லலித் - குகன் வழக்கு: கோட்டாபய சாட்சியமளிக்க ஆஜர்; கொழும்பில் போராட்டம்

மனித உரிமைகள் செயற்பாட்டாளர்களான லலித் குமார் வீரராஜ் மற்றும் குகன் முருகானந்தன் ஆகியோர் காணாமல் ஆக்கப்பட்டமை தொடர்பிலான வழக்கில், காணொளி இணைப்பு (video link) வாயிலாக சாட்சியமளிப்பதற்காக முன்னாள் ஜனாதிபதி கோட்டாபய ராஜபக்ஷ கொழும்பு தலைமை நீதவான் நீதிமன்றத்தில் இன்று (29) ஆஜரானார். இதன்போது, நீதிமன்ற வளாகத்திற்கு வெளியே அமைதிப் போராட்டமொன்றும் முன்னெடுக்கப்பட்டது.

யாழ்ப்பாணம் நீதவான் நீதிமன்றத்தில் விசாரிக்கப்பட்டு வரும் இவ்வழக்கில், கொழும்பு தலைமை நீதவான் நீதிமன்றத்தில் இன்று ஆஜராகி காணொளி வழியே சாட்சியத்தை வழங்குமாறு முன்னாள் ஜனாதிபதிக்கு யாழ்ப்பாணம் நீதவான் நீதிமன்றம் முன்னர் உத்தரவிட்டிருந்தது.

இந்நிலையில், லலித் மற்றும் குகன் உள்ளிட்ட காணாமல் ஆக்கப்பட்ட அனைத்து நபர்கள் தொடர்பிலும் உண்மைகள் கண்டறியப்பட வேண்டும் என வலியுறுத்தி, காலை 10.00 மணியளவில் கொழும்பு புதுக்கடை நீதிமன்ற வளாகத்திற்கு வெளியே இப்போராட்டம் ஏற்பாடு செய்யப்பட்டிருந்தது.

போராட்டத்தில் கலந்துகொண்டு உரையாற்றிய முன்னிலை சோசலிசக் கட்சியின் கல்விச் செயலாளர் புபுது ஜயகொட, 2011ஆம் ஆண்டு டிசம்பர் மாதம் யாழ்ப்பாணத்தில் வைத்து லலித் குமார் வீரராஜ் மற்றும் குகன் முருகானந்தன் ஆகியோர் கடத்தப்பட்டு காணாமல் ஆக்கப்பட்டதாகச் சுட்டிக்காட்டினார். 16 ஆண்டுகள் கடந்துள்ள போதிலும், அவர்கள் இருவர் குறித்தும் இதுவரை எந்தத் தகவலும் வெளியிடப்படவில்லை என அவர் குற்றஞ்சாட்டினார்.

அவர்களின் இருப்பிடம் குறித்த உண்மைகளை வெளிப்படுத்துமாறு கோரி ஆட்கொணர்வு மனு தாக்கல் செய்யப்பட்டதைத் தொடர்ந்து, அதன் விசாரணை யாழ்ப்பாணம் நீதவான் நீதிமன்றத்திற்கு மாற்றப்பட்டதாகத் தெரிவித்த அவர், அமைச்சரவை ஊடகவியலாளர் மாநாட்டில் தாம் வெளியிட்ட கருத்துக்கள் அன்றைய பாதுகாப்புச் செயலாளராக இருந்த கோட்டாபய ராஜபக்ஷவின் வழிகாட்டலிலேயே தெரிவிக்கப்பட்டதாக முன்னாள் அமைச்சர் கெஹலிய ரம்புக்கவெல யாழ்ப்பாணம் நீதவான் நீதிமன்றத்தில் சாட்சியமளித்திருந்ததையும் நினைவூட்டினார்.

பல ஆண்டுகளுக்குப் பிறகு முன்னாள் ஜனாதிபதி ஒருவர் நீதிமன்றத்தில் சாட்சியமளிக்க ஆஜர்படுத்தப்பட்டிருப்பது வரலாற்றுச் சிறப்புமிக்கது எனக் குறிப்பிட்ட அவர், அநீதி இழைக்கப்பட்ட ஆயிரக்கணக்கான காணாமல் ஆக்கப்பட்ட சம்பவங்களுக்கு நீதியை நிலைநாட்டுதல், உண்மையைக் கண்டறிதல், குற்றவாளிகளுக்குத் தண்டனை வழங்குதல் மற்றும் எதிர்காலத்தில் இதுபோன்ற சம்பவங்கள் நிகழாமல் தடுத்தல் என்பன மிக முக்கியமானவை என வலியுறுத்தினார். சட்டப் ரீதியாகவும், தேசிய மற்றும் சர்வதேச ரீதியிலான போராட்டங்கள் மூலமாகவும் இப்போராட்டத்தை முன்நகர்த்திச் செல்லவுள்ளதாகவும் அவர் தெரிவித்தார்.

கோட்டாபய ராஜபக்ஷ பாதுகாப்புச் செயலாளராகப் பணியாற்றிய காலத்தில் நிகழ்ந்த இச்சம்பவம் தொடர்பில், நாட்டில் இனி எந்தவொரு குடிமகனும் இதுபோன்ற சூழலை எதிர்கொள்ளக் கூடாது என்பதில் தாம் உறுதியாக இருப்பதாக அவர் மேலும் குறிப்பிட்டார்.