ஞானசார தேரர் நாளை நீதிமன்றத்தில் ஆஜர்படுத்தப்படமாட்டார் – பௌத்த விவகார அமைச்சு அறிவிப்பு

பொதுபல சேனா அமைப்பின் பொதுச் செயலாளர் கலகொட அத்தே ஞானசார தேரர், நாளை (ஒக்டோபர் 23) நீதிமன்றத்தில் ஆஜர்படுத்தப்படமாட்டார் என பௌத்த விவகார அமைச்சு அறிவித்துள்ளது.

ஞானசார தேரரை நாளை நீதிமன்றத்தில் ஆஜர்படுத்த வேண்டிய அவசியமில்லை என நீதிமன்றம் அறிவித்துள்ளதைத் தொடர்ந்து இந்தத் தீர்மானம் எடுக்கப்பட்டுள்ளதாக அமைச்சு தெரிவித்துள்ளது.

கோட்டே ஸ்ரீ கல்யாணி சாமக்ரி தர்ம மகா சங்க சபைக்கு பௌத்த விவகார அமைச்சு இந்தத் தகவலை அறிவித்துள்ளது.

சிறைச்சாலை வழிகாட்டுதல்களில் மேற்கொள்ளப்பட்ட திருத்தங்களைத் தொடர்ந்து, ஞானசார தேரர் நாளை காவி உடையில் நீதிமன்றத்தில் ஆஜர்படுத்தப்படுவார் என முன்னதாக செய்திகள் வெளியாகியிருந்தன.

எனினும், நீதிமன்றத்தின் அறிவிப்புக்கு அமைய அவர் நாளை ஆஜர்படுத்தப்படமாட்டார் என கோட்டே ஸ்ரீ கல்யாணி சாமக்ரி தர்ம மகா சங்க சபையின் அனுநாயக்கர் பேராசிரியர் வணக்கத்திற்குரிய கொட்டபிட்டியே ராகுல தேரர் உறுதிப்படுத்தியுள்ளார்.

இது தொடர்பாக, கோட்டே ஸ்ரீ கல்யாணி சாமக்ரி தர்ம மகா சங்க சபையின் மகாநாயக்கர் வணக்கத்திற்குரிய கலாநிதி இத்தபானே தம்மாலங்கார தேரருக்கு பௌத்த விவகார அமைச்சு அறிவித்துள்ளதாகவும் அவர் தெரிவித்துள்ளார்.

நீதிமன்றத்தில் ஞானசார தேரரை ஆஜர்படுத்த வேண்டிய அவசியமில்லை என நீதிமன்றத்திலிருந்து அறிவிக்கப்பட்டதைத் தொடர்ந்து, மகாநாயக்க தேரருக்கு இந்த விடயம் அறிவிக்கப்பட்டதாக பௌத்த விவகார பிரதி அமைச்சர் கமகெதர திஸாநாயக்க தெரிவித்துள்ளார்.