கீத் நோயார் கடத்தல்: "எனக்கு நினைவில் இல்லை" - கோட்டாபய ராஜபக்ஷ நீதிமன்றில் சாட்சியம்

ஊடகவியலாளர் கீத் நோயார் கடத்தப்பட்டமை தொடர்பாகவோ அல்லது அச்சம்பவம் இடம்பெற்ற போது அது குறித்து யாராவது தம்முடன் தொடர்புகொண்டனரா என்பது குறித்தோ தமக்கு எதுவும் நினைவில் இல்லை என்று முன்னாள் ஜனாதிபதி கோட்டாபய ராஜபக்ஷ நீதிமன்றில் தெரிவித்துள்ளார்.

2011ஆம் ஆண்டு டிசம்பர் மாதம் சமூக செயற்பாட்டாளர்களான லலித் வீரராஜ் மற்றும் குகன் முருகானந்தன் ஆகியோர் காணாமல்போனமை தொடர்பில் யாழ்ப்பாணம் நீதவான் நீதிமன்றில் நிலுவையில் உள்ள வழக்கு விசாரணைக்காக, கொழும்பு நீதவான் நீதிமன்றில் இருந்து நேற்றைய தினம் (செவ்வாய்க்கிழமை) ஜூம் (Zoom) காணொளித் தொழில்நுட்பம் ஊடாக சாட்சியமளித்தபோதே அவர் இதனைக்கூறியுள்ளார்.

குறித்த இருவரின் உறவினர்களினால் தாக்கல் செய்யப்பட்ட இவ்வழக்கில், அன்றைய காலகட்டத்தில் பாதுகாப்புச் செயலாளராகப் பணியாற்றிய கோட்டாபய ராஜபக்ஷ சாட்சியாகப் பெயரிடப்பட்டிருந்தார்.

கீத் நோயார் கடத்தப்பட்டதைத் தொடர்ந்து லலித் அலஹகூன் தம்மைத் தொடர்புகொண்டு பேசினாரா என நீதிமன்றினால் கேட்கப்பட்ட கேள்விக்கு, "கனம் நீதிபதி அவர்களே, அது எனக்கு நினைவில் இல்லை" எனப் பதிலளித்தார். இச்சம்பவங்கள் இடம்பெற்று சுமார் 15 வருடங்கள் கடந்துள்ளதாகவும், சாட்சியமளிப்பதற்கு முன்னர் அதுகுறித்த விபரங்களை தாம் மீளாய்வு செய்யவில்லை என்றும் அவர் குறிப்பிட்டார்.

அத்துடன், கீத் நோயாரின் கடத்தல் சம்பவம் தொடர்பில் இராணுவத்தின் திரிபோலி முகாம் உறுப்பினர்கள் சிலர் கைது செய்யப்பட்டிருந்தமை குறித்து தமக்குத் தெரியாது என்றும் அவர் தெரிவித்தார். மேலும், தமது தலையீட்டின் காரணமாகவே கீத் நோயார் விடுவிக்கப்பட்டார் என்ற குற்றச்சாட்டை முழுமையாக நிராகரித்த அவர், அதனை முற்றாக மறுப்பதாகவும் கூறினார்.

தாம் பாதுகாப்புச் செயலாளராகப் பதவி வகித்த காலத்தில் இடம்பெற்றதாகக் கூறப்படும் கடத்தல்கள் மற்றும் காணாமல் ஆக்கப்படல்கள் தொடர்பான குற்றச்சாட்டுகள் குறித்து வினவப்பட்டபோது, அவை அனைத்தும் உண்மைக்குப் புறம்பானவை என்றும் அரசியல் உள்நோக்கம் கொண்டவை என்றும் கோட்டாபய ராஜபக்ஷ சுட்டிக்காட்டினார். நாட்டின் நற்பெயருக்குக் களங்கம் விளைவிக்கும் நோக்கிலேயே இத்தகைய குற்றச்சாட்டுகள் முன்வைக்கப்படுவதாகவும் அவர் தெரிவித்தார்.

இதனையடுத்து, இவ்வழக்கின் மேலதிக சாட்சிப் பதிவுகளை எதிர்வரும் நவம்பர் மாதம் 27ஆம் திகதிக்கு ஒத்திவைத்த நீதிமன்றம், அன்றைய தினம் நீதிமன்றில் ஆஜராகுமாறு கோட்டாபய ராஜபக்ஷவிற்கு உத்தரவிட்டது.