வாட்ஸ்அப் ஊடாகப் பரிசுப் பொதி வழங்குவதாகக் கூறி 14.5 இலட்சம் ரூபாய் மோசடி – பெண் கைது!
வாட்ஸ்அப் குழுவொன்றின் ஊடாகப் பெறுமதியான பரிசுப் பொதி ஒன்றை வழங்குவதாகக் கூறி, ஒருவரிடமிருந்து 14 இலட்சத்து 55 ஆயிரம் ரூபாய் பணத்தை மோசடியாகப் பெற்றதாகக் கூறப்படும் 46 வயதுடைய பெண் ஒருவர் கைது செய்யப்பட்டுள்ளார்.
கட்டுநாயக்க, பண்டாரநாயக்க சர்வதேச விமான நிலையத்தின் பயணிகள் முனையத்தில் வைத்து குறித்த பெண் கைது செய்யப்பட்டுள்ளதாகப் பொலிஸார் தெரிவித்துள்ளனர்.
சந்தேகநபர், வாட்ஸ்அப் குழுவொன்றின் ஊடாகப் பெறுமதியான பரிசுப் பொதி ஒன்றை வழங்குவதாக உறுதியளித்து, அதனை நம்பிய ஒருவரைத் தனது வங்கிக் கணக்கில் 14 இலட்சத்து 55 ஆயிரம் ரூபாய் பணத்தை வைப்பிலிடச் செய்துள்ளதாக ஆரம்பகட்ட விசாரணைகளில் தெரியவந்துள்ளது.
குறித்த நிதி மோசடி தொடர்பாகக் கிடைத்த முறைப்பாட்டின் அடிப்படையில் விசாரணைகள் ஆரம்பிக்கப்பட்டுள்ளன.
வடமேல் மாகாண கணினிக் குற்ற விசாரணைப் பிரிவின் உதவியுடன் இந்தக் கைது நடவடிக்கை முன்னெடுக்கப்பட்டுள்ளது.
கைது செய்யப்பட்ட பெண் நுகேகொடையைச் சேர்ந்தவர் எனத் தெரிவிக்கப்பட்டுள்ளது.
சம்பவம் தொடர்பான மேலதிக விசாரணைகளை கணினிக் குற்ற விசாரணைப் பிரிவின் வடமேல் மாகாணப் பிரிவு முன்னெடுத்து வருகின்றது.
