ஹபராதுவ இரட்டைக் கொலைச் சம்பவம்: தேடப்பட்டு வந்த சந்தேகநபர் கைது!

காலி, ஹபராதுவ பகுதியில் இரண்டு பெண்கள் கொலை செய்யப்பட்ட சம்பவத்துடன் தொடர்புடையவர் எனச் சந்தேகிக்கப்படும் 34 வயதுடைய நபர் ஒருவரை பொலிஸார் கைது செய்துள்ளனர்.

பல்வேறு குற்றச்செயல்களுடன் தொடர்புடையவர் எனத் தேடப்பட்டு வந்த குறித்த சந்தேகநபர், புதன்கிழமை (21) ஹபராதுவ, எரமுதுகஹ சந்திப் பகுதியில் மேற்கொள்ளப்பட்ட விசேட சுற்றிவளைப்பின்போது கைது செய்யப்பட்டுள்ளார்.

ஹபராதுவ பொலிஸ் நிலைய அதிகாரிகளுக்குக் கிடைத்த தகவலின் அடிப்படையில் இந்தக் கைது நடவடிக்கை முன்னெடுக்கப்பட்டுள்ளது.

கைது செய்யப்பட்ட சந்தேகநபரிடமிருந்து 12.620 கிராம் ஐஸ் போதைப்பொருளையும் பொலிஸார் கைப்பற்றியுள்ளனர். இவர் வஞ்சாவல பகுதியைச் சேர்ந்தவர் என அடையாளம் காணப்பட்டுள்ளார்.

மேலும், காலி மேல் நீதிமன்றத்தினால் பிறப்பிக்கப்பட்ட பிடியாணை ஒன்றின் அடிப்படையிலும் குறித்த நபர் தேடப்பட்டு வந்தமை விசாரணைகளில் தெரியவந்துள்ளது.

கடந்த 2026 ஒக்டோபர் 8ஆம் திகதி இரண்டு பெண்கள் கொலை செய்யப்பட்ட சம்பவத்திலும் சந்தேகநபருக்குத் தொடர்பு இருக்கலாம் எனப் பொலிஸார் சந்தேகிக்கின்றனர்.

அத்துடன், கடைகளுக்குள் புகுந்து பொருட்களைத் திருடிய இரண்டு சம்பவங்கள் மற்றும் ஹபராதுவ பொலிஸ் நிலையத்தில் முறைப்பாடு செய்யப்பட்ட மிதிவண்டித் திருட்டுச் சம்பவம் ஆகியவற்றுடன் தொடர்புடையவராகவும் இவர் தேடப்பட்டு வந்துள்ளார்.

கைது செய்யப்பட்ட சந்தேகநபர் தொடர்பில் ஹபராதுவ பொலிஸார் மேலதிக விசாரணைகளை முன்னெடுத்து வருகின்றனர்.