ஞானசார தேரருக்கு உடனடியாக ஜனாதிபதி மன்னிப்பு வழங்க வேண்டும் – ஐ.தே.க. வலியுறுத்தல்
கலகொட அத்தே ஞானசார தேரருக்கு உடனடியாக ஜனாதிபதி மன்னிப்பு வழங்கப்பட வேண்டும் என ஐக்கிய தேசியக் கட்சி (ஐ.தே.க.) வலியுறுத்தியுள்ளது.
மூன்று பிரதான பௌத்த பீடங்களின் மகாநாயக்க தேரர்களின் தலையீட்டுடன், இந்த விவகாரத்துக்கு அரசாங்கம் தீர்வு காண வேண்டும் என்றும் அக்கட்சி கோரிக்கை விடுத்துள்ளது.
ஒக்டோபர் 26ஆம் திகதி வெளியிட்ட அறிக்கையிலேயே ஐக்கிய தேசியக் கட்சி இந்தக் கோரிக்கையை முன்வைத்துள்ளது.
ஞானசார தேரரை விடுதலை செய்யுமாறு வலியுறுத்தி முன்னெடுக்கப்பட்டு வந்த சத்தியாக்கிரகப் போராட்டம், மகாநாயக்க தேரர்களின் அறிவுறுத்தல்களுக்கு அமைய தற்காலிகமாக இடைநிறுத்தப்பட்டுள்ளதாகவும் கட்சி தனது அறிக்கையில் குறிப்பிட்டுள்ளது.
நீதிமன்றத்தை அவமதித்த குற்றத்துக்காக விதிக்கப்படக்கூடிய அதிகபட்ச சிறைத்தண்டனை 18 மாதங்கள் என முன்னாள் பிரதம நீதியரசர் சரத் என். சில்வா தெரிவித்துள்ள கருத்தையும் ஐக்கிய தேசியக் கட்சி சுட்டிக்காட்டியுள்ளது.
இந்தக் குற்றத்துக்காக ஞானசார தேரர் ஏற்கெனவே 10 மாதங்களுக்கும் மேலாக சிறைத்தண்டனையை அனுபவித்துள்ளதாகவும் அக்கட்சி தெரிவித்துள்ளது.
மேலும், மகாநாயக்க தேரர்களின் கோரிக்கையைத் தொடர்ந்து ஞானசார தேரருக்கு முன்னர் ஜனாதிபதி மன்னிப்பு வழங்கப்பட்டிருந்ததையும் ஐக்கிய தேசியக் கட்சி நினைவூட்டியுள்ளது.
அத்துடன், ஞானசார தேரருக்கு மீண்டும் ஜனாதிபதி மன்னிப்பு வழங்குவது தொடர்பில் பரிசீலிக்க முடியும் என உச்ச நீதிமன்றமும் தனது தீர்ப்பில் சுட்டிக்காட்டியுள்ளதாக அக்கட்சி குறிப்பிட்டுள்ளது.
இதற்கிடையில், ஞானசார தேரரை விடுதலை செய்யக் கோரி முன்னெடுக்கப்பட்ட ஊர்வலத்திலோ அல்லது சத்தியாக்கிரகப் போராட்டத்திலோ பங்கேற்காத பௌத்த பிக்குகளுக்கு எதிராகவும் நீதிமன்ற உத்தரவுகளைப் பெற்றுக்கொண்ட அரசாங்கத்தின் நடவடிக்கையை ஐக்கிய தேசியக் கட்சி விமர்சித்துள்ளது.
இத்தகைய நடவடிக்கைகள் பாரிய தவறுகள் எனக் குறிப்பிட்டுள்ள அக்கட்சி, ஞானசார தேரரின் காவி உடையைக் களைய உத்தரவிட்டவர்களுக்கு எதிராகவும் விசாரணை நடத்தப்பட வேண்டும் எனக் கோரியுள்ளது.
எனவே, தற்போது நீடித்து வரும் சர்ச்சைக்கு முற்றுப்புள்ளி வைக்கும் வகையில், மூன்று பிரதான பௌத்த பீடங்களின் மகாநாயக்க தேரர்களின் தலையீட்டுடன் ஞானசார தேரருக்கு உடனடியாக ஜனாதிபதி மன்னிப்பு வழங்கப்பட வேண்டும் என ஐக்கிய தேசியக் கட்சி வலியுறுத்தியுள்ளது.
