பயங்கரவாத எதிர்ப்புச் சட்டமூலம் குறித்து கத்தோலிக்க திருச்சபை ஆய்வு – கர்தினால் மல்கம் ரஞ்சித்
அரசாங்கத்தினால் முன்மொழியப்பட்டுள்ள புதிய பயங்கரவாத எதிர்ப்புச் சட்டமூலம் தொடர்பில் ஏதேனும் குறைபாடுகள் அல்லது கவலைக்குரிய விடயங்கள் உள்ளனவா என்பதை ஆராய்ந்து வருவதாக கொழும்பு பேராயர் கர்தினால் மல்கம் ரஞ்சித் ஆண்டகை தெரிவித்துள்ளார்.
ஊடகங்களிடம் கருத்துத் தெரிவிக்கும்போதே அவர் இதனைக் குறிப்பிட்டுள்ளார்.
தற்போதுள்ள பயங்கரவாதத் தடைச் சட்டத்திற்குப் (PTA) பதிலாக அறிமுகப்படுத்தப்படவுள்ள புதிய சட்டமூலம் தொடர்பில் கத்தோலிக்க திருச்சபை சட்ட நிபுணர்களின் உதவியுடன் ஆய்வுகளை முன்னெடுத்து வருவதாக அவர் தெரிவித்துள்ளார்.
அரசாங்கம் குறித்த சட்டமூலத்தை தற்போது மக்கள் மத்தியில் முன்வைத்துள்ள நிலையில், அதனைத் தாங்கள் ஆராய்ந்து வருவதாகவும் கர்தினால் குறிப்பிட்டுள்ளார்.
சட்டமூலத்தில் காணப்படும் ஏற்பாடுகள் தொடர்பில் சட்டத்தரணிகள் ஆய்வு செய்து வருவதாகவும், அதில் ஏதேனும் குறைபாடுகள் காணப்படுகின்றனவா என்பதைக் கண்டறிவதே இந்த ஆய்வின் நோக்கம் என்றும் அவர் தெரிவித்துள்ளார்.
இதேவேளை, நாட்டின் கல்வி முறைமை தொடர்பிலும் கருத்துத் தெரிவித்த கர்தினால் மல்கம் ரஞ்சித் ஆண்டகை, கல்வி என்பது பாடப்புத்தகங்கள் மற்றும் வகுப்பறைக் கற்றலுடன் மாத்திரம் மட்டுப்படுத்தப்படக் கூடாது என வலியுறுத்தியுள்ளார்.
மாணவர்களின் ஆளுமை விருத்தி, நற்பண்புகளை வளர்த்தல் மற்றும் வாழ்க்கையில் எதிர்கொள்ளும் சவால்களைத் துணிச்சலுடன் எதிர்கொள்ளும் மனவலிமையை உருவாக்குதல் ஆகியவற்றுக்கும் கல்வி முக்கியத்துவம் அளிக்க வேண்டும் என அவர் தெரிவித்துள்ளார்.
முழுமையான கல்வி என்பது புத்தகங்களிலிருந்து பெறும் அறிவு மாத்திரமல்ல என்றும், வாழ்க்கையின் சவால்களை எதிர்கொள்வதற்குத் தேவையான உள்ளார்ந்த வலிமையையும் அது மாணவர்களுக்கு வழங்க வேண்டும் என்றும் அவர் சுட்டிக்காட்டியுள்ளார்.
அத்துடன், பொறுப்புணர்வுடன் தீர்மானங்களை மேற்கொள்ளுதல், சமூகத்தில் எதிர்கொள்ளும் சவால்களை நம்பிக்கையுடன் எதிர்கொள்ளுதல் மற்றும் வாழ்க்கையில் ஏற்படும் பிரச்சினைகளை வெற்றிகரமாகக் கடந்து செல்லுதல் போன்ற பண்புகளை மாணவர்களிடம் வளர்ப்பதில் பாடசாலைகள் கவனம் செலுத்த வேண்டும் என்றும் அவர் வலியுறுத்தியுள்ளார்.
