பொலிஸ் காவலில் 29 வயது இளைஞர் உயிரிழப்பு – மூன்று பொலிஸ் அதிகாரிகள் பணி இடைநிறுத்தம்!
பொலிஸ் காவலில் இருந்த 29 வயதுடைய சந்தேகநபர் ஒருவர் உயிரிழந்த சம்பவம் தொடர்பில், ஹோமாகம பொலிஸ் நிலையத்தின் குற்றப் பிரிவுக்குப் பொறுப்பான பொலிஸ் பரிசோதகர் மற்றும் இரண்டு உப பொலிஸ் பரிசோதகர்கள் உள்ளிட்ட மூன்று பொலிஸ் அதிகாரிகள் பணி இடைநிறுத்தம் செய்யப்பட்டுள்ளனர்.
நிர்வாக ரீதியிலான குறைபாடுகள் இடம்பெற்றதாகக் கூறப்படும் குற்றச்சாட்டுகளின் அடிப்படையில் இந்த நடவடிக்கை எடுக்கப்பட்டுள்ளது.
கிரிவத்துடுவ பகுதியைச் சேர்ந்த இஷார ஹர்ஷ குமார என்ற 29 வயதுடைய இளைஞர், போதைப்பொருள் தொடர்பான விசாரணையொன்றுக்காக கடந்த ஒக்டோபர் 25ஆம் திகதி பொலிஸ் காவலில் எடுக்கப்பட்டிருந்த நிலையில் உயிரிழந்துள்ளார்.
சந்தேகநபர் ஹோமாகம பொலிஸ் நிலையத்தில் தடுத்து வைக்கப்பட்டிருந்தபோது, பொலிஸ் அதிகாரிகளால் கடுமையாகத் தாக்கப்பட்டதாக அவரது குடும்பத்தினர் குற்றஞ்சாட்டியுள்ளனர்.
விசாரணைக்காக அழைத்துச் செல்லப்பட்ட பின்னர், அவரால் நடக்க முடியாத நிலை ஏற்பட்டதாகவும், இதனால் பல பொலிஸ் அதிகாரிகள் அவரைத் தூக்கிச் செல்ல வேண்டியிருந்ததாகவும் உறவினர்கள் தெரிவித்துள்ளனர்.
மேலும், அவரது உடலில் வெளிப்படையான காயங்கள் காணப்பட்டதுடன், இரத்தம் வடிந்த நிலையில் மீண்டும் பொலிஸ் அறைக்குள் அழைத்துச் செல்லப்பட்டதாகவும் குடும்பத்தினர் குற்றஞ்சாட்டியுள்ளனர்.
மருத்துவ உதவி வழங்குமாறு பலமுறை கோரிக்கை விடுத்த பின்னரே, அவரை ஹோமாகம ஆதார வைத்தியசாலைக்கு அழைத்துச் செல்ல பொலிஸார் நடவடிக்கை எடுத்ததாகவும், எனினும், வைத்தியசாலையைச் சென்றடைந்தபோது அவர் ஏற்கெனவே உயிரிழந்திருந்ததாகவும் உறவினர்கள் தெரிவித்துள்ளனர்.
எவ்வாறாயினும், பொலிஸ் காவலில் இருந்த சந்தேகநபருக்கு திடீரென உடல்நலக் குறைவு ஏற்பட்டதாகவும், வைத்தியசாலையில் அனுமதிக்கப்பட்ட பின்னர் அவர் உயிரிழந்ததாகவும் பொலிஸார் தெரிவித்துள்ளனர்.
உயிரிழப்புக்கான காரணத்தைக் கண்டறிவதற்காக, ஹோமாகம நீதவான் நீதிமன்றம் பிரேதப் பரிசோதனை நடத்த உத்தரவிட்டுள்ளது. அத்துடன், ஹோமாகம உதவிப் பொலிஸ் அத்தியட்சகரின் மேற்பார்வையில் ஆரம்பகட்ட விசாரணைகளும் முன்னெடுக்கப்பட்டுள்ளன.
இதேவேளை, சம்பவம் தொடர்பில் விரைவானதும் சுயாதீனமானதுமான விசாரணையை முன்னெடுக்குமாறு பொது மக்கள் பாதுகாப்பு அமைச்சர் ஆனந்த விஜேபால, பொலிஸ் மா அதிபர் பிரியந்த வீரசூரியவுக்கு அறிவுறுத்தியுள்ளார்.
பிரேதப் பரிசோதனை அறிக்கை மற்றும் விசாரணைகளின் முடிவுகளின் அடிப்படையில், உரிய சட்ட நடவடிக்கைகளை மேற்கொள்ளுமாறும் அமைச்சர் பணிப்புரை விடுத்துள்ளார்.
