ஞானசார தேரர் விவகாரம்: ஐ.தே.க.வின் அறிக்கைக்கு நீதியமைச்சர் பதிலடி!

 கலகொட அத்தே ஞானசார தேரர் சிறையில் அடைக்கப்பட்டுள்ள விவகாரம் தொடர்பில் ஐக்கிய தேசியக் கட்சி (ஐ.தே.க.) வெளியிட்ட அறிக்கைக்கு நீதியமைச்சர் ஹர்ஷன நாணயக்கார இன்று (15) எழுத்துமூலமாகப் பதிலளித்துள்ளார்.

ஐக்கிய எதிர்க்கட்சியின் ஒருங்கிணைப்பாளர் பேராசிரியர் ஜி.எல். பீரிஸ் தெரிவித்த கருத்துக்களை அடிப்படையாகக் கொண்டு ஐக்கிய தேசியக் கட்சி நேற்று (14) குறித்த அறிக்கையை வெளியிட்டிருந்தது.

சிறையில் தடுத்து வைக்கப்பட்டுள்ள பிக்குகள் மற்றும் மதத் தலைவர்களை வெளியிடங்களுக்கு அழைத்துச் செல்லும்போது அவர்கள் அணிய வேண்டிய ஆடைகள் தொடர்பாக, சிறைச்சாலைத் திணைக்களத்தின் நிலையான கட்டளைகளில் தெளிவான ஏற்பாடுகள் உள்ளதாக ஐ.தே.க. தனது அறிக்கையில் சுட்டிக்காட்டியிருந்தது.

இவ்விடயம் தொடர்பில் பரிந்துரைகளை முன்வைப்பதற்காகக் குழுவொன்றை நியமிப்பது, பிரச்சினையை மூடி மறைத்து அதனைத் தொடர்ந்து நீடிப்பதற்கான நேர்மையற்ற முயற்சி எனவும் அக்கட்சி குற்றஞ்சாட்டியிருந்தது.

மேலும், ஞானசார தேரரின் காவியுடை அகற்றப்பட்டமை தொடர்பில் கோட்டே ஸ்ரீ கல்யாணி சாமக்ரி தர்ம மகா சங்க சபையின் மகாநாயக்க தேரரிடமும் சங்க சபையிடமும் அரசாங்கம் மன்னிப்புக் கோர வேண்டும் என்றும் ஐ.தே.க. வலியுறுத்தியிருந்தது.

இதற்குப் பதிலளித்துள்ள நீதியமைச்சர் ஹர்ஷன நாணயக்கார, சிறைச்சாலை நிலையான கட்டளை இலக்கம் 550 இன் ஒரு பகுதியை மாத்திரம் ஐக்கிய தேசியக் கட்சி திட்டமிட்டு மேற்கோள் காட்டியுள்ளதாகக் குறிப்பிட்டுள்ளார்.

இதன் மூலம் சட்ட ஏற்பாட்டைத் திரிபுபடுத்தி, பொதுமக்களைத் தவறாக வழிநடத்தும் வகையில் கருத்துகள் முன்வைக்கப்பட்டுள்ளதாகவும் அவர் தெரிவித்துள்ளார்.

சிறையில் உள்ள பௌத்த பிக்கு ஒருவரைச் சார்ந்த, சமூக ரீதியாக உணர்வுபூர்வமான விவகாரத்தில், பொறுப்புள்ள அரசியல் கட்சியொன்று இவ்வாறு திரிபுபடுத்தப்பட்ட கருத்துகளைப் பரப்புவது வருத்தமளிப்பதாகவும் அமைச்சர் சுட்டிக்காட்டியுள்ளார்.

சட்டம் குறித்த குறைந்தபட்ச புரிதல் உள்ள எவரும், சட்ட ஏற்பாட்டின் ஒரு பகுதியை மாத்திரம் அடிப்படையாகக் கொண்டு உண்மைகளை முன்வைப்பது தவறான அல்லது முழுமையற்ற புரிதலுக்கு வழிவகுக்கும் என்பதை அறிந்திருக்க வேண்டும் என்றும் அவர் தெரிவித்துள்ளார்.

குறித்த நிலையான கட்டளையின் முழுமையான உள்ளடக்கத்தை முன்வைக்காமலும், ஞானசார தேரருக்கு விதிக்கப்பட்ட சிறைத்தண்டனையின் காலப்பகுதி தொடர்பான குறிப்பிட்ட விடயங்களைப் புறக்கணித்தும் ஐ.தே.க. வெளியிட்ட அறிக்கை தவறான தோற்றப்பாட்டை ஏற்படுத்துவதாக நீதியமைச்சர் தனது பதிலில் மேலும் குறிப்பிட்டுள்ளார்.