158 எம்பிக்களின் ஒற்றுமை நாளை நிரூபிக்கப்படும்: பிரதமர் ஹரிணி
அரசாங்க நாடாளுமன்றக் குழுவின் ஒற்றுமை தொடர்பில் வெளிவந்து கொண்டிருக்கும் ஊகங்களை நிராகரித்துள்ள பிரதமர் கலாநிதி ஹரிணி அமரசூரிய , அரசாங்கத்தின் 158 நாடாளுமன்ற உறுப்பினர்களிடையிலான ஒற்றுமை நாளைய தினம் நிரூபிக்கப்படும் எனத் தெரிவித்துள்ளார்.
நாடாளுமன்றத்தில் இன்று (24) இடம்பெற்ற அரசியல்மைப்பின் 22 ஆவது திருத்தச் சட்டமூலம் மீதான விவாதத்தில் உரையாற்றும்போதே பிரதமர் இதனைத் தெரிவித்துள்ளார்.
அரசாங்கத்தின் நாடாளுமன்ற உறுப்பினர்கள் தனிப்பட்ட நலன்களைத் தாண்டி, ஒரு கூட்டு இலக்கினாலேயே வழிநடத்தப்படுவதாகக் குறிப்பிட்ட பிரதமர், "நாளை மாலை 7 மணியளவில் இந்த நாடாளுமன்றத்தின் நிலைமை என்ன என்பதை அனைவரும் கண்டுகொள்ள முடியும். இந்த 158 உறுப்பினர்களின் ஒற்றுமையை நாளைய தினம் தெளிவாகக் காணக் கூடியதாக இருக்கும்" எனக் கூறியுள்ளார்.
பல்வேறு வதந்திகளும் பிரசாரங்களும் பரப்பப்பட்டு வந்தபோதிலும், 158 நாடாளுமன்ற உறுப்பினர்களுக்கும் இடையிலான பிணைப்பும் ஒற்றுமையும் எள்ளளவும் அசையவில்லை என்றும் அவர் சுட்டிக்காட்டியுள்ளார்.
நாட்டின் தற்போதைய மாற்றத்திற்கு இந்தக் கூட்டு ஒற்றுமை எவ்வாறு பங்களிக்கும் என்பது நாளை மாலை வேளையில் தெளிவடையும் என்றும் பிரதமர் குறிப்பிட்டுள்ளார்.
அத்துடன், இலங்கை ஒரு சிறந்த நாடாக மாற்றமடையும் என்ற நம்பிக்கை பொதுமக்கள் மத்தியில் படிப்படியாக அதிகரித்து வருவதாகத் தெரிவித்த பிரதமர், அண்மையில் இடம்பெற்ற புகைவண்டிப் போராட்டத்தை அதற்குச் சான்றாகக் சுட்டிக்காட்டினார். போராட்டக் காலத்தில் பயணச்சீட்டுகளைப் பெற முடியாதிருந்த பயணிகள் சிலர், அதற்கு அடுத்த நாள் இரு பயணச்சீட்டுகளைப் பெற்று முந்தைய பயணத்திற்கான கட்டணத்தை ஈடுசெய்த நிகழ்வை நினைவுகூர்ந்தார்.
"இது ஒரு சிறிய செயலாகத் தோன்றினாலும், இந்த நாட்டைச் சிறந்ததாக மாற்ற முடியும் என்ற மக்களின் ஆழமான நம்பிக்கையையே இது காட்டுகிறது" என அவர் குறிப்பிட்டுள்ளார்.
சிறந்த பொதுச்சேவை, நேர்மையான தலைவர்கள், மக்களுக்குப் பொறுப்புக்கூறும் அரச நிறுவனங்கள் மற்றும் சுயாதீனமான, நீதியான நீதித்துறை என்பவற்றையே மக்கள் எதிர்பார்க்கின்றனர் என்றும், மக்களின் இந்த நம்பிக்கை அரசாங்கத்தின் சீர்திருத்த நடவடிக்கைகளுக்குப் பெரும் பலமாக அமைகின்றது என்றும் பிரதமர் மேலும் தெரிவித்தார்.
