சசிகுமாரின் ‘நந்தன் 2’ அதிகாரபூர்வ அறிவிப்பு!
தமிழ்த் திரையுலகில் முன்னணி நடிகராகத் திகழும் சசிகுமார் நடிப்பில், ஒடுக்கப்பட்ட மக்களின் அதிகாரப் பகிர்வு மற்றும் உள்ளாட்சி மன்ற அரசியலின் யதார்த்த சூழலைப் பேசிய ‘நந்தன்’ திரைப்படம் வெளியாகி இரண்டு ஆண்டுகள் நிறைவடைந்துள்ள நிலையில், அத்திரைப்படத்தின் இரண்டாம் பாகம் குறித்த அதிகாரபூர்வ அறிவிப்பு தற்போது வெளியாகியுள்ளது.
இத்திரைப்படத்தை ‘இரா என்டர்டெயின்மென்ட்’ (Era Entertainment) நிறுவனம் சார்பில், இயக்குநர் இரா.சரவணனே தயாரித்து, கதையெழுதி இயக்குகிறார். நிவாஸ் கே.பிரசன்னா இசையமைக்கும் இத்திரைப்படத்தின் முதற்கட்ட விளம்பரச் சுவரொட்டி (Title Look) தற்போது வெளியிடப்பட்டு ரசிகர்களின் கவனத்தை ஈர்த்துள்ளது.
இது குறித்துத் திரைப்படக் குழுவினர் கருத்துத் தெரிவிக்கையில், "சமூக அக்கறை கொண்ட மிக முக்கியமான பிரச்சினையை மையமாகக் கொண்டே இத்திரைப்படம் உருவாக்கப்படுகிறது. 'நந்தன்' திரைப்படத்தின் முதல் பாகத்தை விடவும், மேலும் அழுத்தமான ஒரு படைப்பாக இத்திரைப்படம் அமையும். இதில் நடிக்கும் நடிகர், நடிகையர் மற்றும் தொழில் நுட்பக் கலைஞர்கள் தொடர்பான விரிவான தகவல்கள் விரைவில் அதிகாரபூர்வமாக அறிவிக்கப்படும்" எனத் தெரிவித்துள்ளனர்.
