150 மி.மீ.க்கும் அதிகமான மழை – மூன்று மாவட்டங்களுக்கு சிவப்பு எச்சரிக்கை!

இலங்கையில் தொடர்ச்சியாகப் பெய்து வரும் கடும் மழை காரணமாக, களுத்துறை, நுவரெலியா மற்றும் இரத்தினபுரி ஆகிய மாவட்டங்களின் பல பகுதிகளுக்கு தேசிய கட்டிட ஆராய்ச்சி நிறுவனம் (NBRO) மூன்றாம் நிலை சிவப்பு மண்சரிவு அபாய எச்சரிக்கையை விடுத்துள்ளது.

குறித்த பகுதிகளில் தொடர்ச்சியாகக் கடும் மழை பெய்யும் பட்சத்தில், மண்சரிவு அபாயம் உள்ள இடங்களில் வசிக்கும் மக்கள் உடனடியாகப் பாதுகாப்பான இடங்களுக்கு வெளியேறுமாறு அறிவுறுத்தப்பட்டுள்ளனர்.

ஒக்டோபர் 26ஆம் திகதி மாலை 6 மணி முதல் ஒக்டோபர் 27ஆம் திகதி மாலை 6 மணி வரை அமுலில் இருக்கும் இந்த எச்சரிக்கையின்படி, 24 மணித்தியாலங்களில் 150 மில்லிமீற்றருக்கும் அதிகமான மழைவீழ்ச்சி பதிவாகியுள்ள பகுதிகளுக்கு சிவப்பு எச்சரிக்கை விடுக்கப்பட்டுள்ளது.

சிவப்பு எச்சரிக்கை விடுக்கப்பட்டுள்ள பகுதிகள்:

களுத்துறை மாவட்டம்:  
• புலத்சிங்கள  
• தொடங்கொடை  

நுவரெலியா மாவட்டம்:  
• அம்பகமுவ கோரளை  
• நோர்வூட்  

இரத்தினபுரி மாவட்டம்: 
• குருவிட்ட  
• அயகம  
• ஓபநாயக்க  
• எலபாத்த  
• பெல்மதுளை  
• இரத்தினபுரி  

இதற்கிடையில், 24 மணித்தியாலங்களில் 100 மில்லிமீற்றருக்கும் அதிகமான மழைவீழ்ச்சி பதிவாகும் பகுதிகளில் முன்னெச்சரிக்கையுடன் வெளியேறத் தயாராக இருக்குமாறு அறிவுறுத்தும் இரண்டாம் நிலை அம்பர் எச்சரிக்கையும் ஒன்பது மாவட்டங்களின் பல பகுதிகளுக்கு நீடிக்கப்பட்டுள்ளது.

இதில் கம்பஹா, கண்டி, கேகாலை மற்றும் குருநாகல் உள்ளிட்ட மாவட்டங்களின் சில பகுதிகளும் அடங்குகின்றன.

மேலும், 75 மில்லிமீற்றருக்கும் அதிகமான மழைவீழ்ச்சி பதிவாகும் பகுதிகளுக்கு முதலாம் நிலை மஞ்சள் எச்சரிக்கையும் அமுலில் உள்ளது.

மண்சரிவு அபாய அறிகுறிகள் தொடர்பில் அவதானம்!

மலைச்சரிவுகள் மற்றும் பள்ளத்தாக்குப் பகுதிகளில் வசிக்கும் மக்கள் மண்சரிவு ஏற்படுவதற்கு முன்னர் தென்படக்கூடிய அறிகுறிகள் குறித்து மிகுந்த அவதானத்துடன் இருக்குமாறு அதிகாரிகள் அறிவுறுத்தியுள்ளனர்.

நிலத்தில் வெடிப்புகள் ஏற்படுதல், மரங்கள் சாய்வடைதல் மற்றும் திடீரென சேற்று நீரூற்றுகள் தோன்றுதல் போன்ற அறிகுறிகள் தென்பட்டால் உடனடியாக அவதானத்துடன் செயற்பட வேண்டும்.

அத்துடன், அனர்த்த முகாமைத்துவ அதிகாரிகளின் அறிவுறுத்தல்களைப் பின்பற்றி, உயிர் மற்றும் உடைமைகளைப் பாதுகாப்பதற்கான முன்னெச்சரிக்கை நடவடிக்கைகளை மேற்கொள்ளுமாறும் பொதுமக்களிடம் கேட்டுக்கொள்ளப்பட்டுள்ளது.