2027 முதல் வாகனங்களுக்கு 3 மாதங்களுக்கு ஒருமுறை தகுதிப் பரிசோதனை?
இலங்கையில் தற்போது நடைமுறையில் உள்ள வாகனப் புகை வெளியேற்றப் பரிசோதனைக்கு மேலதிகமாக, வாகனங்களின் வீதிப் பயணத் தகுதியை உறுதிப்படுத்தும் புதிய பரிசோதனை முறையை 2027ஆம் ஆண்டின் ஆரம்பத்தில் அறிமுகப்படுத்த மோட்டார் போக்குவரத்துத் திணைக்களம் திட்டமிட்டுள்ளது.
மோட்டார் போக்குவரத்து ஆணையாளர் நாயகம், ஓய்வுபெற்ற எயார் மார்ஷல் துஷார பெர்னாண்டோ இதனைத் தெரிவித்துள்ளார்.
இந்தப் புதிய திட்டம் தொடர்பான கலந்துரையாடல்கள் தற்போது இடம்பெற்று வருவதுடன், சட்டப் பிரிவின் பரிசீலனைக்கும் அது அனுப்பி வைக்கப்பட்டுள்ளதாக அவர் குறிப்பிட்டுள்ளார்.
போக்குவரத்து அமைச்சரின் வழிகாட்டுதலின் கீழ், வாகனப் பாதுகாப்பை மேம்படுத்தும் நோக்கில் இந்தத் திட்டம் முன்னெடுக்கப்படுவதாகவும் அவர் தெரிவித்துள்ளார்.
இதன்படி, வாகன உரிமையாளர்கள் தற்போது பெற்றுக்கொள்ளும் புகை வெளியேற்றப் பரிசோதனைச் சான்றிதழுக்கு மேலதிகமாக, அங்கீகரிக்கப்பட்ட வாகனப் பரிசோதனை நிலையத்திலிருந்து வாகனத்தின் வீதிப் பயணத் தகுதிக்கான சான்றிதழையும் பெற்றுக்கொள்ள வேண்டிய நிலை ஏற்படலாம்.
இந்தப் பரிசோதனையை ஒவ்வொரு 5,000 கிலோமீற்றர் பயணத்திற்குப் பின்னரோ அல்லது மூன்று மாதங்களுக்கு ஒருமுறையோ மேற்கொள்ள வேண்டும் என்ற முன்மொழிவைத் திணைக்களம் பரிசீலித்து வருகிறது.
இந்தப் பரிசோதனைகளை முன்னெடுக்க விரும்பும் வாகனப் பராமரிப்புப் பணிமனைகளிடமிருந்து விண்ணப்பங்களும் கோரப்பட்டுள்ளன. திணைக்களத்தினால் நிர்ணயிக்கப்படும் நிபந்தனைகளின் அடிப்படையில் பொருத்தமான பணிமனைகள் தெரிவு செய்யப்படவுள்ளன.
இதேவேளை, இந்தப் புதிய நடைமுறை அனைத்து வாகனங்களுக்கும் கட்டாயமாக்கப்படுமா அல்லது பயணிகள் போக்குவரத்து மற்றும் வர்த்தக நடவடிக்கைகளுக்குப் பயன்படுத்தப்படும் வாகனங்களுக்கு மாத்திரம் நடைமுறைப்படுத்தப்படுமா என்பது தொடர்பில் இதுவரை தெளிவான அறிவிப்பு வெளியிடப்படவில்லை.
அக்குறணையில் அண்மையில் இடம்பெற்ற உயிரிழப்புகளை ஏற்படுத்திய வீதி விபத்தையும் ஆணையாளர் நாயகம் இதன்போது சுட்டிக்காட்டியுள்ளார். மலைப்பாதையில் பயணித்த சிமெந்து ஏற்றிச் சென்ற கனரக வாகனத்தின் பிரேக் செயலிழந்ததாகக் கூறப்படும் நிலையில், அந்த வாகனம் ஏனைய வாகனங்கள் மீது மோதியிருந்தது.
இவ்வாறான விபத்துகளைத் தடுப்பதற்கும், வாகனங்களின் பாதுகாப்பை உறுதிப்படுத்துவதற்கும் புதிய பரிசோதனை முறை உதவும் என எதிர்பார்க்கப்படுகிறது.
எனினும், இந்தத் திட்டம் இன்னும் கலந்துரையாடல் மற்றும் சட்டப் பரிசீலனை நிலையிலேயே உள்ளதாகவும், 2027ஆம் ஆண்டின் ஆரம்பத்தில் இதனை நடைமுறைப்படுத்த இலக்கு நிர்ணயிக்கப்பட்டுள்ளதாகவும் தெரிவிக்கப்பட்டுள்ளது.
புதிய நடைமுறையின் இறுதி விதிமுறைகள், பரிசோதனைக்கான தேவைகள் மற்றும் நடைமுறைப்படுத்தப்படும் விதம் தொடர்பான மேலதிக விபரங்கள் இதுவரை அறிவிக்கப்படவில்லை.
