இலங்கை பால் உற்பத்தியை நவீனப்படுத்த பிரேசிலுடன் ஒப்பந்தம்: அமைச்சரவை அனுமதி

இலங்கையின் உள்நாட்டு பால் உற்பத்தியை மேம்படுத்தும் நோக்கில், பிரேசிலுடன் (Brazil) புதிய தொழில்நுட்ப ஒத்துழைப்பு ஒப்பந்தமொன்றை மேற்கொள்வதற்கு அமைச்சரவை அங்கீகாரம் அளித்துள்ளது.

விவசாய, கால்நடை, காணி மற்றும் நீர்ப்பாசன அமைச்சரினால் சமர்ப்பிக்கப்பட்ட யோசனைக்கே இந்நடவடிக்கை முன்னெடுக்கப்பட்டுள்ளது.

கடந்த 2008 ஆம் ஆண்டு செப்டம்பர் மாதம் இரு நாடுகளுக்கும் இடையே கையெழுத்திடப்பட்ட அடிப்படை ஒப்பந்தத்தின் தொடர்ச்சியாகவே இப்புதிய திட்டம் முன்னெடுக்கப்படுகிறது. இதன் ஒரு கட்டமாக, கடந்த 2023 ஆம் ஆண்டு இலங்கைக்கு விஜயம் மேற்கொண்ட பிரேசில் நிபுணர்கள் குழு, நாட்டின் பால் உற்பத்தி மற்றும் கரும்பு சாகுபடித் துறைகள் குறித்து கள ஆய்வுகளை மேற்கொண்டது.

குறித்த கள ஆய்வுகள் மற்றும் இலங்கையின் தேசிய அறிவியல் அமைப்பின் கருத்துரு அறிக்கை ஆகியவற்றின் அடிப்படையில், இத்திட்டத்தை முன்னெடுத்துச் செல்வதற்கான முறையான கட்டமைப்பு குறித்து இரு நாடுகளும் இணக்கப்பாட்டிற்கு வந்துள்ளன.

இப்புதிய திட்டத்தின் கீழ், பிரேசிலின் வெளியுறவு அமைச்சச்சின் பிரேசில் ஒத்துழைப்பு முகவரகம் மற்றும் விசோசா கூட்டாட்சி பல்கலைக்கழகம் ஆகியவற்றுடன் இலங்கை நேரடியாகப் பங்களிப்பு செய்யவுள்ளது.

அத்துடன், இத்திட்டத்தைச் செயல்படுத்துவதற்குத் தேவையான இரு நாடுகளுக்கு இடையிலான பூரகத் தழுவல் ஒப்பந்தத்திற்கும் அமைச்சரவை அனுமதி வழங்கியுள்ளது. இதன் மூலம் பிரேசிலின் நவீன தொழில்நுட்பம் மற்றும் நிபுணத்துவத்தைப் பயன்படுத்தி, இலங்கையின் பால் உற்பத்தித் திறனை வலுப்படுத்துவதற்கு வழிவகை செய்யப்பட்டுள்ளது.