கொழும்பு கோட்டை நீதவான் கோசல சேனாடீர மீண்டும் சேவையில் இணைப்பு!
பணி இடைநிறுத்தப்பட்டிருந்த கொழும்பு கோட்டை நீதவான் கோசல சேனாடீரவை உடனடியாகச் அமலுக்கு வரும் வகையில் மீண்டும் சேவையில் இணைத்துக்கொள்ள நீதிச் சேவை ஆணைக்குழு நடவடிக்கை எடுத்துள்ளது.
அதன்படி, அவர் மீதான அனைத்துக் குற்றச்சாட்டுகளிலிருந்தும் முழுமையாக விடுவிக்கப்பட்டு, நிலுவைச் சம்பளத்துடன் (Back pay) கொழும்பு நீதவான் நீதிமன்றத்தில் மீண்டும் சேவையில் இணைக்கப்பட்டுள்ளார்.
தனது உத்தியோகபூர்வ வாசஸ்தலத்திற்கு சட்டவிரோதமான முறையில் மின்சாரம் மற்றும் குடிநீரைப் பெற்றுக்கொண்டார் என்ற குற்றச்சாட்டின் அடிப்படையில், 2024 ஆம் ஆண்டு ஜூலை மாதம் 10 ஆம் திகதி முதல் கோசல சேனாடீரவின் சேவை தற்காலிகமாக இடைநிறுத்தப்பட்டிருந்தது.
தலைமை நீதியரசர் தலைமையிலான நீதிச் சேவை ஆணைக்குழு, 20 இற்கும் மேற்பட்ட சாட்சியாளர்களிடம் வாக்குமூலங்களைப் பதிவுசெய்து, 27 மாதங்கள் வரை நடத்திய நீண்ட முறையான விசாரணைகளின் பின்னரே இந்தத் தீர்மானத்தை எட்டியுள்ளது.
கோசல சேனாடீர, நீதித் துறையில் சிறப்புத் தரத்தைச் சேர்ந்த மிகவும் சிரேஷ்ட நீதவான் என்பதும் குறிப்பிடத்தக்கது.
