ஃபிட்ச் தரவுயர்வு: பொருளாதார சீர்திருத்தத்தின் முன்னேற்றம் என்கிறார் மத்திய வங்கி ஆளுநர்!
இலங்கையின் கடன் தரநிலையை 'ஃபிட்ச் ரேட்டிங்ஸ்' (Fitch Ratings) நிறுவனம் உயர்த்தியுள்ளமையானது, நாட்டில் முன்னெடுக்கப்பட்டு வரும் பேரினப் பொருளாதார உறுதிப்பாடு மற்றும் சீர்திருத்தங்களின் தொடர்ச்சியான முன்னேற்றத்தையே பிரதிபலிக்கின்றது என இலங்கை மத்திய வங்கியின் ஆளுநர் கலாநிதி நந்தலால் வீரசிங்க தெரிவித்துள்ளார்.
ஆசிய மற்றும் பசிபிக் பிராந்திய மேம்பாட்டு நிதி நிறுவனங்களின் அமைப்பின் 49 ஆவது வருடாந்த பொதுக்கூட்டம் செப்டம்பர் 23 ஆம் திகதி நடைபெற்றது. இதில் கலந்துகொண்டு உரையாற்றும் போதே அவர் மேற்கண்டவாறு குறிப்பிட்டார்.
இலங்கை கடந்து வந்த கடுமையான பொருளாதார நெருக்கடியைத் தொடர்ந்து, தற்போது மீண்டும் ஸ்திரத்தன்மை ஏற்படுத்தப்பட்டுள்ளதாகக் குறிப்பிட்ட ஆளுநர், இந்த மீட்சி நிலமையானது நாட்டின் அடுத்தகட்ட வளர்ச்சிப் பாதைக்கு மிக வலுவான அடித்தளத்தை அமைத்துக் கொடுத்துள்ளது என்றும் சுட்டிக்காட்டினார்.
தொடர்ந்து உரையாற்றிய அவர், "நாட்டின் பேரினப் பொருளாதார உறுதிப்பாடு மற்றும் சீர்திருத்தங்களின் தொடர்ச்சியான முன்னேற்றத்தை அங்கீகரிக்கும் வகையில், ஃபிட்ச் ரேட்டிங்ஸ் நிறுவனம் இலங்கையின் கடன் தரநிலையை 'CCC+' என்ற நிலையிலிருந்து 'B-' ஆக உயர்த்தியுள்ளதுடன், அதன் தொலைநோக்கு பார்வையை 'நிலையானது'எனவும் அறிவித்துள்ளது," எனத் தெரிவித்தார்.
மேலும், தற்போதைய சூழலில் பொருளாதார ஸ்திரத்தன்மையை அடைவதோடு நின்றுவிடாமல், அதனை நிலையான முதலீடுகள் , உயர் உற்பத்தித்திறன் மற்றும் நீண்டகால பொருளாதார வளர்ச்சியை நோக்கியதாக மாற்றுவதிலேயே தமது முழுமையான கவனம் குவிக்கப்பட்டுள்ளதாகவும் மத்திய வங்கி ஆளுநர் கலாநிதி நந்தலால் வீரசிங்க மேலும் வலியுறுத்தினார்.
