மட்டக்களப்பு 5 கொலை வழக்கு: பிள்ளையானின் விளக்கமறியல் நீடிப்பு

மட்டக்களப்பு மாவட்டத்தில் இடம்பெற்ற ஐந்து நபர்களின் கொலைச் சம்பவங்கள் தொடர்பில் கைது செய்யப்பட்டு தடுப்புக் காவலில் வைக்கப்பட்டுள்ள முன்னாள் இராஜாங்க அமைச்சர் சிவநேசதுரை சந்திரகாந்தன் (பிள்ளையான்) உள்ளிட்ட மூவரின் விளக்கமறியல் எதிர்வரும் ஒக்டோபர் மாதம் 13 ஆம் திகதி வரை நீடிக்கப்பட்டுள்ளது.

இவ் வழக்கு மட்டக்களப்பு நீதவான் நீதிமன்றில் இன்று (29) விசாரணைக்கு எடுத்துக்கொள்ளப்பட்டபோதே நீதவான் இந்த உத்தரவைப் பிறப்பித்தார்.

பிள்ளையானுடன் சேர்த்து இராணுவப் புலனாய்வுப் பிரிவின் தகவல் வழங்குநர்கள் எனக் குறிப்பிடப்படும் முஹம்மது சிபான் மற்றும் முஹம்மது சகீத் ஆகிய இருவருக்கே இவ்வாறு விளக்கமறியல் நீடிக்கப்பட்டுள்ளது.

கடந்த 2008 ஆம் ஆண்டு மட்டக்களப்பு மாவட்டத்தில் இடம்பெற்ற மூன்று வெவ்வேறான சம்பவங்களில் ஐந்து பேர் படுகொலை செய்யப்பட்டமை தொடர்பிலேயே இந்த வழக்குத் தொடரப்பட்டுள்ளது.

கல்லடிப் பகுதியில் பொலிஸ் உத்தியோகஸ்தர் ஒருவர் உள்ளிட்ட இருவர் சுட்டுக்கொல்லப்பட்டமை, காத்தான்குடிப் பகுதியில் தமிழ் மக்கள் விடுதலைப் புலிகள் (TMVP) இயக்கத்தின் உறுப்பினர் ஒருவர் உள்ளிட்ட இருவர் சுட்டுக்கொல்லப்பட்டமை மற்றும் வவுணதீவு - கரையRangeகாந்திவு பகுதியில் வர்த்தகர் ஒருவர் கடத்தப்பட்டு படுகொலை செய்யப்பட்டமை ஆகிய சம்பவங்களே இதில் அடங்குகின்றன.

இச் சம்பவங்கள் தொடர்பாக பயங்கரவாதத் தடைச் சட்டத்தின் (PTA) கீழ் பிள்ளையான் கைது செய்யப்பட்டதுடன், காத்தான்குடியைச் சேர்ந்த சிபான் மற்றும் சகீத் ஆகிய இருவரையும் குற்றப் புலனாய்வுத் திணைக்களத்தினர் (CID) கைது செய்திருந்தனர்.

குறித்த ஐந்து கொலைகள் தொடர்பிலும் பிள்ளையான் மற்றும் தற்போது லண்டனில் வசிப்பதாகக் கூறப்படும் 'முகமது பாய்ஸ்' உள்ளிட்ட நால்வருக்கு எதிராக குற்றப் புலனாய்வுத் திணைக்களம் மட்டக்களப்பு நீதவான் நீதிமன்றத்தில் வழக்குத் தாக்கல் செய்துள்ளது.

இன்றைய தினம் இவழக்கு திறந்த நீதிமன்றத்தில் விசாரணைக்கு எடுத்துக்கொள்ளப்பட்ட போது, சந்தேகநபர்களான சிபான் மற்றும் சகீத் ஆகியோர் நேரில் ஆஜர்படுத்தப்பட்ட அதேவேளை, பிள்ளையான் காணொளித் தொடர்பு (Video link) மூலம் ஆஜர்படுத்தப்பட்டார்.

இதனைத் தொடர்ந்து, சந்தேகநபர்கள் மூவரையும் எதிர்வரும் ஒக்டோபர் 13 ஆம் திகதி வரை தொடர்ந்து விளக்கமறியலில் வைக்குமாறு நீதிமன்றம் உத்தரவிட்டது.