ஒழுங்கமைக்கப்பட்ட குற்றச்செயல்களுடன் தொடர்புடைய சந்தேகநபர் ‘கைவாலு முத்து’ கைது!
ஐக்கிய அரபு இராச்சியத்திலிருந்து நாடு கடத்தப்பட்ட ஒழுங்கமைக்கப்பட்ட குற்றக்கும்பலுடன் தொடர்புடையதாகக் கூறப்படும் ‘கைவாலு முத்து’ என அழைக்கப்படும் மனோஜ் முத்துக்குமார், கட்டுநாயக்க பண்டாரநாயக்க சர்வதேச விமான நிலையத்தில் (BIA) வைத்து குற்றப் புலனாய்வுத் திணைக்களத்தினரால் கைது செய்யப்பட்டுள்ளார்.
ஒழுங்கமைக்கப்பட்ட குற்றச்செயல்களுடன் தொடர்புடைய சமயன் என்பவரின் நெருங்கிய கூட்டாளியாகக் கருதப்படும் மனோஜ் முத்துக்குமார், ஐக்கிய அரபு இராச்சியத்தின் ஷார்ஜா பகுதியில் வைத்து கைது செய்யப்பட்டதைத் தொடர்ந்து இலங்கைக்கு நாடு கடத்தப்பட்டதாகத் தெரிவிக்கப்படுகிறது.
இலங்கைக்கு அழைத்து வரப்பட்ட அவரை, குற்றப் புலனாய்வுத் திணைக்கள அதிகாரிகள் விமான நிலையத்தில் வைத்து கைது செய்துள்ளனர்.
இதனையடுத்து, மேலதிக விசாரணைகளுக்காக சந்தேகநபர் மேல் மாகாண தெற்குப் பிராந்திய குற்றத்தடுப்புப் பிரிவினரிடம் ஒப்படைக்கப்படவுள்ளதாகத் தகவல்கள் தெரிவிக்கின்றன.
