“நாங்கள் SJB கட்சியின் அடிமைகள் அல்ல” – சஜித் பிரேமதாசவின் அரசியல் போக்கை விமர்சிக்கும் ரிஷாட் பதியுதீன்

ஐக்கிய மக்கள் சக்தியின் (SJB) தற்போதைய அரசியல் போக்கு குறித்து அதிருப்தி வெளியிட்டுள்ள முன்னாள் அமைச்சரும் அகில இலங்கை மக்கள் காங்கிரஸின் (ACMC) தலைவருமான ரிஷாட் பதியுதீன், எதிர்க்கட்சித் தலைவர் சஜித் பிரேமதாச தனது அரசியல் கூட்டணி உருவாக்கப்பட்ட கொள்கைகளிலிருந்து விலகிச் செல்லக்கூடாது என எச்சரித்துள்ளார்.

“நாங்கள் SJB கட்சியின் அடிமைகள் அல்ல. SJB என்பது ஓர் அரசியல் கட்சி. அந்தக் கூட்டணியில் நாங்கள் பங்காளிகள்” என ரிஷாட் பதியுதீன் தெரிவித்துள்ளார்.

இரண்டு ஜனாதிபதித் தேர்தல்களின்போதும் சஜித் பிரேமதாசவுக்கு ஆதரவளிப்பதற்காகத் தமது கட்சி கடுமையாக உழைத்ததாக அவர் குறிப்பிட்டுள்ளார். இதற்காகத் தமது ஆதரவாளர்கள் மில்லியன் கணக்கான ரூபாய்களைச் செலவிட்டு, இரவு பகலாகத் தேர்தல் பிரசாரங்களில் ஈடுபட்டதாகவும் அவர் தெரிவித்துள்ளார்.

“எமது மக்களின் வாக்குகளை ஒன்றிணைத்து கூட்டணிக்கு வழங்கினோம். எமது கட்சிகளுக்கு இடையிலான ஒப்பந்தங்களின் அடிப்படையிலேயே தேசியப் பட்டியல் நியமனங்கள், நாடாளுமன்றப் பதவிகள் மற்றும் அமைச்சுப் பொறுப்புகள் பகிர்ந்தளிக்கப்பட்டன” என அவர் கூறியுள்ளார்.

ஜனாதிபதித் தேர்தலின்போது SJB கட்சி கடைப்பிடித்த அரசியல் நிலைப்பாட்டிலிருந்து தற்போது விலகிச் செல்வதாகத் தமக்குத் தோன்றுவதாகவும் ரிஷாட் பதியுதீன் கவலை வெளியிட்டுள்ளார்.

“அவர்களின் தற்போதைய அணுகுமுறை எனக்கு வருத்தமளிக்கிறது. ஜனாதிபதித் தேர்தலின்போது அவர்கள் கொண்டிருந்த நிலைப்பாட்டிலிருந்து விலகிச் செல்வதாக எனக்குத் தெரிகிறது” என அவர் தெரிவித்துள்ளார்.

இந்த விவகாரம் தொடர்பில் சஜித் பிரேமதாசவுடன் தொலைபேசியில் நேரடியாகத் தொடர்புகொண்டு தனது கவலைகளைத் தெரிவித்ததாகவும் ரிஷாட் பதியுதீன் குறிப்பிட்டுள்ளார்.

“அவரது கொள்கைகள் மற்றும் அரசியல் கோட்பாடுகளை நம்பியே நாம் அவருக்கு ஆதரவளித்தோம் என்று அவரிடம் தெரிவித்தேன். அரசியல் பின்னடைவுகள் ஏற்பட்டாலும், அந்தக் கொள்கைகளில் அவர் சமரசம் செய்துகொள்ளக்கூடாது” எனத் தாம் வலியுறுத்தியதாக அவர் கூறியுள்ளார்.

ஜனாதிபதி அநுர குமார திஸாநாயக்க தலைமையிலான தேசிய மக்கள் சக்தியின் (NPP) தேர்தல் வெற்றி குறித்துக் கருத்துத் தெரிவித்த ரிஷாட் பதியுதீன், அரசியல் கொள்கைகள் மீதான மக்களின் நம்பிக்கையே தேர்தல் வெற்றியில் முக்கிய பங்கு வகிப்பதாகக் குறிப்பிட்டுள்ளார்.

இனவாதம் மற்றும் மதத் தீவிரவாதத்திற்கு எதிரான நிலைப்பாடு, அத்துடன் நாட்டின் கட்டமைப்பில் மாற்றங்களை ஏற்படுத்துவதாக வழங்கிய வாக்குறுதி ஆகியவற்றை மக்கள் நம்பியதாலேயே NPP கட்சிக்கு ஆதரவளித்ததாகவும் அவர் தெரிவித்துள்ளார்.

இலங்கையின் கடந்தகால அனுபவங்கள் இனவாதமும் மதத் தீவிரவாதமும் நாட்டுக்கும் அதன் சமூகங்களுக்கும் எதிர்காலத் தலைமுறையினருக்கும் பாதிப்பை ஏற்படுத்தும் என்பதை எடுத்துக்காட்டியுள்ளதாகவும் ரிஷாட் பதியுதீன் சுட்டிக்காட்டியுள்ளார்.

SJB கட்சியின் அண்மைக்கால அரசியல் செயற்பாடுகள் தொடர்பில் தமக்கு இன்னமும் அதிருப்தி நிலவுவதாகத் தெரிவித்த அவர், அரசியல் கட்சிகள் தமது அடிப்படைக் கொள்கைகளிலிருந்து விலகிச் செல்லக்கூடாது என்பதையும் வலியுறுத்தியுள்ளார்.

கடந்த 2024ஆம் ஆண்டு ஆகஸ்ட் மாதம், ஜனாதிபதித் தேர்தலில் சஜித் பிரேமதாசவை ஆதரிப்பதற்காக அகில இலங்கை மக்கள் காங்கிரஸ், SJB தலைமையிலான கூட்டணியுடன் உத்தியோகபூர்வ ஒப்பந்தத்தில் கைச்சாத்திட்டு அவருக்கு ஆதரவு தெரிவித்திருந்தமை குறிப்பிடத்தக்கது.