மோடியின் பௌத்த மதப் பாதுகாப்பு முயற்சிகளைப் பாராட்டிய இலங்கை பிக்கு – இந்திய அமைச்சர் விசேட செய்தி பகிர்வு!

உலகளாவிய ரீதியில் பௌத்த மதத்தைப் பாதுகாத்து மேம்படுத்துவதற்காக இந்தியப் பிரதமர் நரேந்திர மோடி முன்னெடுத்து வரும் நடவடிக்கைகளைப் பாராட்டி, இலங்கை பௌத்த பிக்கு வணக்கத்திற்குரிய பொரெல்லே சீலதஸ்ஸன தேரர் வெளியிட்ட விசேட செய்தியை இந்திய கலாசார மற்றும் சுற்றுலாத்துறை அமைச்சர் கஜேந்திர சிங் ஷெகாவத் பகிர்ந்துள்ளார்.

அபிதம்ம தினத்தை முன்னிட்டு சமூக ஊடகமான எக்ஸ் (X) தளத்தில் வெளியிட்ட பதிவில், இலங்கையில் இயங்கும் சிஹநாத சர்வதேச தியான சமூகத்தைப் பிரதிநிதித்துவப்படுத்தும் சீலதஸ்ஸன தேரரின் செய்தியை அமைச்சர் பகிர்ந்துள்ளார்.

சர்வதேச பௌத்த கூட்டமைப்பின் (IBC) அழைப்பின் பேரில் இந்தச் செய்தியை வழங்கிய தேரர், உலகளாவிய பௌத்த சமூகத்தை வலுப்படுத்துவதற்காக இந்தியா முன்னெடுத்து வரும் ஆன்மிக இராஜதந்திர நடவடிக்கைகள், புனித பௌத்த தாதுக்களைப் பகிர்ந்தளித்தல் மற்றும் பௌத்த மரபுரிமைகளைப் பாதுகாத்தல் ஆகியவற்றைப் பாராட்டியுள்ளார்.

பிரதமர் நரேந்திர மோடியை நோக்கி உரையாற்றிய அவர், இந்தியாவின் முயற்சிகள் உலகெங்கிலும் உள்ள பௌத்தர்களுக்குப் புனித தாதுக்களை வழிபடுவதற்கும், சாரநாத், புத்தகயா மற்றும் குஷிநகர் போன்ற முக்கிய பௌத்த புனிதத் தலங்களுக்குச் செல்வதற்கும் வாய்ப்புகளை ஏற்படுத்தியுள்ளதாகக் குறிப்பிட்டுள்ளார்.

அத்துடன், பாலி மொழியைச் செம்மொழியாக இந்தியா அங்கீகரித்துள்ள தீர்மானத்தையும் அவர் வரவேற்றுள்ளார். புத்தபெருமானின் மூல போதனைகளைப் பாதுகாப்பதில் இது முக்கியமானதொரு முன்னெடுப்பு எனவும் அவர் தெரிவித்துள்ளார்.

பௌத்த மதத்தைப் பாதுகாப்பது என்பது வரலாற்றுச் சிறப்புமிக்க இடங்களையும் புனித தாதுக்களையும் பாதுகாப்பதுடன் மட்டும் மட்டுப்படுத்தப்படக் கூடாது எனத் தெரிவித்த தேரர், தம்மத்தை நடைமுறையில் கடைப்பிடிப்பதற்கும் அதன் கோட்பாடுகளை ஆழமாகப் புரிந்துகொள்வதற்கும் முக்கியத்துவம் அளிக்கப்பட வேண்டும் என வலியுறுத்தியுள்ளார்.

இலங்கைக்கும் இந்தியாவுக்கும் இடையிலான வரலாற்று ரீதியான பௌத்த உறவுகளை நினைவுகூர்ந்த அவர், அரஹத் மகிந்த தேரர் இலங்கைக்கு வருகை தந்த வரலாற்றையும், இந்தியப் பேரரசர் அசோகருக்கும் இலங்கை மன்னன் தேவநம்பியதீசனுக்கும் இடையிலான நெருங்கிய தொடர்புகளையும் சுட்டிக்காட்டியுள்ளார்.

பௌத்த போதனைகளை எதிர்காலத் தலைமுறையினருக்காகப் பாதுகாப்பதற்கு சர்வதேச பௌத்த கூட்டமைப்பு, இந்திய மற்றும் இலங்கை அரசாங்கங்கள், பௌத்த மதத் தலைவர்கள் ஆகியோருக்கு இடையிலான ஒத்துழைப்பை மேலும் வலுப்படுத்த வேண்டும் என்றும் அவர் அழைப்பு விடுத்துள்ளார்.

இதற்கிடையில், தனது பதிவில் பிரதமர் மோடியின் தலைமைத்துவத்துக்கு நன்றியைத் தெரிவித்த அமைச்சர் கஜேந்திர சிங் ஷெகாவத், சர்வதேச பௌத்த சமூகத்துடன் பரஸ்பர மரியாதை, கலாசாரப் புரிந்துணர்வு மற்றும் ஆன்மிக உறவுகளை வலுப்படுத்துவதற்காக இந்திய அரசாங்கம் முன்னெடுத்து வரும் நடவடிக்கைகளையும் எடுத்துரைத்துள்ளார்.

இந்தியாவுக்கும் இலங்கைக்கும் இடையிலான வரலாற்று மற்றும் ஆன்மிகத் தொடர்புகளைச் சுட்டிக்காட்டிய அவர், இரு நாடுகளும் பகிர்ந்துகொள்ளும் பௌத்த மரபுரிமை அவற்றை ஒன்றிணைப்பதாகக் குறிப்பிட்டுள்ளார்.

மேலும், பிரதமர் மோடியின் “அனைவருடனும் இணைந்து, அனைவரின் முன்னேற்றத்திற்காக” (Sabka Saath, Sabka Vikas) என்ற கொள்கை, உலகளாவிய பௌத்த சமூகத்துடனான இந்தியாவின் உறவுகளை முன்னெடுப்பதற்குத் தொடர்ந்து ஊக்கமளிப்பதாகவும் அமைச்சர் தெரிவித்துள்ளார்.

பௌத்த மரபின்படி, புத்தபெருமான் தாவதிம்ச தேவலோகத்திற்குச் சென்று அபிதம்ம போதனைகளை வழங்கிய பின்னர் மீண்டும் மனித உலகிற்குத் திரும்பியதை நினைவுகூரும் வகையில் அபிதம்ம தினம் அனுஷ்டிக்கப்படுகிறது.