தாக்குதலுக்கு NPP-யைத் தொடர்புபடுத்திய பிக்கு; காயமடைந்தவர் போராட்ட ஆதரவாளர் எனத் தான் கருதியதாக விளக்கம்

இலங்கையில் சிறையில் உள்ள கலகொட அத்தே ஞானசார தேரரை விடுவிக்கக் கோரி முன்னெடுக்கப்படும் கண்டி – கொழும்பு பாதயாத்திரையின்போது இடம்பெற்றதாகக் கூறப்படும் தாக்குதல் சம்பவம் தொடர்பில், காயமடைந்த நபர் போராட்டத்திற்கு ஆதரவளித்தவர் எனத் தான் ஆரம்பத்தில் கருதியதாக வணக்கத்திற்குரிய தித்தகல்லே ஆனந்தசிறி தேரர் தெரிவித்துள்ளார்.

இந்தத் தாக்குதல் சம்பவத்துடன் ஆளும் தேசிய மக்கள் சக்தி (NPP) தரப்பினரைத் தொடர்புபடுத்தி முன்னதாகக் காணொளி வெளியிட்டிருந்த தேரர், பொலிஸார் தமது குற்றச்சாட்டுகளை மறுத்ததைத் தொடர்ந்து இந்த விளக்கத்தை அளித்துள்ளார்.

போராட்டக்காரர்கள் முன்னிலையில் தாக்குதல் இடம்பெற்றதால், காயமடைந்த நபர் பாதயாத்திரைக்கு ஆதரவளித்த ஒருவர் எனத் தான் நம்பியதாக அவர் குறிப்பிட்டுள்ளார். எனினும், தனது புதிய விளக்கத்தில் தாக்குதலுடன் NPP தரப்பினரை நேரடியாகத் தொடர்புபடுத்தும் முந்தைய குற்றச்சாட்டை அவர் மீண்டும் முன்வைக்கவில்லை. மாறாக, சம்பவம் தொடர்பில் பொலிஸார் வெளியிட்ட அறிக்கையைக் கேள்விக்குட்படுத்தியுள்ளார்.

தாக்குதல் இடம்பெற்றபோது போராட்டப் பாதையில் கடமையில் இருந்த பொலிஸ் அதிகாரிகள் அங்கிருந்ததாகவும், அவ்வாறு இருந்தும் அவர்கள் ஏன் தலையிட்டு நடவடிக்கை எடுக்கவில்லை என்றும் ஆனந்தசிறி தேரர் கேள்வி எழுப்பியுள்ளார்.

தாக்குதலுக்குப் பின்னர் காயமடைந்த நபர் இரத்தக் காயங்களுடன் காணப்பட்டதாகவும், அவரது காயங்களைத் துப்புரவு செய்ய உதவியதுடன், அம்பியூலன்ஸ் மூலம் அவரை வைத்தியசாலைக்கு அனுப்புவதற்கான ஏற்பாடுகளையும் செய்ததாகவும் அவர் தெரிவித்துள்ளார்.

மேலும், சம்பவத்துடன் தொடர்புடையதாகக் கூறப்படும் மோட்டார் சைக்கிளின் இலக்கத் தகட்டை பாதயாத்திரையில் கலந்துகொண்டவர்கள் பதிவு செய்து, அந்தத் தகவலைப் பொலிஸாரிடம் வழங்கியதாகவும் அவர் குறிப்பிட்டுள்ளார்.

சம்பவத்தின்போது பொலிஸார் செயற்படத் தவறியதாகக் கூறப்படும் விடயம் குறித்து விசாரணை நடத்துவதற்குப் பதிலாக, பொய்யான தகவல்களைப் பரப்பியதாகத் தம்மீது குற்றஞ்சாட்டுவதில் பொலிஸார் கவனம் செலுத்துவதாகவும் தேரர் விமர்சித்துள்ளார். தாம் வெளியிட்ட காணொளி பொதுமக்களின் கவனத்தை ஈர்த்த பின்னரே பொலிஸார் நடவடிக்கைகளை முன்னெடுத்ததாகவும் அவர் குற்றஞ்சாட்டியுள்ளார்.

பொலிஸாரின் விளக்கம்

இந்நிலையில், குறித்த சம்பவம் தொடர்பில் இலங்கைப் பொலிஸார் ஒக்டோபர் 15ஆம் திகதி வெளியிட்ட அறிக்கையில், பாதயாத்திரையின் ஆதரவாளர் ஒருவர் தாக்கப்பட்டதாக முன்வைக்கப்பட்ட குற்றச்சாட்டுகளை நிராகரித்துள்ளனர்.

பொலிஸாரின் விசாரணைகளின்படி, ஒக்டோபர் 14ஆம் திகதி வீரகுல பொலிஸ் பிரிவுக்கு உட்பட்ட வீதியாவத்தை தேவாலயத்திற்கு அருகில் இந்தச் சம்பவம் இடம்பெற்றுள்ளது.

லொறியில் பயணித்த ஒருவருக்கும் மோட்டார் சைக்கிளில் சென்ற ஒருவருக்கும் இடையில் ஏற்பட்ட போக்குவரத்துத் தொடர்பான தகராறே மோதலுக்குக் காரணம் எனப் பொலிஸார் தெரிவித்துள்ளனர்.

வாகன நெரிசல் காரணமாக இருவருக்கும் இடையில் ஏற்பட்ட வாக்குவாதம் பின்னர் மோதலாக மாறியதாகவும், இதன்போது லொறியில் இருந்த நபர் தலைக்கவசத்தால் தாக்கப்பட்டதாகவும் பொலிஸார் குறிப்பிட்டுள்ளனர்.

காயமடைந்த நபர் வழங்கிய வாக்குமூலத்தின்படி, அவர் தனது சொந்தக் காரணங்களுக்காகப் பயணித்ததாகவும், பாதயாத்திரையுடன் தனக்கு எந்தத் தொடர்பும் இல்லை என்றும் பொலிஸார் தெரிவித்துள்ளனர்.

தாக்குதலில் காயமடைந்த நபர் வத்துபிட்டிவல வைத்தியசாலையில் அனுமதிக்கப்பட்டுள்ளதுடன், தகராறில் தொடர்புடைய மோட்டார் சைக்கிள் ஓட்டுநரும் சிகிச்சைக்காக கம்பஹா வைத்தியசாலையில் அனுமதிக்கப்பட்டுள்ளார்.

காயமடைந்த நபரைப் பாதயாத்திரையின் ஆதரவாளராகச் சித்தரித்து, அவர் திட்டமிட்டு தாக்கப்பட்டதாகத் தவறான தகவல்களைப் பரப்பியதாக ஆனந்தசிறி தேரர் மீது பொலிஸார் குற்றஞ்சாட்டியுள்ளனர்.

குற்றச்சாட்டை மறுக்கும் தேரர்

எனினும், தாம் வேண்டுமென்றே தவறான தகவல்களைப் பரப்பியதாக முன்வைக்கப்படும் குற்றச்சாட்டை ஆனந்தசிறி தேரர் நிராகரித்துள்ளார். காயமடைந்த ஒருவருக்கு உதவியதுடன், தாக்குதல் சம்பவம் குறித்துப் பொதுமக்களின் கவனத்தை ஈர்ப்பதற்காகவே அதனை வெளிப்படுத்தியதாக அவர் தெரிவித்துள்ளார்.

அத்துடன், போராட்டத்தை அரசாங்கம் கையாளும் விதத்தையும் அவர் விமர்சித்துள்ளார். கடும் மழை பெய்தாலும் பாதயாத்திரை கொழும்பு நோக்கித் தொடரும் என்றும் அவர் மீண்டும் வலியுறுத்தியுள்ளார்.

இந்தச் சம்பவம் தொடர்பான விடயம் நீதிமன்றத்தில் அறிக்கையிடப்படும் எனத் தெரிவித்துள்ள பொலிஸார், பொதுமக்கள் மத்தியில் அமைதியின்மையை ஏற்படுத்தக்கூடிய வகையில் பொய்யான அல்லது உறுதிப்படுத்தப்படாத தகவல்களைப் பரப்புவோருக்கு எதிராக சட்ட நடவடிக்கை எடுக்கப்படலாம் என்றும் எச்சரித்துள்ளனர்.

சம்பவம் தொடர்பான மேலதிக விசாரணைகள் தொடர்ந்து முன்னெடுக்கப்பட்டு வருகின்றன.