கிரிஷ் நிறுவன காணி ஒப்பந்த மோசடி விசாரணை: நாமல் ராஜபக்ஷவின் கையெழுத்தை ஆய்வு செய்ய நடவடிக்கை

கிரிஷ் நிறுவனத்துடனான சர்ச்சைக்குரிய காணி பரிவர்த்தனை தொடர்பான விசாரணையின் ஒரு பகுதியாக, நாடாளுமன்ற உறுப்பினர் நாமல் ராஜபக்ஷவின் கையெழுத்து எனக் கூறப்படும் ஆவணமொன்று அரசாங்க பகுப்பாய்வாளர் திணைக்களத்திடம் ஒப்படைக்கப்பட்டுள்ளதாக இலஞ்ச ஊழல் குற்றச்சாட்டுகளை விசாரிக்கும் ஆணைக்குழு கொழும்பு நீதவான் நீதிமன்றத்திற்கு அறிவித்துள்ளது.

குறித்த வழக்கு கொழும்பு பிரதம நீதவான் அசங்க எஸ். போதரகம முன்னிலையில் நேற்று முன்தினம் (06) விசாரணைக்கு எடுத்துக்கொள்ளப்பட்டபோதே இந்த விடயம் தெரிவிக்கப்பட்டுள்ளது.

இவ்வழக்கில் பிணை வழங்கப்பட்டுள்ள போதிலும், வேறு வழக்குகள் தொடர்பாக தொடர்ந்தும் விளக்கமறியலில் வைக்கப்பட்டுள்ள நாமல் ராஜபக்ஷவும், கிரிஷ் நிறுவனத்தின் முன்னாள் பணிப்பாளரான ஜானகி சிறிவர்தனவும் சிறைச்சாலை அதிகாரிகளால் நீதிமன்றத்தில் ஆஜர்படுத்தப்பட்டனர்.

இதன்போது, இலஞ்ச ஊழல் விசாரணை ஆணைக்குழு சார்பில் முன்னிலையான உதவிப் பணிப்பாளர், கொழும்பு பிரதேச செயலாளர் மற்றும் முன்னாள் காணி ஆணையாளர் உள்ளிட்ட பலரிடம் ஏற்கனவே வாக்குமூலங்கள் பதிவு செய்யப்பட்டுள்ளதாக நீதிமன்றத்திற்கு அறிவித்தார்.

அத்துடன், கொழும்பு கோட்டைப் பகுதியில் அமைந்துள்ள ட்ரான்ஸ்வேர்க்ஸ் சதுக்கத்தில் (Transworks Square) உள்ள காணியை இந்தியாவின் கிரிஷ் நிறுவனத்திற்கு மாற்றியமை தொடர்பாக நகர அபிவிருத்தி அதிகார சபையின் அதிகாரிகளிடமும் வாக்குமூலங்களைப் பெறுவதற்கு விசாரணையாளர்கள் திட்டமிட்டுள்ளதாக தெரிவிக்கப்பட்டது.

இந்நிலையில், நாமல் ராஜபக்ஷவின் கையெழுத்து இருப்பதாகக் கூறப்படும் ஆவணத்தின் மூலப் பிரதியை ஆய்வுக்காக சமர்ப்பிக்குமாறு அரசாங்க பகுப்பாய்வாளர் திணைக்களம் கோரியுள்ளதாக ஆணைக்குழு நீதிமன்றத்தில் தெரிவித்தது.

குறித்த ஆவணத்தின் மூலப் பிரதி தற்போது கொழும்பு மேல் நீதிமன்றத்தின் 7ஆம் இலக்க நீதிமன்றத்தில் உள்ள வழக்குக் கோவையில் காணப்படுவதாகவும் சுட்டிக்காட்டப்பட்டது.

இதனையடுத்து, அந்த ஆவணத்தை ஆய்வுக்காகப் பெற்றுக்கொள்வதற்கு மேல் நீதிமன்ற பதிவாளருக்கு உத்தரவு பிறப்பிக்குமாறு ஆணைக்குழு நீதிமன்றத்திடம் கோரிக்கை விடுத்தது.

எனினும், குறித்த கோரிக்கை நீதிமன்றத்தில் சமர்ப்பிக்கப்பட்ட மேலதிக அறிக்கையில் உள்ளடக்கப்படவில்லை என சுட்டிக்காட்டிய நீதவான், முறையான ஆவணங்களுடன் மீண்டும் விண்ணப்பிக்குமாறு ஆணைக்குழுவிற்கு அறிவுறுத்தினார்.

மேலும், விசாரணைகளின் முன்னேற்றம் தொடர்பான அறிக்கையை எதிர்வரும் நவம்பர் 20ஆம் திகதி சமர்ப்பிக்குமாறு நீதிமன்றம் உத்தரவிட்டது.

அன்றைய தினத்திற்கு வழக்கு ஒத்திவைக்கப்பட்டதுடன், ஜானகி சிறிவர்தனவின் விளக்கமறியல் காலமும் அதுவரை நீடிக்கப்பட்டது.

கொழும்பு கோட்டைப் பகுதியில் அமைந்துள்ள ட்ரான்ஸ்வேர்க்ஸ் சதுக்க காணியை, கலப்பு அபிவிருத்தித் திட்டமொன்றை முன்னெடுப்பதற்காக இந்தியாவின் கிரிஷ் நிறுவனத்திற்கு மாற்றியமைப்பது தொடர்பில் 70 மில்லியன் ரூபா இலஞ்சம் வழங்கப்பட்டதாகக் கூறப்படும் குற்றச்சாட்டுகள் தொடர்பிலேயே இந்த விசாரணை முன்னெடுக்கப்படுகிறது.

இது தொடர்பாக இலஞ்சம் பெற்றதாகவும், குறித்த குற்றத்திற்கு உடந்தையாக இருந்ததாகவும் முன்வைக்கப்பட்ட குற்றச்சாட்டுகளின் அடிப்படையில் நாமல் ராஜபக்ஷவும் ஜானகி சிறிவர்தனவும் முன்னதாக கைது செய்யப்பட்டு நீதிமன்றத்தில் ஆஜர்படுத்தப்பட்டிருந்தமை குறிப்பிடத்தக்கது.