மியான்மர் ஆயுதப் பயிற்சி வழக்கு: வான்டைக் உள்ளிட்ட 7 பேருக்கு வெளிநாட்டில் தங்க அனுமதி நீடிப்பு

மியான்மரில் இன அடிப்படையிலான ஆயுதக் குழுக்களுக்குப் பயிற்சி அளித்ததாகக் குற்றம் சாட்டப்பட்ட அமெரிக்கப் பிரஜையான மேத்யூ ஆரோன் வான்டைக் மற்றும் உக்ரைனைச் சேர்ந்த ஆறு பேரும் இந்தியாவுக்கு வெளியே தங்குவதற்கு வழங்கப்பட்ட அனுமதியை, டெல்லி நீதிமன்றம் அடுத்த ஆண்டு பெப்ரவரி 24ஆம் திகதி வரை நீடித்துள்ளது.

இந்த வழக்குத் தொடர்பில் நேற்று நடைபெற்ற விசாரணையைத் தொடர்ந்து நீதிமன்றம் இந்த உத்தரவைப் பிறப்பித்துள்ளது.

மியான்மரில் இன அடிப்படையிலான ஆயுதக் குழுக்களுக்குப் பயிற்சி அளித்ததாகக் கூறப்படும் குற்றச்சாட்டின் பேரில், அமெரிக்காவைச் சேர்ந்த மேத்யூ ஆரோன் வான்டைக் மற்றும் உக்ரைனைச் சேர்ந்த ஆறு பேரை இந்தியாவின் தேசிய புலனாய்வு முகமை (NIA) கடந்த மார்ச் மாதம் கைது செய்திருந்தது.

இவர்கள் மீது சட்டவிரோத நடவடிக்கைகள் தடுப்புச் சட்டத்தின் (UAPA) கீழ் கடுமையான குற்றச்சாட்டுகள் முன்வைக்கப்பட்டிருந்தன. எனினும், செப்டம்பர் மாதம் தாக்கல் செய்யப்பட்ட குற்றப்பத்திரிகையில், குறித்த சட்டத்தின் கீழான குற்றச்சாட்டுகளை தேசிய புலனாய்வு முகமை நீக்கியிருந்தது.

அதற்குப் பதிலாக, ஏழு பேருக்கும் எதிராக குடியேற்றம் மற்றும் வெளிநாட்டினர் சட்டங்களின் கீழான குற்றச்சாட்டுகள் மட்டுமே குற்றப்பத்திரிகையில் சேர்க்கப்பட்டிருந்தன. இந்தக் குற்றச்சாட்டுகள் சமரசத்தின் மூலம் முடித்துக்கொள்ளக்கூடியவை எனத் தெரிவிக்கப்பட்டுள்ளது.

குறித்த சட்டங்களின் கீழ் விதிக்கப்பட்ட மீறல்களுக்கான சமரசக் கட்டணத்தை வான்டைக் செலுத்தியதைத் தொடர்ந்து, கடந்த மாதம் அவருக்கு நீதிமன்றம் சட்டப்படி ஜாமீன் வழங்கியிருந்தது.

இதனையடுத்து, விசாரணைகளில் மீண்டும் பங்கேற்க வேண்டும் என்ற நிபந்தனையுடன், வான்டைக் மற்றும் உக்ரைனைச் சேர்ந்த ஆறு பேரும் தத்தமது நாடுகளுக்குத் திரும்புவதற்கு டெல்லி நீதிமன்றம் அனுமதி வழங்கியிருந்தது. வான்டைக் தனது சொந்த நாட்டில் ஒரு மாத காலம் தங்குவதற்கும் அனுமதிக்கப்பட்டிருந்தார்.

இந்நிலையில், நேற்று நடைபெற்ற நீதிமன்ற விசாரணையில் பங்கேற்பதற்காக வான்டைக் இந்தியா திரும்பியிருந்தார். எனினும், உக்ரைனைச் சேர்ந்த ஆறு பேரும் இதுவரை இந்தியாவுக்குத் திரும்பவில்லை எனத் தெரிவிக்கப்பட்டுள்ளது.

இதற்கிடையில், வழக்கின் பல்வேறு அம்சங்கள் தொடர்பான விசாரணைகளை முன்னெடுக்க மேலதிக கால அவகாசம் தேவைப்படுவதாக தேசிய புலனாய்வு முகமை நீதிமன்றத்தில் கோரிக்கை விடுத்தது.

இதனைத் தொடர்ந்து, மேத்யூ ஆரோன் வான்டைக் மற்றும் உக்ரைனைச் சேர்ந்த ஆறு பேரும் இந்தியாவுக்கு வெளியே தங்குவதற்கு ஏற்கெனவே வழங்கப்பட்ட அனுமதியை, அடுத்த ஆண்டு பெப்ரவரி 24ஆம் திகதி வரை நீதிமன்றம் நீடித்துள்ளது.