வங்கிக் கணக்கு, வாகன உரிமப் புதுப்பிப்புக்கு TIN சான்றிதழ் அவசியமில்லை!

புதிய வங்கிக் கணக்குகளைத் திறப்பதற்கும், வாகன வருமான உரிமப் பத்திரங்களைப் புதுப்பிப்பதற்கும் வரி செலுத்துவோர் அடையாள இலக்கமான (TIN) சான்றிதழைச் சமர்ப்பிக்க வேண்டிய அவசியமில்லை என நிதி அமைச்சு அறிவித்துள்ளது.

இந்தச் சேவைகளைப் பெற்றுக்கொள்வதில் பொதுமக்களுக்கு ஏற்படக்கூடிய தாமதங்களைத் தவிர்க்கும் நோக்கில் விசேட ஏற்பாடுகள் செய்யப்பட்டுள்ளதாக நிதி அமைச்சு தெரிவித்துள்ளது.

உள்நாட்டு இறைவரித் திணைக்களம் மற்றும் மோட்டார் வாகனப் போக்குவரத்துத் திணைக்களம் ஆகியவற்றுடன் இணைந்து வெளியிட்டுள்ள பொது அறிவித்தலிலேயே இந்த விடயம் குறிப்பிடப்பட்டுள்ளது.

ஏற்கனவே TIN இலக்கத்தைப் பெற்றுள்ளவர்கள், அதற்கான சான்றிதழை வைத்திருக்காவிட்டாலும் தமது TIN இலக்கத்தை உரிய நிறுவனங்களுக்கு வழங்கி குறித்த சேவைகளைப் பெற்றுக்கொள்ள முடியும்.

இதுவரை TIN இலக்கத்தைப் பெற்றுக்கொள்ளாதவர்களும் தமது தேசிய அடையாள அட்டை இலக்கம், பெயர், முகவரி, தொலைபேசி இலக்கம் மற்றும் மின்னஞ்சல் முகவரி ஆகிய விபரங்களைச் சமர்ப்பித்து இந்தச் சேவைகளைப் பெற்றுக்கொள்ள முடியும்.

விண்ணப்பதாரர்கள் வழங்கும் தகவல்களின் அடிப்படையில் TIN இலக்கத்தை வழங்குவதற்கும் அல்லது அதற்கான பதிவுகளை மேற்கொள்வதற்கும் சம்பந்தப்பட்ட நிறுவனங்கள் நடவடிக்கை எடுக்கும் என அறிவிக்கப்பட்டுள்ளது.

TIN சான்றிதழைச் சமர்ப்பிக்க முடியாத காரணத்தினால் மாத்திரம் பொதுமக்களுக்கு வழங்கப்படும் சேவைகளைத் தாமதப்படுத்தவோ அல்லது மறுக்கவோ கூடாது என்றும் நிதி அமைச்சு வலியுறுத்தியுள்ளது.

இதற்கிடையில், நவம்பர் முதலாம் திகதி முதல் எட்டு வகையான நடவடிக்கைகளுக்கு TIN சான்றிதழ் கட்டாயமாக்கப்பட்டுள்ளதாகவும் அமைச்சு தெரிவித்துள்ளது.

அதன்படி, பின்வரும் எட்டு நடவடிக்கைகளுக்கு TIN சான்றிதழ் தேவைப்படும் என அறிவிக்கப்பட்டுள்ளது.

1. புதிய வங்கி அல்லது நிதி நிறுவனக் கணக்குகளைத் திறத்தல்.
2. மோட்டார் வாகன வருமான உரிமப் பத்திரங்களைப் புதுப்பித்தல்.
3. கடன் அட்டைகளைப் பெற்றுக்கொள்ளுதல்.
4. கட்டிட நிர்மாணத் திட்டங்களுக்கு அனுமதி பெறுதல்.
5. மோட்டார் வாகனங்களைப் பதிவு செய்தல்.
6. காணிகள் அல்லது காணி உரிமைகளைப் பதிவு செய்தல்.
7. வணிக நிறுவனங்களைப் பதிவு செய்தல்.
8. நிறுவனமொன்றின் பங்குகளைப் பரிமாற்றம் செய்தல்.

எனினும், புதிய வங்கிக் கணக்குகளைத் திறத்தல் மற்றும் வாகன வருமான உரிமப் பத்திரங்களைப் புதுப்பித்தல் ஆகிய இரண்டு நடவடிக்கைகளுக்கும் விசேட ஏற்பாடுகள் பொருந்தும் என்பதால், ஏனைய ஆறு நடவடிக்கைகளுக்கு TIN சான்றிதழைச் சமர்ப்பிப்பது அவசியமாகும்.

மேலும், TIN சான்றிதழ்களின் அச்சுப் பிரதிகள் மற்றும் இலத்திரனியல் பிரதிகள் இரண்டும் செல்லுபடியாகும் என நிதி அமைச்சு தெளிவுபடுத்தியுள்ளது.

இந்தச் சான்றிதழ்கள் கணினி முறைமையின் ஊடாக உருவாக்கப்படுவதால், அவற்றில் உத்தியோகபூர்வ கையொப்பம், பொறிக்கப்பட்ட முத்திரை, இலச்சினை அல்லது உண்மைப் பிரதி என உறுதிப்படுத்தும் சான்றொப்பம் ஆகியவை அவசியமில்லை என்றும் அறிவிக்கப்பட்டுள்ளது.

அத்துடன், இலங்கையில் வசிக்கும் 18 வயதுக்கு மேற்பட்ட அனைவரும் சட்டப்படி TIN இலக்கத்தைப் பெற்றுக்கொள்ள வேண்டியது கட்டாயம் என்றாலும், TIN இலக்கத்தைப் பெற்றிருப்பதால் மாத்திரம் ஒருவர் வருமான வரி செலுத்த வேண்டிய கட்டாயம் ஏற்படாது எனவும் அமைச்சு சுட்டிக்காட்டியுள்ளது.

ஒருவரின் வருடாந்த வருமானம் 18 இலட்சம் ரூபாவை (1.8 மில்லியன் ரூபா) தாண்டும் பட்சத்திலேயே அவருக்கு வருமான வரி செலுத்தும் பொறுப்பு ஏற்படும் எனவும் தெரிவிக்கப்பட்டுள்ளது.

இதற்கிடையில், உடனடியாக TIN இலக்கம் தேவைப்படாதவர்கள், உள்நாட்டு இறைவரித் திணைக்களத்திலும் அதன் இணையவழி முறைமையிலும் காணப்படும் நெரிசல் குறையும் வரை பதிவுகளை மேற்கொள்வதைப் பிற்போடுமாறு அறிவுறுத்தப்பட்டுள்ளனர்.