கல்கமுவ ‘காவந்திஸ்ஸ’ தனியன் யானைக்கு அவசர மருத்துவ சிகிச்சை ஆரம்பம்!
கல்கமுவ பகுதியில் நடமாடித் திரிந்த ‘காவந்திஸ்ஸ’ (Kawanthissa) என அழைக்கப்படும் தனியன் யானையின் வலது முன் காலில் ஏற்பட்ட காயத்திற்கு வனஜீவராசிகள் திணைக்கள அதிகாரிகள் அவசர கால்நடை மருத்துவ சிகிச்சைகளை ஆரம்பித்துள்ளனர்.
நிகவெரட்டிய கால்நடை மருத்துவ பிரிவின் வைத்திய அதிகாரி அடசூரியவின் மேற்பார்வையின் கீழ், காயமடைந்த காவந்திஸ்ஸவின் காலிற்கான முதற்கட்ட சிகிச்சைகள் இன்று (24) முன்னெடுக்கப்பட்டன.
காவந்திஸ்ஸ யானை நடமாடி வரும் உஸ்கல சியம்பலாங்கமுவ குளத்தைச் சுற்றியுள்ள பகுதியில், வனஜீவராசிகள் பாதுகாப்பு திணைக்களத்தின் சிறப்புப் படையணியினர் இன்று காலை முதல் தீவிர கண்காணிப்பு நடவடிக்கையினை முன்னெடுத்துள்ளதாக சுற்றாடல் அமைச்சு தெரிவித்துள்ளது.
கால்நடை வைத்திய அதிகாரிகள், வனஜீவராசிகள் அலுவலர்கள் மற்றும் சிறப்பு மருத்துவக் குழுவினர் அடங்கிய விசேட குழுவொன்றே இக் கூட்டு நடவடிக்கையில் ஈடுபட்டுள்ளது.
காவந்திஸ்ஸவின் தற்போதைய உடல்நிலையைத் துல்லியமாக மதிப்பீடு செய்துள்ள மருத்துவக் குழுவினர், அதன் வலது முன் காலில் உள்ள காயத்திற்கு அதிக கவனம் செலுத்தி, தேவையான உரிய மருத்துவ சிகிச்சைகளை வழங்கி வருவதாக அமைச்சு மேலும் குறிப்பிட்டுள்ளது.
சுற்றாடல் அமைச்சர் தம்மிக படபெந்தி மற்றும் அமைச்சின் செயலாளரின் நேரடித் தலையீட்டின் கீழ் இந்நடவடிக்கைகள் ஒருங்கிணைக்கப்பட்டு வருகின்றன. அதேவேளை, கால்நடைப் பணிப்பாளர் மருத்துவர் கங்காவின் வழிகாட்டலிலேயே மருத்துவக் குழுவினர் தொடர் சிகிச்சைகளை மேற்கொண்டு வருகின்றனர்.
யானையின் ஆரோக்கியம் மற்றும் பாதுகாப்பை முழுமையாக உறுதி செய்யும் வகையில், தேவையான அனைத்துக் கால்நடை மருத்துவ நடவடிக்கைகளும் இடைவெளியின்றித் தொடர்ந்து முன்னெடுக்கப்பட்டு வருகின்றன. அத்துடன், சிகிச்சை நடவடிக்கைகள் தொடரும் நிலையில், வனஜீவராசிகள் அதிகாரிகளும் மருத்துவக் குழுவினரும் காவந்திஸ்ஸவின் நிலையைத் தொடர்ச்சியாகக் கண்காணித்து வருகின்றனர்.
