வருமான வரி செலுத்துவதற்கு செப்டம்பர் 30 இறுதி நாள்: உள்நாட்டு இறைவரித் திணைக்களம் எச்சரிக்கை!

2025/2026 மதிப்பீட்டு ஆண்டுக்கான இறுதிக் கட்ட வருமான வரியைச் செலுத்துவதற்குரிய இறுதி நாளாக எதிர்வரும் செப்டம்பர் மாதம் 30 ஆம் திகதி நிர்ணயிக்கப்பட்டுள்ளதாக உள்நாட்டு இறைவரித் திணைக்களம் அறிவித்துள்ளது.

வரிச் செலுத்துநர்களுக்கு விடுக்கப்பட்டுள்ள விசேட அறிவித்தலிலேயே இவ்வாறë வலியுறுத்தப்பட்டுள்ளது. இதற்கமைய, வருமான வரி செலுத்தப் பொறுப்பான தனிநபர்கள் மற்றும் வியாபார நிறுவனங்கள் தாமதக் கட்டணங்கள் மற்றும் வட்டித் தண்டனைகளைத் தவிர்ப்பதற்காக, குறித்த காலக்கெடுவுக்கு முன்னதாகத் தமது வரிகளைச் செலுத்தி முடிக்குமாறு கேட்டுக் கொள்ளப்பட்டுள்ளனர்.

இந்த அறிவித்தலானது நிறுவன வருமான வரி , தனிநபர் வருமான வரி மற்றும் கூட்டு நிறுவன வருமான வரி ஆகியவற்றுக்குப் பொருந்தும் எனத் திணைக்களம் சுட்டிக்காட்டியுள்ளது.

வரி செலுத்துவதற்கான முறைகள்

வரிச் செலுத்துநர்கள் தமது கொடுப்பனவுகளைத் திணைக்களத்தின் இணையவழி வரிச் செலுத்தும் கட்டமைப்பு ஊடாக இலகுவாகச் செலுத்த முடியும். அத்துடன், மேற்கூறிய மூன்று வகையான வரிகளையும் நாட்டின் எந்தவொரு இலங்கை வங்கி கிளை ஊடாகவும் செலுத்த வசதிகள் செய்யப்பட்டுள்ளன.

முன் அச்சிடப்பட்ட செலுத்துகைச் சீட்டை பயன்படுத்தாமல் வங்கிகளில் பணம் செலுத்தும் வரிச் செலுத்துநர்கள், அந்தப் பணக் கொடுப்பனவு சரியாகப் பதிவு செய்யப்படுவதை உறுதி செய்வதற்காகத் தங்களது ஆவண அடையாள இலக்கத்தை செலுத்துகைச் சீட்டில் கட்டாயம் குறிப்பிடுமாறு அறிவுறுத்தப்பட்டுள்ளனர்.

தாமதத்துக்கான தண்டனைகள்

காலம் கடந்து வரி செலுத்துதல் அல்லது வரி செலுத்தத் தவறுதல் ஆகியவற்றுக்கு மேலதிக வட்டி மற்றும் தண்டப்பணங்கள் அறவிடப்படும் என உள்நாட்டு இறைவரித் திணைக்களம் கடுமையாக எச்சரித்துள்ளது. மேலும், வரித் தாமதத்துக்காக விதிக்கப்படும் வட்டியை எந்தவொரு சந்தர்ப்பத்திலும் தள்ளுபடி செய்யவோ அல்லது குறைக்கவோ முடியாது எனவும் திணைக்களம் தெளிவுபடுத்தியுள்ளது.

அத்துடன், வங்கிக் வரைவோ அல்லது கட்டளைப் பணமோ உரிய திகதிக்குப் பின்னர் பணமாக்கப்படுமாயின், அக்கொடுப்பனவானது தாமதமானதாகவே கணக்கிடப்படும் எனவும் தெரிவிக்கப்பட்டுள்ளது.

இது தொடர்பான மேலதிக உதவிகள் அல்லது தெளிவுபடுத்தல்கள் தேவைப்படும் வரிச் செலுத்துநர்கள், உள்நாட்டு இறைவரித் திணைக்களத்தின் அவசர தொலைபேசி இலக்கமான 1944 ஊடாகத் தொடர்புகொண்டு தகவல்களைப் பெற்றுக் கொள்ள முடியும்.