போர்ட் சிட்டி ஆணைக்குழுவின் பரிந்துரையில் 14,300க்கும் மேற்பட்ட விசாக்கள் – கண்காணிப்பு குறித்து நாடாளுமன்றக் குழு கவலை

கொழும்பு துறைமுக நகரப் பொருளாதார ஆணைக்குழுவின் பரிந்துரையின் அடிப்படையில் வெளிநாட்டவர்களுக்கு சுமார் 14,300 விசாக்கள் வழங்கப்பட்டுள்ள நிலையில், அவர்களின் நடவடிக்கைகளைக் கண்காணிப்பது தொடர்பில் நாடாளுமன்ற நிதி விவகாரங்களுக்கான குழு கவலை வெளியிட்டுள்ளது.

நாடாளுமன்ற உறுப்பினர் கலாநிதி ஹர்ஷ டி சில்வா தலைமையில் ஒக்டோபர் 8ஆம் திகதி நடைபெற்ற பொதுநிதி தொடர்பான நாடாளுமன்றக் குழுக் கூட்டத்தில் இந்த விடயம் ஆராயப்பட்டதாக, ஒக்டோபர் 15ஆம் திகதி வெளியிடப்பட்ட நாடாளுமன்ற அறிக்கையில் தெரிவிக்கப்பட்டுள்ளது.

போர்ட் சிட்டி ஆணைக்குழுவின் பரிந்துரையின் அடிப்படையில் விசாக்களைப் பெற்றுள்ள வெளிநாட்டவர்கள் இலங்கைக்குள் மேற்கொள்ளும் நடவடிக்கைகளைக் கண்காணிப்பதற்கான நடைமுறைச் சாத்தியங்கள் குறித்து இதன்போது குழு உறுப்பினர்கள் ஆராய்ந்தனர்.

குறிப்பாக, போர்ட் சிட்டியில் பணிபுரியும் வெளிநாட்டவர்களுக்கு விசா பரிந்துரைகள் வழங்கும் நடைமுறைகள் மற்றும் அவர்களின் செயற்பாடுகளைக் கண்காணிப்பதற்காக நடைமுறையில் உள்ள பொறிமுறைகள் குறித்து விரிவாகக் கலந்துரையாடப்பட்டது.

போர்ட் சிட்டிக்குள் சட்டவிரோத நடவடிக்கைகள் இடம்பெறுவதைத் தடுப்பதற்கும், இலங்கையின் சர்வதேச நற்பெயரைப் பாதுகாப்பதற்கும் ஒழுங்குமுறை நடவடிக்கைகளை வலுப்படுத்த வேண்டியதன் அவசியத்தையும் குழு வலியுறுத்தியது.

வெளிநாட்டு முதலீடுகள் மற்றும் பணமோசடி தடுப்பு

போர்ட் சிட்டியில் முதலீடு செய்யும் நிறுவனங்களின் உண்மையான பயனாளி உரிமையாளர்களை அடையாளம் காண்பதற்கான நடைமுறைகள் குறித்தும் குழு உறுப்பினர்கள் கேள்வி எழுப்பினர்.

வெளிநாட்டு முதலீடுகளில் வெளிப்படைத்தன்மையை உறுதிப்படுத்துதல், பணமோசடி மற்றும் பயங்கரவாதத்துக்கு நிதியளித்தல் போன்ற நடவடிக்கைகளைத் தடுப்பதற்கான பொறிமுறைகள் குறித்தும் ஆராயப்பட்டது.

2.12 பில்லியன் அமெரிக்க டொலர் மதிப்பிலான காணிகள் குத்தகை

கொழும்பு துறைமுக நகரில் முன்னெடுக்கப்பட்டு வரும் முதலீட்டுத் திட்டங்களின் முன்னேற்றம் குறித்தும் கூட்டத்தில் மீளாய்வு செய்யப்பட்டது.

இதன்போது, சுமார் 1.12 பில்லியன் அமெரிக்க டொலர் பெறுமதியான ஒன்பது காணித் துண்டுகள் ஏற்கனவே குத்தகைக்கு வழங்கப்பட்டுள்ளதாக அதிகாரிகள் தெரிவித்தனர். மேலும், சுமார் ஒரு பில்லியன் அமெரிக்க டொலர் பெறுமதியான ஆறு காணித் துண்டுகளை குத்தகைக்கு வழங்குவதற்கான திட்டங்கள் முன்னெடுக்கப்பட்டு வருவதாகவும் அவர்கள் குறிப்பிட்டனர்.

அத்துடன், அரசாங்கத்துக்குச் சொந்தமான நான்கு காணித் துண்டுகளை சந்தைக்கு அறிமுகப்படுத்துவதற்கான ஏற்பாடுகள் மேற்கொள்ளப்பட்டு வருவதாகவும் ஆணைக்குழு அதிகாரிகள் தெரிவித்தனர்.

காணிகள் சராசரியாக ஒரு சதுர மீற்றருக்கு 3,000 அமெரிக்க டொலர் பெறுமதியில் 99 வருட குத்தகை அடிப்படையில் வழங்கப்பட்டுள்ளதாகவும் கூட்டத்தில் தெரிவிக்கப்பட்டது.

 முதலீடுகள் மற்றும் வேலைவாய்ப்புகள் குறித்து ஆய்வு

போர்ட் சிட்டியில் தொழில் நடவடிக்கைகளை முன்னெடுப்பதற்கு அனுமதி பெற்ற நிறுவனங்கள் தமது செயற்பாடுகளை ஆரம்பித்துள்ளனவா என்பதையும் குழு ஆராய்ந்தது.

எதிர்பார்க்கப்பட்ட வெளிநாட்டு முதலீடுகள் கிடைத்துள்ளனவா, புதிய வேலைவாய்ப்புகள் உருவாக்கப்பட்டுள்ளனவா என்பன தொடர்பிலும் கேள்விகள் எழுப்பப்பட்டன.

மேலும், போர்ட் சிட்டியில் கொள்வனவு செய்யப்படும் மின்தூண் குடியிருப்பு அலகுகளுக்காக முதலீட்டாளர்கள் செலுத்தும் முற்பணங்களைப் பாதுகாப்பது குறித்தும் கலந்துரையாடப்பட்டது.

குறிப்பாக, முதலீட்டாளர்களிடமிருந்து பெறப்படும் பணம் சம்பந்தப்பட்ட அபிவிருத்தித் திட்டங்களுக்காக மட்டுமே பயன்படுத்தப்படுவதை உறுதிப்படுத்த, எஸ்க்ரோ (Escrow) கணக்குகள் மூலம் நிதியைப் பாதுகாக்கும் நடைமுறைகள் குறித்தும் கவனம் செலுத்தப்பட்டது.

இந்தக் கூட்டத்தில் பிரதி அமைச்சர்களான சதுரங்க அபேசிங்க, நிஷாந்த ஜயவீர உள்ளிட்ட ஆளும் தரப்பு மற்றும் எதிர்க்கட்சிகளைச் சேர்ந்த பல நாடாளுமன்ற உறுப்பினர்களும் கலந்துகொண்டனர்.