பேஸ்லைன் வீதி விரிவாக்கத் திட்டத்திற்கு அமைச்சரவை அனுமதி: 2.89 பில்லியன் ரூபா ஒப்பந்தம்
கொழும்பு பேஸ்லைன் வீதியை விரிவுபடுத்தும் திட்டத்தின் மூன்றாம் கட்டப் பணிகளுக்காக 2.89 பில்லியன் ரூபா பெறுமதியான ஒப்பந்தத்தை ‘மேகா என்ஜினீயரிங்’நிறுவனத்திற்கு வழங்குவதற்கு அமைச்சரவை அங்கீகாரம் அளித்துள்ளது.
போக்குவரத்து, நெடுஞ்சாலைகள் மற்றும் நகர அபிவிருத்தி அமைச்சரினால் சமர்ப்பிக்கப்பட்ட முன்மொழிவுக்கு அமைவாகவே இந்தத் திட்டத்திற்கு அனுமதி வழங்கப்பட்டுள்ளது.
இத்திட்டத்தின் கீழ், கொழும்பு - ஹோரண வீதியில் கிருலப்பனைச் சந்தியிலிருந்து துடுகெமுனு வீதி வரையிலான 0.86 கிலோமீற்றர் நீளமுடைய வீதிப் பகுதி, ஆறு வழிப் பாதையாக தரம் உயர்த்தப்படவுள்ளது.
மேலும், இப் அபிவிருத்தித் திட்டத்தின் கீழ் நிலத்தடிப் பாதை , சமிக்ஞை விளக்குகளுடன் கூடிய சந்திகள், பாதசாரிகளுக்கான வசதிகள் மற்றும் வடிகால் அமைப்புகளைச் சீரமைக்கும் பணிகளும் முன்னெடுக்கப்படவுள்ளன.
தேசிய போட்டித்தன்மை வாய்ந்த ஏலப் நடைமுறையின் கீழ் இத்திட்டத்திற்கான ஏலங்கள் கோரப்பட்டிருந்த நிலையில், மொத்தம் ஏழு ஏலங்கள் பெறப்பட்டு பரிசீலிக்கப்பட்டன.
அதன்படி, பெறப்பட்ட ஏலங்களை மதிப்பீடு செய்த உயர் மட்டக் கொள்முதல் குழு, குறைந்த தொகையைக் குறிப்பிட்ட தகுதியான நிறுவனமான ‘மேகா என்ஜினீயரிங்’ நிறுவனத்திற்கு இவ்வாணையை வழங்குவதற்குப் பரிந்துரை செய்தது.
இதனடிப்படையில், பெறுமதி சேர்க்கப்பட்ட வரி (VAT) நீங்கலாக 2.89 பில்லியன் ரூபா செலவில் இத்திட்டத்தை முன்னெடுப்பதற்கு அமைச்சரவை தனது ஒப்புதலை வழங்கியுள்ளது.
