அனோஜன் மரண தண்டனை: பகிரங்கக் கருத்துகளைத் தவிர்க்க சுமந்திரன் கோரிக்கை
சவூதி அரேபியாவில் மரண தண்டனையை எதிர்நோக்கியுள்ள சிவராசா அனோஜனின் வழக்கைப் பொறுத்தமட்டில், பகிரங்க வெளியில் "தூண்டும் வகையிலான" கருத்துகளைப் பகிர்வதை பொதுமக்கள் தவிர்க்க வேண்டும் என இலங்கைத் தமிழரசுக்கட்சியின் (ITAK) பொதுச்செயலாளர் எம்.ஏ.சுமந்திரன் பணிவான வேண்டுகோள் விடுத்துள்ளார்.
இது தொடர்பில் அவர் வெளியிட்டுள்ள அறிக்கையில், இன, மத எல்லைகளைக் கடந்து அனைத்துச் சமூகத் தலைவர்களும், குறிப்பாக முஸ்லிம் அரசியல் மற்றும் மதத் தலைவர்களும் அனோஜனுக்குப் பொதுமன்னிப்புப் பெற்றுக்கொடுத்து, மரண தண்டனையை ரத்து செய்வதற்காக தீவிரமாக உழைத்து வருகின்றனர் என்று சுட்டிக்காட்டியுள்ளார். இருப்பினும், சில "தீய சக்திகள்" முஸ்லிம் சகோதரர்களைத் தூண்டிவிடும் நோக்கில் பகிரங்க வெளியில் கருத்துகளைப் பரப்பி, இந்த ஒற்றுமையைக் சீர்குலைக்கவும் முயற்சிகளைத் திசைதிருப்பவும் முனைவதாக அவர் குறிப்பிட்டுள்ளார்.
இவ்வாறான செயல்கள் துரதிஷ்டவசமானவை என்றும், அனோஜனின் நலன்களுக்குப் பாதகமானவை என்றும் வர்ணித்த சுமந்திரன், அனோஜனுக்குப் பொதுமன்னிப்பு கோருவதைத் தவிர வேறு எந்தவொரு கருத்தையும் பகிரங்கமாகப் பகிர்வது ஆபத்தானதுடன், தூதரக ரீதியிலான முயற்சிகளையும் பாதிக்கும் என எச்சரித்துள்ளார்.
உயிரைக் காப்பாற்றும் இந்த முயற்சிகள் வெற்றியடைவதை உறுதிசெய்ய பொதுமக்கள் தங்களது நாவடக்கத்தைப் பேண வேண்டும் என்றும், சிவராசா அனோஜனுக்குப் பொதுமன்னிப்பு வழங்குமாறு சவூதி அரேபிய ராஜ்யத்திடம் கோரிக்கை விடுப்பதுடன் அவருக்காகப் பிரார்த்தனை செய்யுமாறும் அவர் வேண்டுகோள் விடுத்துள்ளார். மேலும், இதுகுறித்த பதிவுகளில் தேவையற்ற கருத்துகளைப் பதிவிடுவதைத் தவிர்க்குமாறும் அவர் அறிவுறுத்தியுள்ளார்.
