அம்பாசமுத்திரத்தில் நவம்பர் 14-ல் முதல்வர் விஜய் பங்கேற்கும் நிகழ்ச்சி? இடைத்தேர்தலுக்கு தயாராகும் தவெக!
திருநெல்வேலி மாவட்டம் அம்பாசமுத்திரத்தில் எதிர்வரும் நவம்பர் 14ஆம் திகதி நடைபெறவுள்ள குழந்தைகள் தின விழாவில் தமிழக முதல்வர் விஜய் பங்கேற்கவுள்ளதாகத் தகவல்கள் வெளியாகியுள்ளன. இதனால் அம்பாசமுத்திரம் உள்ளிட்ட ஐந்து தொகுதிகளுக்கான இடைத்தேர்தல் தொடர்பான அரசியல் நடவடிக்கைகள் கவனம் பெற்றுள்ளன.
திருநெல்வேலி மாவட்டத்தின் அம்பாசமுத்திரம் தொகுதியில் அதிமுக சார்பில் போட்டியிட்ட இசக்கி சுப்பையா உள்ளிட்ட அக்கட்சியின் ஆறு சட்டமன்ற உறுப்பினர்கள் தங்களது பதவிகளை இராஜினாமா செய்துவிட்டு தமிழக வெற்றிக் கழகத்தில் (தவெக) இணைந்தனர்.
இதில் தாராபுரம் மற்றும் மதுராந்தகம் ஆகிய இரண்டு தொகுதிகளுக்கு அண்மையில் இடைத்தேர்தல் நடைபெற்றது. இராஜினாமா செய்துவிட்டு தவெக சார்பில் போட்டியிட்ட சத்தியபாமா மற்றும் மரகதம் குமரவேல் ஆகிய இருவரும் தேர்தலில் வெற்றிபெற்றனர்.
இதேவேளை, முதல்வர் விஜய் தான் போட்டியிட்டு வெற்றிபெற்ற திருச்சி கிழக்கு தொகுதியின் சட்டமன்ற உறுப்பினர் பதவியையும் இராஜினாமா செய்திருந்தார். எனினும், நீதிமன்ற வழக்குகள் காரணமாக அந்தத் தொகுதி உள்ளிட்ட ஐந்து தொகுதிகளுக்கான இடைத்தேர்தல்கள் இதுவரை நடைபெறவில்லை.
தற்போது குறித்த வழக்குகள் முடிவுக்கு வந்துள்ள நிலையில், ஐந்து தொகுதிகளுக்கும் விரைவில் இடைத்தேர்தல் அறிவிக்கப்படலாம் என்ற எதிர்பார்ப்பு நிலவுகிறது.
இதற்கிடையில், அம்பாசமுத்திரம் தொகுதியில் நாம் தமிழர் கட்சியின் தலைமை ஒருங்கிணைப்பாளர் சீமான் போட்டியிடப்போவதாக அறிவித்துள்ளார். மேலும், எதிர்க்கட்சிகள் சார்பில் அவர் பொதுவேட்பாளராக அறிவிக்கப்படுவாரா என்ற கேள்வியும் எழுந்துள்ளது.
இது தொடர்பாக ஊடகவியலாளர்கள் எழுப்பிய கேள்விக்குப் பதிலளித்த திமுக தலைவர் மு.க.ஸ்டாலின், தேர்தல் திகதி அறிவிக்கப்பட்ட பின்னர் அது குறித்து பேசலாம் எனத் தெரிவித்துள்ளார்.
மறுபுறம், இடைத்தேர்தல் நடைபெறவுள்ள ஐந்து தொகுதிகளிலும் ஆளுங்கட்சியான தவெக தீவிர கவனம் செலுத்தி வருகிறது. இந்தத் தொகுதிகளில் முதல்வர் விஜய் பங்கேற்கும் பல்வேறு நிகழ்ச்சிகளை ஏற்பாடு செய்யத் திட்டமிடப்பட்டுள்ளதாகவும் கூறப்படுகிறது.
அதன் ஒரு பகுதியாக, அம்பாசமுத்திரத்தில் உள்ள அரசுப் பள்ளியில் நவம்பர் 14ஆம் திகதி நடைபெறவுள்ள குழந்தைகள் தின விழாவில் முதல்வர் விஜய் பங்கேற்கவுள்ளதாகத் தகவல் வெளியாகியுள்ளது. இதன்போது மாணவ, மாணவிகளுக்கு கேக் வழங்கும் திட்டத்தையும் அவர் ஆரம்பித்து வைக்கவுள்ளதாகத் தெரிவிக்கப்படுகிறது.
இதற்கிடையில், திருநெல்வேலி மாவட்ட ஆட்சியர் ஆனந்த் மோகன் அண்மையில் அம்பாசமுத்திரம் பகுதியில் ஆய்வு மேற்கொண்டுள்ளார். முதல்வரின் பங்கேற்பு மற்றும் நிகழ்ச்சி ஏற்பாடுகள் தொடர்பான மேலதிக விபரங்கள் விரைவில் அதிகாரபூர்வமாக வெளியாகும் என எதிர்பார்க்கப்படுகிறது.
இதனால், அம்பாசமுத்திரம் உள்ளிட்ட ஐந்து தொகுதிகளுக்கான இடைத்தேர்தல் தொடர்பான அரசியல் நகர்வுகள் தற்போது அதிக கவனம் பெற்றுள்ளன.
