமாறு அறிவுறுத்தப்பட்டுள்ளனர்.

மேலும், ஏற்படக்கூடிய வெள்ள அனர்த்த நிலைமையை எதிர்கொள்வதற்குத் தேவையான முன்னெச்சரிக்கை நடவடிக்கைகளை மேற்கொள்ளுமாறு அனர்த்த முகாமைத்துவ அதிகாரிகளிடமும் நீர்ப்பாசனத் திணைக்களம் கோரிக்கை விடுத்துள்ளது.