இறந்தவர்களின் தனியுரிமைக்கு மதிப்பளிப்பு: பொதுக் காட்சியிலிருந்து எகிப்திய மம்மிகளை அகற்றிய அருங்காட்சியகங்கள்!

ஸ்கொட்லாந்தில் உள்ள இரண்டு அருங்காட்சியகங்கள், இறந்தவர்களின் ஒப்புதல் மற்றும் அவர்களின் மூதாதையர்களின் விருப்பம் தொடர்பான நெறிமுறைக் கவலைகளைக் கருத்திற்கொண்டு, பண்டைய எகிப்திய மம்மிகளைப் பொதுமக்களின் பார்வையிலிருந்து அகற்றியுள்ளன.

ஸ்கொட்லாந்தின் கிளாஸ்கோ நகரிலுள்ள கெல்விங்ரோவ் கலைக்கூடம் (Kelvingrove Art Gallery) மற்றும் ஹண்டேரியன் அருங்காட்சியகம் (The Hunterian Museum) ஆகியன, புதிய சர்வதேச வழிகாட்டுதல்களுக்கு அமைவாக இந்த நடவடிக்கையை எடுத்துள்ளன.

கெல்விங்ரோவ் கலைக்கூடத்தில் காட்சிப்படுத்தப்பட்டிருந்த நெக்த் (Nekht) என்ற பண்டைய எகிப்திய மதகுருவின் மம்மி, பொதுமக்களின் பார்வையிலிருந்து அகற்றப்பட்டுள்ளது.

இறந்த நபரிடமிருந்தோ அல்லது அவரது மூதாதையர்களிடமிருந்தோ ஒப்புதல் பெறப்படவில்லை என்பதே இந்த முடிவுக்கான காரணம் என அருங்காட்சியக நிர்வாகம் தெரிவித்துள்ளது.

“பண்டைய எகிப்திய மனித உடல் எச்சங்களைப் பொதுக் காட்சியிலிருந்து அகற்றுவது, இறந்தவர்களுக்கு அதிக மரியாதை செலுத்தும் நடவடிக்கையாக இருக்கும் என நாங்கள் நம்புகிறோம்”என்று கெல்விங்ரோவ் கலைக்கூடத்தின் சார்பில் அதன் பேச்சாளர் பிபிசியிடம் தெரிவித்துள்ளார்.

இதேபோன்று, கிளாஸ்கோ பல்கலைக்கழகத்தின் நிர்வாகத்தின் கீழ் இயங்கும் ஹண்டேரியன் அருங்காட்சியகமும், லேடி ஷெப்-என்-ஹோர் (Lady Shep-En-Hor) என்ற பெண்ணின் மம்மியைப் பொதுக் காட்சியிலிருந்து அகற்றியுள்ளது.

அவரது அலங்கார வேலைப்பாடுகள் நிறைந்த சவப்பெட்டி 1820ஆம் ஆண்டு முதல் அருங்காட்சியகத்தில் காட்சிப்படுத்தப்பட்டு வந்தது. எனினும், இறந்த பின்னரும் அவருக்கு தனியுரிமை வழங்கப்பட வேண்டும் என்ற அடிப்படையில், அவரது உடல் எச்சங்களைப் பொதுமக்களின் பார்வையிலிருந்து மறைக்கத் தீர்மானிக்கப்பட்டதாக அருங்காட்சியகப் பேச்சாளர் தெரிவித்துள்ளார்.

புதிய சர்வதேச நெறிமுறைகள்

அருங்காட்சியகங்களின் சர்வதேச பேரவை (International Council of Museums – ICOM), கடந்த ஜூன் மாதம் தனது நெறிமுறைக் கோவையைப் புதுப்பித்துள்ளது.

இதன்படி, மனித உடல் எச்சங்களின் உள்ளார்ந்த கண்ணியத்தைப் பாதுகாப்பதுடன், அவற்றின் கலாசார மற்றும் வரலாற்று முக்கியத்துவத்துக்கு உரிய மரியாதை வழங்கப்பட வேண்டும் என வலியுறுத்தப்பட்டுள்ளது.

மேலும், இத்தகைய பொருட்கள் மற்றும் சேகரிப்புகள் தொடர்பான தீர்மானங்களை எடுக்கும்போது, அவை தோற்றம் பெற்ற சமூகங்கள் அல்லது இறந்தவர்களின் வழித்தோன்றல்களுடன் இணைந்து செயற்பட வேண்டும் என்றும் புதிய வழிகாட்டுதல்கள் குறிப்பிடுகின்றன.

மனித உடல் எச்சங்கள் தொடர்ந்தும் கலாசார அல்லது ஆன்மிக முக்கியத்துவத்தைக் கொண்டிருக்கும் சந்தர்ப்பங்களில், அவற்றின் பொதுக் காட்சியைக் கட்டுப்படுத்துவது அல்லது உரிய சூழ்நிலைகளில் அவற்றைத் தாயகத்துக்குத் திருப்பி அனுப்புவது குறித்து அருங்காட்சியகங்கள் பரிசீலிக்க வேண்டும் என்றும் அறிவுறுத்தப்பட்டுள்ளது.

புதுப்பிக்கப்பட்ட நெறிமுறைக் கோவையை அறிமுகப்படுத்தியபோது வெளியிடப்பட்ட அறிக்கையில், காலனித்துவ ஆட்சியின் நீண்டகால மரபுகள் மற்றும் அதன் தாக்கங்கள் அருங்காட்சியகங்கள் எதிர்கொள்ளும் முக்கிய சவால்களில் ஒன்றாகச் சுட்டிக்காட்டப்பட்டுள்ளன.

பண்டைய எகிப்தியர்களின் நம்பிக்கை

பண்டைய எகிப்தியர்கள் மத நம்பிக்கைகளின் அடிப்படையில் இறந்தவர்களின் உடல்களை மம்மிகளாகப் பாதுகாத்தனர். உடல்களைப் பதப்படுத்தி, அவற்றைப் பிரமாண்டமான கல்லறைகளில் அடக்கம் செய்வது அவர்களின் வழக்கமாக இருந்தது.

எகிப்தின் புகழ்பெற்ற பிரமிடுகளில் பலவும் இத்தகைய கல்லறைகளாகவே அமைக்கப்பட்டிருந்தன.

அமெரிக்காவின் ஸ்மித்சோனியன் நிறுவனம் வெளியிட்டுள்ள தகவல்களின்படி, மம்மியாகப் பாதுகாக்கப்பட்ட உடல் ஒருவரின் ஆன்மா அல்லது ஆவியின் இருப்பிடமாக விளங்கும் எனப் பண்டைய எகிப்தியர்கள் நம்பினர். உடல் அழிக்கப்பட்டால், அந்த ஆன்மாவும் தொலைந்து போகக்கூடும் என அவர்கள் கருதினர்.

மம்மிகளை அகற்றுவது கட்டாயமல்ல

எவ்வாறாயினும், அருங்காட்சியகங்களின் சர்வதேச பேரவையின் நெறிமுறைக் கோவை கட்டாயச் சட்டமல்ல; அது வழிகாட்டுதல்களை மட்டுமே வழங்குகிறது.

எனவே, மனித உடல் எச்சங்களைப் பொதுக் காட்சியிலிருந்து அகற்றுவதா அல்லது தொடர்ந்து காட்சிப்படுத்துவதா என்பதைத் தீர்மானிக்கும் அதிகாரம் ஒவ்வொரு அருங்காட்சியகத்திடமும் இருப்பதாக, அந்தப் பேரவையின் நெறிமுறைக் குழுவுடன் தொடர்புடைய கல்வியாளர் ஸ்டெப் ஸ்கோல்டன் (Steph Scholten) பிபிசியிடம் தெரிவித்துள்ளார்.

“இந்த விவகாரங்கள் கவனமாக ஆராயப்பட்டு, உரிய தீர்மானங்கள் எடுக்கப்பட வேண்டும் என்பதையே நெறிமுறைக் கோவை வலியுறுத்துகிறது. குறிப்பிட்ட ஒரு முடிவையே அது கட்டாயப்படுத்தவில்லை” என அவர் குறிப்பிட்டுள்ளார்.

மேலும், மனித உடல் எச்சங்கள் அனைத்தையும் பொதுக் காட்சியிலிருந்து அகற்ற வேண்டும் என நெறிமுறைக் கோவை அறிவுறுத்தவில்லை என்றும் அவர் தெளிவுபடுத்தியுள்ளார்.

இந்நிலையில், இறந்தவர்களின் கண்ணியம், கலாசார மரபுகள் மற்றும் வரலாற்றுப் பாதுகாப்பு ஆகியவற்றுக்கு இடையே சமநிலையைப் பேணுவது தொடர்பான விவாதங்கள், உலகெங்கிலும் உள்ள அருங்காட்சியகங்களில் தொடர்ந்து முக்கியத்துவம் பெற்று வருகின்றன.