வழக்குகளிலிருந்து விடுவிக்கப்பட்டதைத் தொடர்ந்து உதய கம்மன்பில புதிய புத்தகம் வெளியிடத் திட்டம்!

ஆஸ்திரேலிய தொழிலதிபர் பிரையன் ஷாடிக் என்பவருக்குச் சொந்தமான நிறுவனப் பங்குகளைத் தவறாகப் பயன்படுத்தியதாகத் தொடரப்பட்ட இரண்டாவது வழக்கிலிருந்தும் விடுவிக்கப்பட்டதைத் தொடர்ந்து, பிவிதுரு ஹெல உருமயவின் தலைவரும் முன்னாள் பாராளுமன்ற உறுப்பினருமான உதய கம்மன்பில தாம் எதிர்கொண்ட 11 ஆண்டுகால சட்டப் போராட்டம் குறித்துப் புத்தகம் ஒன்றை வெளியிடத் திட்டமிட்டுள்ளதாகத் தெரிவித்துள்ளார்.

கொழும்பில் நேற்று செவ்வாய்க்கிழமை நடைபெற்ற ஊடகவியலாளர் சந்திப்பில் கலந்துகொண்டு கருத்து வெளியிடுகையிலேயே அவர் இதனைக் குறிப்பிட்டார்.

“மகே அவனடுவ” (எனது நீதி மறுப்பு) எனும் தலைப்பில் வெளியாகவுள்ள இந்தப் புத்தகத்தின் ஊடாக, அரசியல்வாதிகள், சில பொலிஸ் அதிகாரிகள் மற்றும் சட்டமா அதிபர் திணைக்களத்தின் அதிகாரிகள் சட்டத்தை எவ்வாறு துஷ்பிரயோகம் செய்தனர் என்பதைத் தெளிவுபடுத்தவுள்ளதாக அவர் கூறினார்.

ஒரே பங்குப் பரிவர்த்தனை தொடர்பில் தொடரப்பட்ட இவ்விரு வழக்குகளும் தம்மைப் பழிவாங்கும் நோக்கிலேயே தாக்கல் செய்யப்பட்டதாகக் குறிப்பிட்ட கம்மன்பில, இது தொடர்பான முதலாவது வழக்கிலிருந்து 2025 ஆம் ஆண்டு மார்ச் மாதம் விடுவிக்கப்பட்டமை குறிப்பிடத்தக்கது.

தாம் கடந்த 11 ஆண்டுகளாக நீதிமன்ற நடவடிக்கைகளை எதிர்கொண்டதுடன், 13 நாட்கள் விளக்கமறியலிலும் அடைக்கப்பட்டிருந்ததாகத் தெரிவித்த உதய கம்மன்பில, தமக்காகக் கட்டணம் எதுவுமின்றி ஆஜராகிய சட்டத்தரணிகளுக்கும் இதன்போது தமது நன்றியைத் தெரிவித்துக்கொண்டார்.