இலங்கையின் பயங்கரவாதத் தடுப்புச் சட்டங்களுக்கு எதிராக பிரித்தானிய நாடாளுமன்றம் முன்பாக ஆர்ப்பாட்டம்!
இலங்கையில் நடைமுறையில் உள்ள பயங்கரவாதத் தடுப்புச் சட்டத்தை நீக்குமாறும், தேசிய மக்கள் சக்தி அரசாங்கத்தினால் முன்மொழியப்பட்டுள்ள புதிய சட்டங்களைத் திரும்பப் பெறுமாறும் கோரி, இலங்கையர்களின் குழுவொன்று பிரித்தானிய நாடாளுமன்றத்திற்கு முன்பாக ஆர்ப்பாட்டத்தில் ஈடுபட்டுள்ளது.
கடந்த ஞாயிற்றுக்கிழமை (நவம்பர் 1) லண்டனின் வெஸ்ட்மின்ஸ்டர் பகுதியில் அமைந்துள்ள நாடாளுமன்ற சதுக்கத்தில் இந்தப் போராட்டம் முன்னெடுக்கப்பட்டது.
இலங்கை மக்கள் போராட்ட இயக்கத்தின் பிரித்தானியக் கிளையும், சமூக நீதிக்கான மக்கள் இயக்கமும் இணைந்து இந்த ஆர்ப்பாட்டத்தை ஏற்பாடு செய்திருந்தன.
இதில் இலங்கையின் சிங்கள, தமிழ், முஸ்லிம் மற்றும் பறங்கியர் சமூகங்களைச் சேர்ந்தவர்கள் பங்கேற்றதாக ஏற்பாட்டாளர்கள் தெரிவித்துள்ளனர்.
இதன்போது, பயங்கரவாதத் தடுப்புச் சட்டத்தை (PTA) முழுமையாக நீக்க வேண்டும் எனப் போராட்டக்காரர்கள் வலியுறுத்தியதுடன், அரசைப் பயங்கரவாதத்திலிருந்து பாதுகாக்கும் சட்டமூலம் (PSTA) மற்றும் ஒழுங்கமைக்கப்பட்ட குற்றங்களைத் தடுக்கும் சட்டமூலம் (POCA) ஆகியவற்றுக்கும் தமது எதிர்ப்பை வெளியிட்டனர்.
குறித்த சட்டங்கள் ஒடுக்குமுறைக்கு வழிவகுக்கக்கூடியவை எனச் சுட்டிக்காட்டிய ஆர்ப்பாட்டக்காரர்கள், அவை இலங்கையின் அடிப்படை உரிமைகள், சிவில் சுதந்திரங்கள் மற்றும் ஜனநாயக உரிமைகளுக்கு ஏற்படுத்தக்கூடிய பாதிப்புகள் குறித்தும் கவலை வெளியிட்டனர்.
புதிய பயங்கரவாத எதிர்ப்புச் சட்டமூலங்கள் தொடர்பாக மனித உரிமைகள் அமைப்புகள் பல்வேறு கவலைகளை முன்வைத்து வரும் பின்னணியில் இந்த ஆர்ப்பாட்டம் இடம்பெற்றுள்ளது.
குறிப்பாக, ஒருவரைத் தடுத்து வைக்கும் அதிகாரங்கள், கண்காணிப்பு நடவடிக்கைகள் மற்றும் அடிப்படைச் சுதந்திரங்களைக் கட்டுப்படுத்தக்கூடிய ஏற்பாடுகள் குறித்து மனித உரிமை அமைப்புகள் கேள்வி எழுப்பியுள்ளன.
இதேவேளை, முன்மொழியப்பட்டுள்ள புதிய பயங்கரவாத எதிர்ப்புச் சட்டமூலம் தொடர்பாக ஏற்கனவே விமர்சனம் வெளியிட்டுள்ள சர்வதேச மனித உரிமைகள் கண்காணிப்பகமான ஹியூமன் ரைட்ஸ் வாட்ச் (Human Rights Watch), தற்போதைய பயங்கரவாதத் தடுப்புச் சட்டத்தின் கீழ் மனித உரிமை மீறல்களுக்குக் காரணமாக அமைந்த அதிகாரங்களைப் புதிய சட்டமூலமும் தொடர்ந்து கொண்டிருக்கக்கூடும் என எச்சரித்துள்ளமை குறிப்பிடத்தக்கது.
