அர்ஜுன் தாஸின் புதிய படம்: தமிழில் அறிமுகமாகும் ப்ரீத்தி பகதாலா!
திரைப்பட இயக்குநர் ரஞ்சித் ஜெயக்கொடியின் இயக்கத்தில், பிரபல நடிகர் அர்ஜுன் தாஸ் முதன்மைப் பாத்திரத்தில் நடிக்கும் புதிய திரைப்படத்தின் தொடக்க விழா அண்மையில் சென்னையில் விமர்சையாக நடைபெற்றது. சிறப்பு பூஜையுடன் தொடங்கிய இந்நிகழ்வில் திரைத்துறையைச் சேர்ந்த முக்கியப் பிரபலங்கள் பலர் கலந்துகொண்டனர்.
குடும்ப உறவுகளை மையமாகக் கொண்டு உருவாகும் இத்திரைப்படத்தில், நடிகை ப்ரீத்தி பகதாலா கதாநாயகியாக நடிக்கவுள்ளார். தெலுங்கு திரையுலகில் 'பதங்' (Padang) மற்றும் '418' ஆகிய திரைப்படங்களில் நடித்து புகழ்பெற்ற இவர், இத்திரைப்படத்தின் மூலம் தமிழ் திரையுலகிற்கு முதன்முறையாக அறிமுகமாகிறார்.
இத்திரைப்படத்தில் மூத்த இயக்குநர் கே.எஸ். ரவிகுமார், நடிகர்கள் சரவணன், யோகி பாபு, பாலா சரவணன், அஸ்வினி நம்பியார், மோனா பெட்ரே மற்றும் ஜெகன் கிருஷ்ணன் உள்ளிட்ட பலர் முக்கியமான கதாபாத்திரங்களில் நடிக்கின்றனர்.
இத்திரைப்படத்திற்கு பிரபல இசையமைப்பாளர் ஷான் ரோல்டன் இசையமைக்கின்றார். வசந்த் விஜய் எம்.பி. மற்றும் சண்முக பிரியன் ஆகியோர் இணைந்து தயாரிக்கும் இத்திரைப்படத்திற்கு, பர்வீன் பானு இணைத் தயாரிப்பாளராகப் பணியாற்றுகிறார்.
இத்திரைப்படம் குறித்து கருத்து தெரிவித்துள்ள படக்குழுவினர், "காதல், குடும்ப உணர்வுகள், நகைச்சுவை மற்றும் வலுவான கதாபாத்திரப் படைப்புகளை உள்ளடக்கிய ஒரு முழுமையான குடும்பக் காதல் நாடகத் திரைப்படமாக இது உருவாக்கப்படுகின்றது" எனத் தெரிவித்தனர்.
