ATM மற்றும் CDM இயந்திரங்களுக்கு அருகில் புதிய பண மோசடி – பொலிஸார் எச்சரிக்கை!
தானியங்கி பணப்பரிமாற்ற இயந்திரங்கள் (ATM) மற்றும் பண வைப்புச் செய்யும் இயந்திரங்கள் (CDM) அருகில் இடம்பெறும் புதிய வகையான பண மோசடிகள் தொடர்பில் பொலிஸார் பொதுமக்களுக்கு எச்சரிக்கை விடுத்துள்ளனர்.
பிறருக்கு உதவும் மனப்பான்மையைப் பயன்படுத்தி மோசடிக்காரர்கள் இவ்வாறான மோசடிகளில் ஈடுபடுவதாகவும், வங்கிச் சேவைகளைப் பயன்படுத்தும் பொதுமக்கள் மிகுந்த விழிப்புடன் இருக்க வேண்டும் என்றும் பொலிஸார் அறிவுறுத்தியுள்ளனர்.
பொலிஸாரின் தகவல்களின்படி, CDM இயந்திரங்களுக்கு அருகில் நடமாடும் சிலர், தங்களால் பணத்தை வைப்புச் செய்ய முடியவில்லை எனக் கூறி, அங்குள்ளவர்களிடம் பணத்தை மாற்றித் தருமாறு கோருகின்றனர். குறிப்பாக, 500 ரூபாய் நாணயத்தாளைக் கொடுத்து இந்த மோசடியை ஆரம்பிப்பதாகத் தெரிவிக்கப்படுகிறது.
இதன்போது, பாதிக்கப்பட்டவர்கள் தாங்கள் வழங்கிய பணம் தொடர்பில் கேள்வி எழுப்பும்போது, பணத்தைப் பெற்றுக்கொள்ளவில்லை எனக் கூறி மோசடிக்காரர்கள் மறுப்பு தெரிவிக்கின்றனர். இதன் மூலம் பொதுமக்களை ஏமாற்றி அவர்களிடமிருந்து பணத்தைத் திருடுவதாக பொலிஸார் எச்சரித்துள்ளனர்.
எனவே, ATM மற்றும் CDM இயந்திரங்களைப் பயன்படுத்தும்போது அறிமுகமில்லாத நபர்களுடன் பணப் பரிமாற்றங்களில் ஈடுபடுவதைத் தவிர்க்குமாறும், சந்தேகத்திற்கிடமான நபர்கள் அல்லது நடவடிக்கைகள் தென்பட்டால் உடனடியாக பொலிஸாருக்கு அறிவிக்குமாறும் பொதுமக்களிடம் கேட்டுக்கொள்ளப்பட்டுள்ளது.
