“எனக்கு வலிக்கிறது என்று நினைக்கிறார்களா?” – ஊசி குத்தும் சடங்குகள் குறித்து ஜனாதிபதி கேள்வி
ஜனாதிபதி அநுர குமார திஸாநாயக்கவை இலக்குவைத்து களிமண் பொம்மைகளில் ஊசிகளைக் குத்தும் சடங்குகள் முன்னெடுக்கப்படுவது குறித்து ஜனாதிபதி கேள்வி எழுப்பியுள்ளார்.
தேசிய அறிவுஜீவிகள் அமைப்பின் (NIO) தேசிய மாநாடு நேற்று (31) சனிக்கிழமை நடைபெற்றபோது உரையாற்றிய ஜனாதிபதி, சில எதிர்க்கட்சிக் குழுக்கள் முன்னெடுக்கும் விசித்திரமான போராட்ட நடவடிக்கைகளை விமர்சித்துள்ளார்.
கடந்தகால அரசியல் கலாசாரத்தின் மூலம் நன்மைகளைப் பெற்ற சில தரப்பினரால், தேசிய மக்கள் சக்தி அரசாங்கம் ஏற்படுத்தி வரும் அரசியல் மாற்றங்களை ஏற்றுக்கொள்ள முடியவில்லை என அவர் குறிப்பிட்டுள்ளார்.
இதன் காரணமாக, வெறுப்புப் பேச்சுகள், பொய்யான குற்றச்சாட்டுகள் மற்றும் விசித்திரமான போராட்ட நடவடிக்கைகள் மூலம் அரசாங்கத்திற்கு எதிரான எதிர்ப்புகளை வெளிப்படுத்தி வருவதாகவும் ஜனாதிபதி குற்றஞ்சாட்டியுள்ளார்.
களிமண் பொம்மைகளில் ஊசிகளைக் குத்தும் சடங்குகள் தொடர்பில் கருத்துத் தெரிவித்த ஜனாதிபதி, களிமண் பொம்மையொன்றுக்குத் தீங்கு விளைவிப்பதால் மற்றொரு நபருக்கு வலி ஏற்படும் என எத்தகைய சிந்தனையின் அடிப்படையில் நம்புகிறார்கள் எனக் கேள்வி எழுப்பியுள்ளார்.
அத்துடன், ருவன்வெலிசாய தூபியை அரசாங்கம் பூமிக்குள் அமிழச் செய்யத் திட்டமிட்டுள்ளதாக முன்வைக்கப்படும் குற்றச்சாட்டுகளையும் அவர் விமர்சித்துள்ளார்.
தெளிவான நோக்கங்களுடன் ஒழுங்கமைக்கப்பட்ட அரசியல் இயக்கங்களும் போராட்டங்களும் நாட்டுக்குப் பாதிப்பை ஏற்படுத்தாது எனக் குறிப்பிட்ட ஜனாதிபதி, ஆனால் தெளிவான இலக்குகளும் திசையும் இல்லாத குழப்பமான நடவடிக்கைகள் சமூக ஸ்திரத்தன்மையைப் பாதிக்கக்கூடும் என எச்சரித்துள்ளார்.
எனவே, எதிர்க்கட்சிகள் தங்களது அரசியல் நோக்கங்களையும் நிலைப்பாடுகளையும் தெளிவுபடுத்தி, ஒழுங்கமைக்கப்பட்ட முறையில் போராட்டங்களை முன்னெடுக்க வேண்டும் என்றும் அவர் வலியுறுத்தியுள்ளார்.
இவ்வாறான நடவடிக்கைகளால் அரசாங்கத்தின் செயற்பாடுகள் திசைதிருப்பப்படாது எனவும், நாட்டில் அமைதியின்மையை ஏற்படுத்தும் முயற்சிகள் குறித்து அரசாங்கம் விழிப்புடன் இருக்கும் என்றும் ஜனாதிபதி தெரிவித்துள்ளார்.
இதேவேளை, கலகொட அத்தே ஞானசார தேரருக்கு ஜனாதிபதி மன்னிப்பு வழங்க வேண்டும் என வலியுறுத்தி, கொழும்பு விகாரமகாதேவி பூங்காவில் பௌத்த பிக்குகள் உள்ளிட்ட குழுவினர் அண்மையில் போராட்டத்தில் ஈடுபட்டிருந்தனர்.
ஒக்டோபர் மாத நடுப்பகுதியில் ஆரம்பமான இந்தப் போராட்டத்தில் மத வழிபாடுகள் மற்றும் பல்வேறு சடங்கு நடவடிக்கைகள் இடம்பெற்றதுடன், ஜனாதிபதிக்கு எதிராக களிமண் பொம்மைகளைப் பயன்படுத்தி சாபமிடும் சடங்குகளும் முன்னெடுக்கப்பட்டதாகத் தகவல்கள் வெளியாகியிருந்தன.
ஞானசார தேரருக்கு ஜனாதிபதி மன்னிப்பு வழங்க வேண்டும் அல்லது ஜனாதிபதி பதவியிலிருந்து விலக வேண்டும் எனவும் போராட்டத்தில் ஈடுபட்ட பிக்குகள் கோரிக்கை விடுத்திருந்தனர்.
