சபாநாயகருக்கு எதிராக எதிர்க்கட்சியினர் முன்வைத்த ஐந்து சிறப்புரிமை மீறல் கோரிக்கைகளும் நிராகரிப்பு!

சபாநாயகருக்கு எதிராகவும் நாடாளுமன்ற நடவடிக்கைகள் தொடர்பாகவும் எதிர்க்கட்சி நாடாளுமன்ற உறுப்பினர்களால் முன்வைக்கப்பட்ட ஐந்து சிறப்புரிமை மீறல் கோரிக்கைகளையும் ஆராய்ந்த பின்னர், அவற்றை நிராகரிப்பதாகப் பிரதிச் சபாநாயகர் ரிஸ்வி சாலிஹ் இன்று (06) நாடாளுமன்றத்தில் அறிவித்தார்.

நாடாளுமன்ற சிறப்புரிமை மீறல் இடம்பெற்றுள்ளதாகக் கருதுவதற்குப் போதிய அடிப்படை ஆதாரங்கள் இல்லாத காரணத்தினால் இந்தக் கோரிக்கைகள் நிராகரிக்கப்பட்டதாக அவர் தெரிவித்தார்.

எதிர்க்கட்சித் தலைவர் சஜித் பிரேமதாச மற்றும் நாடாளுமன்ற உறுப்பினர்களான தயாசிறி ஜயசேகர, மனோ கணேசன், முஜிபுர் ரஹ்மான், சானக மதகொட ஆகியோரால் இந்த ஐந்து கோரிக்கைகளும் முன்வைக்கப்பட்டிருந்தன.

சபாநாயகரால் வெளியிடப்பட்ட அறிவிப்பை நாடாளுமன்றத்தில் வாசித்த பிரதிச் சபாநாயகர், நாடாளுமன்ற நிலையியற் கட்டளைகள் மற்றும் 1953ஆம் ஆண்டின் 21ஆம் இலக்க நாடாளுமன்ற (அதிகாரங்கள் மற்றும் சிறப்புரிமைகள்) சட்டம் ஆகியவற்றின் அடிப்படையில் இந்தக் கோரிக்கைகள் ஆராயப்பட்டதாகக் குறிப்பிட்டார்.

இதன்போது, நிலையியற் கட்டளை 118இன் கீழ் விசாரணைக்கு எடுத்துக்கொள்ள வேண்டிய வகையில், நாடாளுமன்ற சிறப்புரிமை மீறப்பட்டதற்கான ஆரம்பகட்ட ஆதாரங்கள் எதுவும் முன்வைக்கப்படவில்லை என அவர் சுட்டிக்காட்டினார்.

நாடாளுமன்ற நடைமுறைகள், நிகழ்ச்சி நிரலில் விடயங்களை உள்ளடக்குதல் மற்றும் நாடாளுமன்ற அமர்வுகளை ஒழுங்குபடுத்துதல் போன்றவை நிர்வாக மற்றும் நடைமுறை சார்ந்த விடயங்களாகும். இவற்றை நாடாளுமன்ற சிறப்புரிமை மீறல்களாகக் கருத முடியாது என்றும் அவர் விளக்கமளித்தார்.

மேலும், கடந்த ஒக்டோபர் 06ஆம் திகதி சபாநாயகர் வழங்கிய தீர்ப்பையும் அவர் இதன்போது சுட்டிக்காட்டினார். நாடாளுமன்ற நடவடிக்கைகள் தொடர்பான நிர்வாகத் தீர்மானங்கள் மற்றும் விவாதத்திற்கான நேர ஒதுக்கீடு ஆகியவற்றை சிறப்புரிமை மீறல் கேள்விகள் ஊடாகச் சவாலுக்கு உட்படுத்த முடியாது என அந்தத் தீர்ப்பில் குறிப்பிடப்பட்டிருந்தது.

சபாநாயகருக்கு எதிராக முன்வைக்கப்பட்ட நம்பிக்கையில்லாப் பிரேரணை தொடர்பாகக் கருத்துத் தெரிவித்த பிரதிச் சபாநாயகர், நீதிமன்ற விசாரணையில் உள்ள விடயங்களை (Sub judice) நீக்கி, திருத்தப்பட்ட பிரேரணையைச் சமர்ப்பிக்க நாடாளுமன்ற அலுவல்கள் குழு சந்தர்ப்பம் வழங்கியிருந்ததாகக் கூறினார்.

எனினும், நிர்ணயிக்கப்பட்ட காலப்பகுதிக்குள் திருத்தப்பட்ட பிரேரணை சமர்ப்பிக்கப்படாததால், ஆரம்பத்தில் முன்வைக்கப்பட்ட பிரேரணையை விவாதத்திற்கு எடுத்துக்கொள்ள வேண்டும் என்ற நிபந்தனையற்ற உரிமை கிடையாது என்றும் அவர் தெரிவித்தார்.

அத்துடன், முன்வைக்கப்பட்ட குற்றச்சாட்டுகள் நாடாளுமன்ற (அதிகாரங்கள் மற்றும் சிறப்புரிமைகள்) சட்டத்தின் கீழ் குற்றங்களாகவும் அமையவில்லை என அவர் குறிப்பிட்டார்.

இதற்கமைய, எதிர்க்கட்சி உறுப்பினர்களால் முன்வைக்கப்பட்ட ஐந்து கோரிக்கைகளும் நிலையியற் கட்டளை 118இன் தேவைகளைப் பூர்த்தி செய்யத் தவறியுள்ளதால், அவற்றைத் தொடர்ந்து முன்னெடுப்பதற்கு எந்தவிதமான அடிப்படையும் இல்லை எனப் பிரதிச் சபாநாயகர் அறிவித்தார்.

இதேவேளை, சபாநாயகருக்கு எதிரான நம்பிக்கையில்லாப் பிரேரணையை கையாளும் விதம் உள்ளிட்ட பல்வேறு விடயங்கள் தொடர்பாக இந்த வார முற்பகுதியில் எதிர்க்கட்சி நாடாளுமன்ற உறுப்பினர்கள் சிறப்புரிமை மீறல் கேள்விகளை எழுப்பியிருந்தனர்.

இதற்கான தீர்மானம் ஆராயப்பட்டு இன்று நாடாளுமன்றத்திற்கு அறிவிக்கப்படும் என அப்போது பிரதிச் சபாநாயகர் தெரிவித்திருந்தமை குறிப்பிடத்தக்கது.